Ol Mirakel Bilong Jisas—Ol i Bin Kamap Tru o i Stori Nating?
“Klostu tulait Jisas i wokabaut antap long raunwara na i kamap long ol disaipel.”—Matyu 14:25.
INAP planti milion manmeri long olgeta hap ol i bilip tru long ol mirakel bilong Jisas; ol i ting dispela bilip i bikpela samting, olsem yumi bilip long God yet. Ol man bilong raitim Gutnius—em Matyu, Mak, Luk, Jon—ol i stori long 35 mirakel bilong Jisas. Tasol tok bilong ol i makim olsem Jisas i bin wokim planti mirakel moa.—Matyu 9:35; Luk 9:11.
Jisas i no bin wokim ol dispela mirakel bilong amamasim ol man, nogat. Ol i kamapim long ples klia olsem Jisas i Pikinini bilong God, em dispela Mesaia ol Israel i bin wet longtaim long em. (Jon 14:11) Taim Moses i kam long ol Israel bilong kisim bek ol long kalabus, em i bin wokim sampela mirakel olsem mak. (Kisim Bek 4:1-9) Orait, Moses i olsem piksa na i makim Mesaia, tasol Mesaia i winim Moses, olsem na em i mas wokim sampela mirakel bilong kamapim klia olsem God i stap wantaim em. (Lo 18:15) Long dispela as Baibel i kolim Jisas olsem man ‘God i bin wokim mirakel namel long ol Juda long han bilong em.’—Aposel 2:22.
Bipo ol man i save bilip tru long tok bilong Baibel olsem Jisas em i man bilong wokim ol mirakel. Tasol nau sampela man i no bilip long ol dispela stori bilong 4-pela Gutnius na ol i skelim skelim ol dispela mirakel. Buk bilong Lloyd Graham (Deceptions and Myths of the Bible) i toktok long stori bilong Baibel long Jisas i bin wokabaut antap long wara, na buk i tok: “Ol man i no gat save, ol tasol i bilip olsem dispela samting i bin kamap tru, tasol planti milion man ol i bilip olsem. Em nau, yumi no ken tingting planti na ting, bilong wanem pasin bilong graun i go nogut. Taim ol man i gat tingting longlong olsem na ol i no gat save, ol samting i no inap kamap gutpela long graun.”
I No Inap Kamap?
Tasol dispela kain tok i save skelim skelim ol samting na mekim olsem ol i no tru, em i no stret. Wanpela bikpela buk (The World Book Encyclopedia) i tok, mirakel em ‘wanpela samting i kamap na taim ol man i skelim wantaim ol lo bilong bosim ol samting bilong graun olsem ol i bin kisim save long en, ol i no inap painim as bilong en.’ Orait, sapos wan handet yia bipo ol man i bin lukim televisen i gat kala kala, o telefon ol inap mekim wok long en taim ol i raun long ka, o liklik kompyuta laptop, ol bai ting em i wanpela mirakel! Olsem na yu ting man i bihainim gutpela tingting taim em i tok, samting i no bin kamap long wanpela strong ol saveman i kisim save pinis long en, em i no inap kamap tru?
Tingim narapela samting: Long tok Grik ol i bin raitim “Nupela Testamen” long en long pastaim, ol i bin kolim dispela tok “mirakel” olsem dyʹna·mis—insait bilong en i olsem “strong.” Ol i kolim tu olsem “ol strongpela wok,” na “pasin na strong.” (Luk 6:19; Aposel 2:22; Matyu 25:15) Baibel i tokaut olsem ol mirakel bilong Jisas i kamap long “bikpela strong bilong God.” (Luk 9:43) Yu ting wanpela God “i gat olgeta strong” em i no inap mekim kain wok olsem long bikpela strong bilong em?—Aisaia 40:26.
Samting i Makim Olsem Yumi Inap Bilip Long En
Taim yumi skelim gut ol tok bilong 4-pela Gutnius, yumi lukim olsem yumi inap bilip tru long ol dispela tok. Wanpela samting i olsem: Ol dispela stori i narapela kain long ol stori nating bilong ol man na stori bilong ol tumbuna. Tingim ol stori giaman ol i bin mekim long Jisas bihain long taim em i dai. Wanpela rait nating ol i kolim “Gutnius Bilong Tomas” i tok: “Taim dispela manki Jisas i gat 5-pela krismas . . . em i raun insait long ples na wanpela manki i ran i kam na bamim sol bilong em. Jisas i belhat na i tokim em: ‘Bai yu no inap wokabaut i go moa’; orait wantu manki i pundaun na em i dai.” I no hatwok long yumi save, dispela stori em i wanpela stori nating tasol. Na dispela manki nogut bilong belhat, em i no wankain liklik olsem dispela Jisas Baibel i stori long em.—Skelim wantaim Luk 2:51, 52.
Orait nau tingim ol stori bilong 4-pela Gutnius, em ol tok i tru. Ol man bilong raitim ol i no pulim sampela hap tok giaman i kam insait long ol dispela stori. Jisas i bin wokim ol mirakel bilong helpim ol man i gat hevi na ol i stap nogut; em i no mekim bilong inapim sampela laik bilong em. (Mak 10:46-52) Jisas i no bin mekim wok long strong bilong em bilong helpim em yet. (Matyu 4:2-4) Na em i no mekim bambai em i ken hambak long strong bilong em. Taim King Herot i tokim Jisas long wokim wanpela mirakel long ai bilong em, “Jisas i no bekim wanpela tok long em.”—Luk 23:8, 9.
