Bilong Wanem Ol Mirakel Tasol i No Inap Kirapim Ol Man Long Bilip
‘SAPOS mi lukim, bai mi bilip.’ Planti man i gat tingting olsem. Sampela i save tok, sapos God i kamapim em yet long rot bilong mirakel, ol bai bilip long em. Sapos olsem, yu ting dispela kain bilip inap kirapim man long bilip tru?
Tingim sampela Israel, olsem Kora, Datan, na Abiram. Baibel i makim olsem ol i bin lukim ol dispela mirakel bilong God: tenpela bikpela hevi long Isip, lain Israel i brukim solwara Retsi, na King bilong Isip wantaim ami bilong em ol i bagarap. (Kisim Bek 7:19–11:10; 12:29-32; Song 136:15) Na tu long maunten Sainai, Kora, Datan, na Abiram i bin harim maus bilong Jehova long heven i toktok. (Lo 4:11, 12) Tasol bihain liklik long ol dispela mirakel i kamap, dispela tripela man ol i kirapim ol Israel long bikhet long Jehova na ol wokman em Jehova i bin makim ol bilong mekim wok.—Namba 16:1-35; Song 106:16-18.
Inap olsem 40 yia bihain long dispela, wanpela profet, nem bilong em Balam, em tu i lukim wanpela mirakel. Tasol maski wanpela ensel tu i kam pasim rot long em, Balam i strong yet long go helpim ol birua bilong God, em ol Moap. Yes, maski em i lukim mirakel, Balam i kirap na sakim God Jehova wantaim lain bilong Em. (Namba 22:1-35; 2 Pita 2:15, 16) Tru Balam i sot long bilip, tasol Judas Iskariot i winim em tru long dispela samting. Maski em i bin stap gutpela pren bilong Jisas na em i bin lukim planti kain kain mirakel, Judas i kamapim Krais long ol birua bilong kisim 30 mani silva.—Matyu 26:14-16, 47-50; 27:3-5.
Ol bikman bilong lotu Juda ol tu i save long planti mirakel em Jisas i bin wokim. Taim em i kirapim bek Lasarus, ol i tok: “Dispela man i save wokim planti mirakel.” Tasol taim ol i lukim Lasarus i stap laip gen, yu ting dispela i kirapim ol long bilip? Nogat tru. Ol i kirap na painim rot long kilim i dai Jisas wantaim Lasarus!—Jon 11:47-53; 12:10.
Maski God yet i kamapim sampela wok, dispela tu i no kirapim ol dispela man nogut long bilip. Wanpela taim Jisas i stap long hap bilong tempel na em i beten long maus olsem: “Papa, yu ken mekim nem bilong yu i kamap bikpela.” Wanpela tok i kam daun long heven na Jehova i tok olsem: “Mi mekim nem bilong mi i kamap bikpela pinis, na bai mi mekim olsem gen.” Em wanpela mirakel, tasol dispela i no kirapim ol man long bilip. Baibel i tok: “Ol i bin lukim em i wokim planti mirakel o mak, tasol ol i no bilip long em.”—Jon 12:28-30, 37; skelim wantaim Efesus 3:17.
As na Ol Mirakel i No Inap Kirapim Ol Man Long Bilip
Ol i bin lukim planti mirakel, olsem na bilong wanem ol i sot long bilip? Yumi hatwok long save long as na ol bikman bilong lotu Juda i sakim Jisas, long wanem, taim em i kirap mekim wok bilong em, planti Juda i wetim Krais, o Mesaia, i kamap. (Luk 3:15) Tasol ol i sakim em, long wanem, ol i gat sampela tingting kranki long samting ol i wetim i kamap. Wanpela man bilong wokim dikseneri, em W. E. Vine, em i kamapim tok bilong wanpela saveman bilong Baibel em i tok olsem ol Juda i bin strong long wetim wanpela Mesaia i kam bilong helpim ol long “daunim ol narapela lain” na givim “planti gutpela samting bilong skin” long ol. Olsem na ol i no redi long daun long dispela Jisas bilong Nasaret em i gat pasin daun na em i no save insait long ol wok politik, na em i kamap namel long ol olsem trupela Mesaia long 29 C.E. Na tu, ol bikman bilong lotu ol i pret—nogut ol tok bilong Jisas i senisim ol samting long kantri bilong ol na ol i no inap holim moa namba bilong ol. (Jon 11:48) Ol tingting ol i kisim pinis na pasin bilong tingim ol yet tasol, dispela i pasim tingting bilong ol na ol i no save long as na Jisas i wokim ol mirakel.
