Wanpela Bung Bilong Lotu
Wanpela man long Itali i raitim dispela stori bilong Kirap!
LONG Februeri 1995 i gat sampela tok i kamap long wanpela samting em ol i ting em i wanpela mirakel bilong nau: Ol man i tok, ol i bin lukim aiwara i kamap long wanpela imis bilong Santu Maria long Sivitavekya, na aiwara bilong en i olsem blut. Kirap long dispela taim, ol Katolik bilong olgeta hap bilong graun ol i kam bilong lukim dispela imis.
Tasol wanpela nius (La Repubblica) i tok, planti Katolik i no amamas, long wanem, dispela hap planti man i kam long en olsem turis, i kamap olsem “wanpela bung bilong amamas.” Na sampela pris tu ol i no amamas tumas long planti planti man i kam bilong lotuim dispela imis. Luigi Pizzolato, em i wanpela tisa long Yunivesiti Katolik Bilong Milan, na em i sutim tok long misin, long wanem, misin i orait long ‘bel tasol i kirapim ol man’ long bilip. Em i tok “bilip bilong ol tumbuna i bagarapim” ol samting dispela mirakel i kamapim. Narapela tisa bilong lotu, Carlo Molari, em i tok, “long Nupela Testamen, wanpela man, em Saimon Magus, em i mekim wok long narapela kain strong bilong helpim em yet—long kisim mani, yumi bai tok long nau.”—Aposel 8:9-24.
Jisas i givim tok lukaut long ol disaipel bilong em long was gut long ol man i save “wokim ol bikpela mirakel na mekim ol narakain narakain samting i kamap.” (Matyu 24:3, 24) Maski i olsem ol mirakel samting i tru, nogut dispela i as bilong bilip bilong wanpela Kristen. (Hibru 11:1, 6) Yumi mas kisim stretpela save long Baibel na bihainim ol tok bilong en. Dispela i as bilong strongpela bilip. (Jon 17:3; Rom 10:10, 17; 2 Timoti 3:16) Olsem wanem? Yu laik kisim kain bilip olsem? Orait, gutpela yu larim ol Witnes Bilong Jehova i helpim yu taim ol i kam long haus bilong yu.
[Piksa Kredit Lain long pes 23]
AGF/La Verde