Ol Mirakel—Ol i Kamap Tru o Ol i Stori Nating Tasol?

WANPELA man i lukim rait ol i bin pasim long baksait bilong wanpela ka, i tok: “Ol Mirakel i Save Kamap Tru​—⁠Askim Ol Ensel.” Tru dispela man i lotuman, tasol em i no kliagut long dispela tok i makim wanem samting. Em i tingting: Dispela tok i makim olsem draiva i save bilip long ol mirakel? O draiva i laik tok pilai long dispela samting, olsem em i no bilip long ol mirakel na ol ensel tu?

Yumi ken tingim tok bilong wanpela man bilong raitim buk, em Manfred Barthel bilong Jemani, em i tok: “Taim ol man i ritim dispela tok mirakel, ol i bruk long tupela tingting.” Ol man i bilip long ol mirakel ol i bilip olsem ol i save kamap tru tru na ol i save kamap planti taim.a Olsem: Wanpela ripot long kantri Grik i tok, nau long dispela taim ol bilipman i tok ol mirakel i save kamap wanpela taim samting long olgeta mun. Dispela tok i mekim na wanpela bisop bilong Misin Grik Otodoks i toksave olsem: “Ol bilipman i save tingim God na Maria na ol santuman olsem ol i gat pasin olsem man bilong graun. Ol bilipman i no ken bilasim tumas ol stori bilong dispela samting.”

Long sampela kantri, i no planti man i save bilip long ol mirakel. Ripot bilong wanpela lain (Allensbach) i bin skelim tingting bilong ol man long ol mirakel na em i kamap long wanpela nius long Jemani long 2002, em i tok olsem inap 71 pesen bilong ol Jemani ol i ting ol mirakel em ol stori nating tasol na i no bin kamap tru tru. Tasol namel long 29 pesen i save bilip long ol mirakel, i gat 3-pela meri i tok ol i bin kisim wanpela tok long Virgo Maria. Sampela mun bihain long taim ol i tok Maria i bin kamap long ol​—⁠wantaim ol ensel na wanpela pisin balus​—⁠nius Westfalenpost bilong Jemani i tok: “I kam inap nau, i gat olsem 50,000 manmeri, em sampela i save kam bilong painim rot bilong oraitim sik bilong ol, na sampela i kam bilong lukim tasol, tingting bilong ol i kirap tru long samting olsem piksa em 3-pela meri i bin lukim.” Ol i ting inap 10,000 moa bai kam long dispela liklik ples bilong lukim Maria sapos em i kamap gen long ol. Na i gat sampela stori olsem Virgo Maria i bin kamap long sampela lain long Lourdes, Frans, long 1858, na long Fátima, Potugal, long 1917.

Olsem Wanem Long Ol Lotu i No Kristen?

Klostu olgeta lotu i save bilip long ol mirakel. Wanpela buk dikseneri bilong lotu (The Encyclopedia of Religion) i tok, ol lain i kamapim lotu Buda, lotu Kristen, na lotu Islam ol i gat kain kain tingting long ol mirakel, tasol buk i tok: “Ol samting i bin kamap insait long ol dispela lotu i kam inap nau i kamapim klia tru olsem, kirap long bipo yet ol stori bilong ol mirakel i insait tru long bilip bilong ol man.” Na buk i tok “sampela taim Buda yet i bin wokim ol mirakel.” Bihain, taim lotu Buda i kamap long Saina, “planti taim ol misineri bilong en i save kamapim strong bilong ol long wokim ol mirakel.”

Dispela buk i stori long sampela mirakel ol man i tok i bin kamap, na bihain buk i tok: “Ating sampela man i no laik bilip long olgeta stori bilong ol mirakel em ol lotuman i bin stori long en, tasol ating ol dispela lotuman i gat gutpela tingting​—⁠ol i laik givim biknem long Buda, em inap givim strong long lain bilong em long bipo long wokim ol mirakel.” Na buk i stori long lotu Islam olsem: “Klostu olgeta manmeri bilong lotu Islam ol i bilip na wet yet long ol mirakel bai kamap. Tok bilong ol tumbuna i tok, planti taim Mohamet i bin wokim ol mirakel long ai bilong ol man. . . . Na ol man i bilip olsem, bihain long taim ol santuman i dai pinis, ol i save wokim ol mirakel long ples matmat bilong ol bilong helpim ol bilipman, na taim ol bilipman i beten long God, ol i save askim ol santuman long helpim ol.”

Ol Mirakel Insait Long Lotu Kristen

Planti manmeri i bin kisim lotu Kristen ol i bruk long tupela kain tingting. Sampela i bilip long ol mirakel em Baibel i tok Jisas Krais o ol wokman bilong God paslain long taim bilong ol Kristen ol i bin wokim. Tasol planti ol i wanbel long tok bilong Martin Luther, em i bin kamapim lotu Talatala. Buk The Encyclopedia of Religion i tok long em olsem: “Luther na Calvin wantaim i bin tok, taim bilong wokim ol mirakel i pinis, na ol man i no ken wetim sampela mirakel moa i kamap.” Na buk i tok Misin Katolik i holim strong bilip bilong en long ol mirakel, “tasol em i no laik sambai long dispela bilip na tokaut gut long olsem wanem ol mirakel i bin kamap.” Tasol buk i tok, “ol Talatala i bin kisim bikpela skul ol i bilip olsem pasin bilong bihainim lotu Kristen em samting bilong bel bilong man yet, na God o ol lain i stap long ples bilong ol spirit ol i no bin givim tok o mekim sampela samting tru long ol man bilong graun bilong stiaim o helpim ol.”