Bihain ol bikman bilong lotu Juda na sampela moa ol i sakim ol mirakel i kamapim klia olsem God em i orait long lain bilong Jisas. Olsem: Taim ol aposel bilong Jisas i oraitim wanpela lek nogut, em mama i karim em olsem, ol kaunsil bilong ol Juda ol i kros nogut tru na ol i kamapim dispela askim: “Bai yumi mekim wanem long dispela tupela man? Tupela i wokim wanpela mirakel, na olgeta manmeri long Jerusalem i save pinis long en. Yumi no inap haitim. Tasol nogut dispela tok i go nabaut moa yet long ol manmeri. Olsem na yumi mas tok strong long tupela, na tupela i no ken autim tok moa long dispela nem long ol arapela man.” (Aposel 3:1-8; 4:13-17) Olsem na yumi save, dispela gutpela mirakel tru i no bin kirapim bel bilong ol dispela man long bilip.
Sampela i laik kisim bikpela namba, o ol i gat pasin antap o pasin mangal, na ol dispela samting i bin kirapim planti man long pasim strong bel bilong ol, olsem Kora, Datan, na Abiram, em pastaim yumi bin stori long ol. Na bel nogut, pret, na sampela narapela pasin nogut i bin pasim rot long sampela narapela. Yumi ken tingim tu ol ensel i sakim tok bilong God, em bipo ol inap lukim pes bilong God yet. (Matyu 18:10) Ol i bilip strong olsem God i stap. “Ol spirit nogut ol tu i save bilip olsem, na ol i guria nogut.” (Jems 2:19) Tasol ol i no bilip long God.
Pasin Bilong Bilip Tru Em Wanem Samting?
Pasin bilong bilip i no olsem man i bilip nating, na em tasol. Nogat. Na taim man i lukim mirakel na wantu bel bilong em i kirap nating, dispela tu i no pasin bilong bilip tru. Hibru 11:1 i tok: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” Man i gat bilip, long bel em i bilip olsem olgeta samting God Jehova i bin tok promis long givim long em, em bai kisim tru, na i olsem em i kisim pinis. Tru, ai bilong man i no inap lukim ol dispela samting, tasol i gat planti samting i kamapim klia tru olsem ol dispela samting i stap. Olsem na pasin bilong bilip i wankain olsem man i lukim tru samting long ai bilong em. Yes, pasin bilong bilip i mas i gat as bilong en. Bipo, ol mirakel i insait long wok bilong kirapim ol man long bilip. Ol mirakel bilong Jisas i bilong helpim ol man long bilip olsem em i Mesaia em God i bin tok promis long salim i kam. (Matyu 8:16, 17; Hibru 2:2-4) Na olsem tasol, ol presen bilong spirit holi, o strong bilong God, olsem pasin bilong oraitim sik na mekim tok long kain kain tok ples long rot bilong mirakel, ol dispela i bin kamapim klia olsem Jehova i no orait moa long ol Juda—nau em i orait long lain Kristen, em Pikinini bilong em, Krais Jisas, i bin kamapim.—1 Korin 12:7-11.
Wanpela presen bilong spirit holi, em pasin bilong mekim tok profet. Taim ol man i no bilip i lukim dispela mirakel, dispela i kirapim sampela long lotuim Jehova, na ol i tok: “Tru tumas, God i stap namel long yupela.” (1 Korin 14:22-25) Tasol God Jehova i no gat tingting long ol mirakel i mas i stap inap olgeta taim olsem wanpela hap wok bilong lotu Kristen. Nogat. Olsem na aposel Pol i tok: “Wok bilong autim tok bilong God olsem profet, em bai i pinis. Na ol kain kain tok ples bai i pinis.” (1 Korin 13:8) Ol dispela presen i pinis taim ol aposel na ol man i bin kisim ol dispela presen long rot bilong ol, ol i dai pinis.
