Ol Mirakel Bilong Jisas—Ol i Bin Kamap Tru o Nogat?
“OL I bringim planti manmeri i gat spirit nogut i stap long ol, na ol i kam long Jisas. Na em i tok na ol spirit nogut i lusim ol dispela manmeri. Na em i mekim orait olgeta sikman.” (Matyu 8:16) “Jisas i kirap, na i krosim win, na i tokim wara olsem, ‘Inap nau. Yu pinis! Yu dai nau!’ Na win i dai, na wara i no mekim nais liklik.” (Mak 4:39) Yu gat wanem tingting long ol dispela tok? Yu bilip olsem ol i stori long ol samting i bin kamap tru tru long bipo? O yu ting ol i stori nating o ol i olsem tok piksa tasol?
Planti man long nau ol i no bilip olsem ol mirakel bilong Jisas i bin kamap tru long bipo. Long nau i gat ol teleskop bilong lukluk i go longwe, na ol maikroskop bilong lukim ol liklik samting tru, na ol roket bilong raun long ples antap, na ol saientis i mekim ol kain kain nupela wok, olsem na taim i gat stori long samting olsem mirakel o strongpela wok bilong God i kamap, ol man i no bilip long en.
Sampela i ting, stori bilong ol mirakel i kamap em ol stori nating tasol o i olsem tok bokis. Wanpela man i raitim buk we em i tok dispela buk i stori gut long Jisas “tru tru,” em i tok ol stori bilong ol mirakel bilong Jisas i bilong grisim planti man long go insait long lotu Kristen.
Na sampela i ting ol mirakel bilong Jisas i giaman tasol. Na sampela i sutim tok long Jisas yet olsem em i bin giamanim ol man. Justin Martyr, em i bin stap inap 100 yia samting bihain long Krais, em i tok, “ol man bilong sutim tok long Jisas ol i kolim em olsem man bilong wokim trik na man bilong giamanim ol man.” Sampela i tok, Jisas i “no bin wokim ol mirakel bilong em olsem wanpela profet Juda—em i mekim dispela wok olsem wanpela man bilong wokim trik, olsem man i bin kisim skul long ol tempel bilong ol haiden.”
Dispela Tok “i No Inap Tru”
Ating yu tingting olsem, i gat as na ol dispela man i no bilip tumas long ol mirakel. Ol i ting i no inap tru long bilip olsem i gat sampela strong i no bilong graun na dispela inap mekim na ol mirakel i kamap. Wanpela yangpela man i tok em i no bilip tru long God, em i tok: “I no gat mirakel i save kamap.” Orait nau em i kamapim tok bilong David Hume bilong Skotlan, em i bin stap olsem 200 yia i go pinis, em i bin tok: “Mirakel i no stret wantaim ol lo i bosim ol samting bilong graun.”
Tasol planti man bai tingting gut na i no tokaut kwik olsem wanpela samting i narapela kain em i no inap tru long kamap. Buk The World Book Encyclopedia i kolim ol mirakel olsem “wanpela samting i bin kamap na i olsem em i narapela kain long ol lo i bosim ol samting bilong graun.” Long tingting bilong planti man inap wan handet yia i go pinis, ol nupela kain balus i save raun long ples antap tru, na ol wailis bilong salim tok i go longwe, na ol roket samting, ol i olsem ol mirakel i kamap. Olsem na em i no savepasin sapos yumi tok ol mirakel i no inap kamap tru, long wanem, ol i narapela kain long ol save nau yumi holim.
Sapos yumi skelim sampela mirakel ol i tok Jisas Krais i bin wokim na Baibel i stori long en, dispela bai kamapim klia wanem samting? Ol mirakel bilong Jisas i bin kamap tru o ol i stori nating tasol?