Sampela man i tok ol i Kristen​—⁠na sampela pris pasto tu​—⁠ol i no bilip tumas olsem ol mirakel em Baibel i stori long en i bin kamap tru tru. Yumi ken tingim stori bilong wanpela liklik diwai i paia nating, em Kisim Bek 3:​1-5 i stori long en. Buk What the Bible Really Says i tok, planti tisa bilong lotu long Jemani ol i no bilip olsem dispela samting i bin kamap olsem mirakel. Ol i tok, em i ‘makim bel bilong Moses i gat tok na i givim pen long em olsem nil i sutim em na paia i kukim em.’ Na buk i tok moa: ‘Dispela paia inap makim ol plaua i op hariap long taim san i lait, em i makim olsem God i stap.’

Ating tok bilong ol i no stret long yu. Olsem na yu mas bilip olsem wanem long ol mirakel? I stret yumi bilip olsem i gat ol mirakel i bin kamap bipo? Na olsem wanem long ol mirakel bilong nau? Yumi no inap askim ol ensel, so yumi ken askim husat?

Baibel i Tok Wanem?

Baibel i tok, long bipo yet, sampela taim God i bin mekim sampela samting ol man bilong graun i no inap tru long mekim. Baibel i tok long em olsem: “Long bikpela strong bilong yu, yu bin wokim ol mirakel na mekim planti kain bikpela samting bilong mekim ol Isip i pret nogut tru. Na long dispela pasin yu bin kisim mipela Israel, ol lain bilong yu, long Isip na bringim mipela i kam.” (Jeremaia 32:21) Tingim dispela samting: Nambawan strongpela kantri long dispela taim bipo i pundaun olgeta long rot bilong tenpela samting nogut God i bin salim i kam, na wanpela bilong ol, em ol namba wan pikinini bilong ol Isip ol i dai. Ol dispela samting nogut em ol mirakel tru tru!​—⁠Kisim Bek, sapta 7 i go 14.

Planti handet yia bihain, ol man bilong raitim 4-pela Gutnius ol i stori long 35 mirakel Jisas i bin wokim. Na tok bilong ol i makim olsem em i bin wokim planti mirakel moa em ol i no bin raitim stori bilong ol. Orait yumi laik save, stori bilong ol dispela mirakel ol i raitim, ol i bin kamap tru tru o ol i stori nating tasol?b​—⁠Matyu 9:35; Luk 9:⁠11.

Sapos tru Baibel em i tok tru bilong God olsem Baibel yet i tokaut long en, orait i gat as tru na yu inap bilip long ol mirakel Baibel i stori long en. Baibel i tokaut klia olsem ol mirakel long bipo i bin kamap tru​—⁠olsem ol mirakel bilong oraitim sik, na kirapim bek ol man i dai pinis, na ol kain samting olsem​—⁠tasol Baibel i tokaut klia tu olsem ol kain mirakel olsem i no save kamap moa. (Lukim blok: “As na Sampela Kain Mirakel i No Save Kamap Moa,” long pes 4.) Orait yu ting dispela i makim olsem ol man i bilip olsem tok bilong Baibel i tru, ol i no bilip olsem ol mirakel i save kamap long nau? Yumi larim stori i kamap bihain i bekim dispela askim.

[Ol Futnot]

[Blok long pes 4]

AS NA SAMPELA KAIN MIRAKEL I NO SAVE KAMAP MOA

Baibel i stori long kain kain mirakel. (Kisim Bek 7:​19-​21; 1 King 17:​1-7; 18:​22-​38; 2 King 5:​1-​14; Matyu 8:​24-​27; Luk 17:​11-​19; Jon 2:​1-​11; 9:​1-7) Planti bilong ol dispela mirakel i bilong helpim ol man long luksave olsem Jisas em Mesaia, na ol i kamapim klia olsem God i helpim em. Ol disaipel bilong Jisas bilong pastaim ol i bin kisim presen bilong wokim ol mirakel, olsem mekim kain kain tok ples na save long as bilong ol tok em holi spirit i kamapim. (Aposel 2:​5-12; 1 Korin 12:​28-31) Ol dispela kain mirakel i bin mekim gutpela wok bilong helpim kongrigesen Kristen long taim em i nupela yet. Em i helpim kongrigesen olsem wanem?

Long dispela taim bipo, i no gat planti Baibel i stap. Ol maniman tasol i gat sampela buk samting. Long ol kantri haiden ol man i no gat save long Baibel o long Man i bin kamapim Baibel, em Jehova. Bilong skulim ol man long ol bilip na tok Kristen, ol i mas mekim long maus tasol. Ol presen bilong wokim ol mirakel i gutpela bilong soim olsem God i mekim wok long kongrigesen Kristen.

Tasol Pol i tok, taim i no gat wok moa long ol dispela mirakel, ol bai i pinis. “Wok bilong autim tok bilong God olsem profet, em bai i pinis. Na ol kain kain tok ples bai i pinis. Na olgeta kain save bilong ol man, em tu bai i pinis. Nau yumi gat hap hap save tasol long ol samting. Na tu, yumi save autim ol hap hap tok profet tasol. Tasol bihain samting tru bai i kamap, na long dispela taim olgeta dispela hap hap samting nau yumi save long en, ol bai i pinis.”​—⁠1 Korin 13:​8-10.

Long nau ol man inap kisim Baibel na olkain buk dikseneri bilong Baibel. Winim 6 milion Kristen i lain pinis na ol i wok long helpim ol man long kisim save long God olsem i stap long Baibel. Olsem na long nau i no gat wok moa long ol mirakel bilong kamapim long ol man olsem Jisas Krais em Man God i bin makim bilong kisim bek ol man o bilong kamapim long ples klia olsem Jehova i helpim ol wokman bilong em.