Ol mirakel bilong Jisas i narapela kain long wok bilong ol man bilong wokim trik na majik na ol man bilong oraitim sik long rot bilong bilip. Long olgeta taim ol strongpela wok bilong Jisas i litimapim nem bilong God. (Jon 9:3; 11:1-4) Taim em i wokim ol mirakel, em i no save singaut bikmaus na paitim han samting, o mekim sampela tok o singsing bilong majik olsem marilaim ol, o mekim ol samting bilong pulim ai bilong ol man, o mekim olkain trik bilong giamanim ol. Wanpela taim Jisas i bungim wanpela aipas nem bilong em Bartimeus, em i save singaut long mani. Em i krai long Jisas olsem: “Tisa, mi laik lukluk.” Orait Jisas i givim liklik tok tasol long em, olsem: “ ‘Yu ken i go. Bilip bilong yu i bin mekim yu i orait.’ Na wantu tasol ai bilong en i orait na em i lukluk.”—Mak 10:46-52.
Na ol stori bilong 4-pela Gutnius i kamapim klia olsem taim Jisas i mekim ol strongpela wok, em i no wokim wanpela ples bilong sanap long en na i gat ol kain kain bilas na ol lait samting bilong trikim ol man. Em i mekim long ples klia, na planti taim i gat bikpela lain tru ol i lukim. (Mak 5:24-29; Luk 7:11-15) Long olgeta taim em inap oraitim tru sik bilong ol man—em i no olsem ol man i traim long oraitim sik long rot bilong bilip, na taim ol i no inap mekim ol i tok, dispela man i no gat bilip. Matyu 8:16 i tok: “Em i mekim orait olgeta sikman.”
Buk bilong Saveman Arthur Pierson (“Many Infallible Proofs:” The Evidences of Christianity) i tok long ol mirakel bilong Krais olsem: “Em i oraitim sik bilong planti man, na em i mekim wantu tasol, na em i oraitim ol tru, na em i kirapim bek ol man i dai pinis, na i no gat wanpela taim em i no inap mekim; olsem na ol dispela mirakel bilong em i narapela kain tru long ol mirakel giaman ol man bilong nau na bilong bipo tu ol i bin wokim.”
Tok Bilong Sampela Man
Pierson i kolim narapela samting i helpim ol stori bilong Jisas long 4-pela Gutnius. Em i tok: “Ol Juda i bin biruaim em ol i no bin tok, em i no bin wokim ol mirakel, na dispela i bikpela samting bilong makim olsem ol dispela mirakel Baibel i stori long en ol i bin kamap tru.” I gat planti samting i kirapim ol bikman Juda na ol i laik daunim ol wok bilong Jisas. Tasol planti man tru ol i save long ol mirakel bilong em, olsem na ol dispela birua i no inap tok em i no bin mekim. Ol i gat wanpela rot tasol: Ol i tok em i mekim long strong bilong Satan. (Matyu 12:22-24) Sampela handet yia bihain long taim Jisas i dai, ol man bilong raitim stori bilong ol Juda (Talmud), ol i stori long strong bilong Jisas long wokim ol mirakel. Narapela buk i stori long tingting bilong ol Juda long Jisas (Jewish Expressions on Jesus) i daunim em na i tok, em i man bilong ‘wokim majik.’ Em nau, dispela tok bilong ol i soim yumi, ol i no gat rot bilong daunim tru ol mirakel bilong Jisas na tok ol i stori nating tasol.
Narapela samting i helpim tok bilong Baibel i stori long ol mirakel bilong Jisas, em buk bilong Yusibias (The History of the Church From Christ to Constantine). Em i kamapim tok bilong wanpela man nem bilong em Kwodratus, em i laik helpim lotu Kristen na em i salim pas long king. Kwodratus i tok: ‘Long olgeta taim ol man inap lukim ol wok bilong Man Bilong Kisim Bek Ol Man, long wanem, ol dispela wok i no giaman—ol man em i bin oraitim ol, na ol man em i bin kirapim bek ol, em ol i no orait inap sotpela taim tasol—ol man inap lukim ol long olgeta taim, olsem long taim Man Bilong Kisim Bek Ol Man em i stap namel long yumi, na planti yia bihain long taim em i lusim yumi; na sampela i stap inap long taim bilong mi yet.’ Saveman William Barclay i tok: “Kwodratus i tok, i kam inap long taim bilong em yet, i gat sampela man i stap yet em Jisas i bin wokim mirakel long ol. Sapos dispela tok i giaman, orait gavman bilong Rom bai amamas long tokaut olsem ol dispela mirakel i giaman tasol.”
Ol samting i kamapim long ples klia olsem yumi inap bilip tru long ol mirakel bilong Jisas. Tasol yumi no ken ting, ol dispela mirakel bilong Jisas i samting bilong bipo tasol. Hibru 13:8 i tok: “Pasin bilong Jisas Krais i save stap wankain tasol long asde na long nau tu na long olgeta taim bihain.” Tru tumas, nau em i stap laip long heven, na em inap mekim wok long strong bilong em bilong kamapim ol bikpela mirakel moa yet, winim ol mirakel em i bin wokim taim em i stap man long graun. Na tu, stori bilong ol mirakel bilong em long 4-pela Gutnius (1) i skulim ol Kristen bilong nau long sampela samting, na (2) i kamapim long ples klia sampela gutpela pasin tru bilong Jisas, na (3) i makim wanpela taim klostu bai kamap, na ol bikpela samting moa yet bai kamap!
Dispela 3-pela samting bai kamap ples klia long stori i kamap bihain long dispela, i toktok long 3-pela stori bilong Baibel em planti man i save long en.