Insait Bilong Ol Tok i Kam Long Olgeta Hap
Rot Bilong Amamas?
Wanpela nius bilong Japan (Yomiuri Shimbun) i tok, sampela sumatin bilong Saina i dinau na bai ol i ken baim rot na i kam long Japan bilong wok mani. Ol i ting ol i ken skul na kisim wanpela liklik wok olsem wok haptaim tasol inap tupela o tripela yia na bai ol inap bungim bikpela mani olsem 2 bilion yen (K12,060), na bihain bai ol i go bek long Saina na i stap amamas inap bihain bihain.
Planti man long olgeta hap ol i gat dispela kain tingting long mani. Ol i ting mani i as bilong amamas. Wanpela nius i kamapim tok bilong wanpela lain i skelim tingting bilong ol yangpela long 9-pela kantri, na planti yangpela ol i tok, mani em i namba wan samting long ol, na ol i gat bikpela tingting long painim dispela tasol.—Asahi Evening News.
Tasol yu ting sapos yu givim bel long mani dispela bai helpim yu long painim amamas? Wanpela bikpela saveman, em King Solomon, em i tok: “Sapos bel bilong man i skrap long kisim planti mani, orait oltaim bai em i ting em i sot long mani,” (Saveman 5:10; 7:12) Sapos man i tingting tumas long mani, dispela i no ken mekim em i amamas, na i no ken helpim em tru long bihain tu. Baibel i tok: “Long dispela De belhat bilong Bikpela bai i kamap ples klia na olgeta silva na gol bilong ol bai i no inap helpim ol.” (Sefanaia 1:18) Tasol Devit i tok: “Man i save bilip long [Jehova], em i ken amamas.” Sapos yumi bilip long Jehova na yumi no bilip o givim bel long mani, dispela em i rot bilong i stap amamas long nau na inap long olgeta taim bihain.—Buk Song 40:4; Aisaia 30:18.
Hevi Bilong Baptais
Misin Anglikan i save baptaisim ol pikinini taim ol i liklik yet, tasol nau tupela hevi i kamap long dispela. Wanpela hevi, em ol i baptaisim nating ol pikinini, na wanpela pasto i tok, dispela samting i no stret. Na namba tu hevi i olsem: Sampela pasto i tok, sapos papamama i no kam long lotu na helpim lotu, orait pasto i no ken givim baptais long pikinini.
Planti pasto i save, papamama i bringim ol pikinini bilong ol i kam na bai pasto i ken givim baptais long ol, tasol papamama i no gat laik long i kam long lotu, na ol i no laik bai pikinini bilong ol tu i kam long lotu taim ol i bikpela liklik. Orait, bilong wanem ol i laik bai liklik pikinini bilong ol i kisim baptais? Wanpela nius (The Times) i tok, ‘Ol papamama i laikim olsem, long wanem, i olsem pikinini i kisim presen, o ol i mekim olsem long wanem em i pasin bilong tumbuna bilong ol, olsem ol i save bilasim haus bilong ol long taim bilong Krismas, o kain samting olsem—maski i no gat as bilong en, ol i mekim tasol.’
Wanpela pasto i lusim wok pasto bilong em, long wanem em i ting i no stret long ol liklik pikinini i kisim baptais. Em i tok, ‘Man yet i mas tok, em i laik bihainim Krais na kisim baptais o nogat.’ Na i gutpela sapos pasto i ken tok tu olsem: Krais Jisas i gat 30 krismas taim em i kisim baptais, na dispela tok ‘baptais’ long tok Grik em ba pti’ zo, na insait bilong en i olsem ‘putim man i go insait olgeta long wara.’ Baibel i tok, taim Jisas i kisim baptais pinis long Wara Jordan, em “i lusim i kam antap.” (Mak 1:10; Matyu 3:13, 16) Baibel i no tok long tromoi hap wara antap long het bilong pikinini. Baptais i bilong makim man i givim bel pinis long God, olsem dediket long em, na em i kamap man bilong bihainim lek bilong Krais. Tasol liklik pikinini i no inap mekim olsem.
Samting Bilong Pasim Bel na Ol Katolik
Long wanpela bikpela kibung ol i wokim long Rom long Novemba 1988, Pop John Paul Namba 2 i kolim gen tambu long pasim bel. Wanpela nius (L’Osservatore Romano) i kamapim tok bilong pop, em i tok, ‘dispela tambu i no wanpela bilip ol man yet i kamapim. Han bilong God yet i bin raitim dispela lo long skin bilong yumi olgeta manmeri. Sapos yumi no bilip long en i olsem yumi sakim tok bilong God.’ Na pop i tok, ol tisa bilong lotu Katolik i no ken skelim skelim dispela tambu—ol i mas bilip tasol long en.
Tasol 20 yia bipo pop i bin kolim dispela tambu long wanpela pas i gat ol lo bilong misin long en (Humanae Vitae), na kwiktaim planti tisa bilong misin i tok, em i no stret, na klostu olgeta Katolik i no bihainim. Wanpela nius bilong Itali i tok olsem.—La Stampa.
Tasol pop i no senisim dispela tambu, olsem na ol bikman bilong lotu ol i no stap wanbel, na ol Katolik i tingting planti long en. Ol bikman bilong lotu i toktok i go i kam long dispela lo i tambuim pasin bilong pasim bel, tasol ol i no wanbel long dispela tok, olsem na Pop John Paul i tokim ol, ol i mas i stap wanbel long dispela samting. Pastaim Pop i bin tok ‘han bilong God yet i bin raitim dispela lo long skin bilong yumi,’ tasol wanpela nius bilong Itali (La Repubblica) i tok, pop i no kolim wanpela hap tok bilong Baibel bilong truim dispela tambu.
Baibel i no gat sampela tok long ol samting ol marit i ken mekim na bai meri i no gat bel, na Baibel i no tok, ol Kristen i mas kamapim pikinini. Em samting bilong ol marit Kristen yet i mas tingim, na ol i mas tingim maus bilong bel bilong ol. Misin Katolik yet i putim dispela tambu, olsem na ol i “kalapim” tok bilong Baibel.—1 Korin 4:6.