Olsem wanem? Dispela i mekim na bilip bilong ol man i no gat as moa? Nogat, long wanem, Pol i tok: “[God] i no bin hait olgeta bai ol man i no ken save long em. Nogat. Oltaim em i save mekim gutpela pasin long yupela. Em i mekim ren i lusim skai na i kam daun long yupela, na em i mekim planti gutpela kaikai i kamap. Em i givim yupela planti kaikai na i mekim bel bilong yupela i amamas.” (Aposel 14:17) Tru tumas, sapos ol man i gat gutpela bel ol i redi long opim tingting na bel bilong ol long ol samting God i bin wokim, orait “long dispela rot ol . . . inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim. Olsem na i no gat man inap long tok olsem, ‘Mi no gat asua [long givim baksait long God], long wanem, mi no bin save long God.’ ”—Rom 1:20.
Yumi mas bilip olsem God i stap, tasol i gat sampela samting moa yumi mas mekim. Pol i tok: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:2) Yumi ken mekim olsem sapos yumi wok strong long stadim Baibel long rot bilong ol buk Kristen, olsem dispela nius. Sapos stretpela save bilong Tok Bilong God em i as bilong bilip, orait dispela kain bilip em i gat strong. Ol man i save long laik bilong God na ol i bilip na bihainim, ol i save mekim wok bilong God.—Rom 12:1.
Ol i Bilip, Maski Ol i No Lukim
Aposel Tomas i hatwok long bilip olsem Jisas i kirap bek pinis long matmat. Tomas i tok: “Sapos mi no lukim mak bilong ol nil ol i bin putim long han bilong em, na sapos mi no putim pinga bilong mi i go long mak bilong ol nil, na sapos mi no putim han bilong mi i go long sait bilong en, orait mi no ken bilip. Nogat tru.” Bihain, taim Jisas i wokim mirakel na kisim skin bilong man i gat mak bilong nil, Tomas i lukim na em i bilip. Tasol Jisas i tok: “Ol man i no lukim mi na ol i bilip, ol dispela man i ken amamas.”—Jon 20:25-29.
Long nau, planti milion Witnes Bilong Jehova ol i ‘bilip tasol na ol i wokabaut.’ (2 Korin 5:7) Maski ai bilong ol i no bin lukim ol dispela mirakel em Baibel i stori long en, ol i bilip strong olsem ol i bin kamap. Ol Witnes i bilip long God na long Tok bilong em. Spirit bilong God i helpim ol na ol inap save long ol tok bilong Baibel na nambawan as tok bilong en—Kingdom long heven bai kamapim klia olsem i stret God Jehova i stap nambawan Bos. (Matyu 6:9, 10; 2 Timoti 3:16, 17) Ol dispela Kristen tru ol i bihainim ol gutpela tok bilong Baibel na dispela i helpim gut ol. (Song 119:105; Aisaia 48:17, 18) Ol i lukim ol samting i kamap na ol i bilip olsem ol tok profet bilong Baibel i makim taim bilong yumi i olsem “taim bilong las de,” na ol i bilip olsem klostu nau God bai kamapim nupela taim em i bin tok promis long kamapim. (2 Timoti 3:1-5; Matyu 24:3-14; 2 Pita 3:13) Ol i amamas long helpim ol narapela long kisim save long God. (Sindaun 2:1-5) Ol i save, ol man i wok long painim God ol inap painim em long rot bilong Baibel tasol.—Aposel 17:26, 27.
Tingim gen Albert, em yumi bin stori long em long stori i kamap paslain long dispela. Sampela de bihain long em i beten askim God long kamapim wanpela mirakel, tasol mirakel i no kamap, wanpela Witnes Bilong Jehova i kam lukim em, em wanpela lapun meri na em i lusim sampela buk na nius bilong Baibel long em. Bihain Albert i orait long wanpela Witnes i stadi Baibel wantaim em, no gat pe. Taim em i wok long kisim save long ol tok bilong Baibel, bel bilong em i kirap tru—em i no bel hevi moa. Em i save olsem em i painim God pinis.
Baibel i kirapim yumi olsem: “Bikpela i stap klostu long yupela na i wetim yupela, olsem na nau em i taim bilong yupela i mas beten long em na i go klostu long em.” (Aisaia 55:6) Yu inap mekim dispela samting, tasol i no long rot bilong wetim God i kamapim wanpela mirakel, nogat—bilong mekim olsem, yu mas kisim stretpela save long Tok Bilong God. Em wanpela bikpela samting yu mas mekim, long wanem, ol mirakel tasol i no inap kirapim ol man long bilip.
[Piksa long pes 5]
Lasarus i kirap bek long rot bilong mirakel, tasol dispela i no kirapim ol birua bilong Jisas long bilip
[Ol Piksa long pes 7]
As bilong bilip, em stretpela save bilong Baibel