Ol Mirakel Bilong Jisas—Yu Inap Kisim Wanem Save Long En?

ATING bai yu kirap nogut long save olsem ol stori bilong Baibel long i stap bilong Jisas long graun i no save kamapim tok Grik bilong dispela tok “mirakel.” Tok Grik (dyʹna·mis) em sampela taim ol i tanim olsem “mirakel,” insait bilong en i olsem “strong.” (Luk 8:46) Ol i save tanim tu olsem “ol strongpela wok.” (Aposel 2:22) Wanpela saveman i tok, dispela tok Grik i “makim strongpela wok Jisas i bin mekim, na bikpela strong i bin kamapim dispela wok. Ol i kolim dispela samting tu olsem strong bilong God i mekim wok.”

Narapela tok Grik (teʹras), sampela taim ol i tanim olsem “narakain samting” o “mirakel.” (Jon 4:48; Aposel 2:19) Dispela tok i kamapim klia samting dispela mirakel i mekim long ol man. Planti taim ol manmeri na ol disaipel tu i kirap nogut long ol strongpela wok bilong Jisas.​—⁠Mak 2:12; 4:41; 6:51; Luk 9:⁠43.

Namba 3 tok Grik (se·meiʹon) i tok long ol mirakel bilong Jisas, em i olsem wanpela “mak” bilong namba God i bin givim long em. Saveman Robert Deffinbaugh i tok, “dispela tok Grik i toktok long as bilong dispela mirakel.” Em i tok moa: “Mak i olsem wanpela mirakel i kamapim wanpela tok tru i stori long Bikpela bilong yumi Jisas.”

Ol Trik Tasol o Strong God i Givim Em?

Baibel i no stori olsem ol mirakel bilong Jisas em ol trik tasol em i bin wokim bilong amamasim ol man. Ol dispela mirakel i kamapim “bikpela strong bilong God,” olsem long taim Jisas i rausim spirit nogut i bin stap long wanpela mangi. (Luk 9:​37-43) Yu ting God i Gat Olgeta Strong em i no inap mekim ol strongpela wok olsem? (Aisaia 40:26) Yumi save, em inap tru!

Ol fopela Gutnius i stori long 35 mirakel bilong Jisas. Tasol Baibel i no kolim hamas mirakel olgeta Jisas i bin wokim. Olsem: Matyu 14:14 i tok: “Em [Jisas] i lukim bikpela lain manmeri i stap. Na em i sori long ol, na i mekim orait ol sikman bilong ol.” Baibel i no kolim hamas sikman Jisas i bin oraitim ol long dispela taim.

Ol dispela strongpela wok i stret tru wantaim tok bilong Jisas olsem em i Pikinini Bilong God, em Mesaia God i bin tok promis long salim i kam. Baibel i soim yumi tru olsem God i bin givim strong long Jisas na em inap wokim ol mirakel. Aposel Pita i stori long Jisas na i tok: “Yupela yet i save long ol strongpela wok na ol kain kain mirakel God i bin wokim namel long yupela long han bilong dispela man.” (Aposel 2:22) Long narapela taim, Pita i tokaut olsem: “Yupela i save, God i bin makim Jisas bilong Nasaret, na givim Holi Spirit na bikpela strong long em. Na Jisas i go long ol ples nabaut na i helpim ol manmeri. God i stap wantaim em na em i mekim orait gen olgeta man Satan i bin bagarapim ol.”​—⁠Aposel 10:​37, 38.

Ol mirakel bilong Jisas i poroman wantaim tok em i bin autim. Mak 1:​21-27 i kamapim tingting bilong ol manmeri long ol tok bilong Jisas na long wanpela mirakel em i bin wokim. Mak 1:22 i tok, ol bikpela lain manmeri “i harim tok bilong em, na ol i kirap nogut tru,” na ves 27 i tok, olgeta manmeri “i kirap nogut” taim Jisas i rausim spirit nogut i stap long wanpela man. Ol strongpela wok bilong Jisas wantaim ol tok em i autim, dispela i kamapim klia olsem em i Mesaia God i bin promis long salim i kam.

Jisas i no tok tasol olsem em i Mesaia, nogat. Ol tok na ol narapela samting em i bin mekim, na strong bilong God i kamap ples klia long ol mirakel bilong em, ol dispela samting i kamapim klia olsem em i Mesaia tru. Taim ol i sutim askim long Jisas long wok na namba bilong em, em i tokaut strong olsem: “Samting i winim Jon, em i tokaut long mi nau. Em dispela olgeta wok Papa i bin givim long mi bilong mekim na pinisim. Ol dispela wok mi save mekim i tokaut gut long ol manmeri olsem, Papa i bin salim mi na mi kam.”​—⁠Jon 5:⁠36.

Ol Mak i Strongim Dispela Tok

Olsem wanem yumi inap bilip olsem ol mirakel bilong Jisas i bin kamap tru? Orait yumi ken tingim sampela mak i soim olsem ol i bin kamap tru.

Taim Jisas i mekim ol strongpela wok bilong em, em i no laik kisim biknem long dispela wok. Oltaim em i mekim na bai God yet i kisim biknem long en. Taim Jisas i laik mekim orait wanpela man aipas, pastaim em i tokaut olsem em bai oraitim dispela man na “bai ol manmeri i ken lukim samting i kamap long dispela man, na wok bilong God i ken kamap ples klia long ol.”​—⁠Jon 9:​1-3; 11:​1-4.

Jisas i no olsem ol man bilong wokim olkain pasin giaman, na trik, na oraitim sik long rot bilong bilip, nogat. Em i no wokim olkain marila o trik o ol narakain samting, o ol pasin i kirapim nating bel bilong ol man. Em i no mekim wok long ol bilip giaman bilong ol tumbuna o long bun bilong ol santu samting. Tingim pasin Jisas i mekim taim em i oraitim tupela man aipas. Baibel i tok: “Jisas i sori long tupela, na em i putim han long ai bilong tupela, na wantu tasol ai bilong tupela i orait na tupela i lukluk gen. Na tupela i bihainim Jisas i go.” (Matyu 20:​29-34) Jisas i no mekim sampela pasin bilong lotu o bilaspasin samting bilong pulim ai bilong ol man. Em i wokim ol mirakel long ples klia long ai bilong planti manmeri. Em i no putim ol kain kain lait o sanap long pletfom i gat ol kain kain lait na bilas samting. Tasol ol mirakel ol man bilong nau i tok ol i wokim, man i no inap raitim klia stori bilong ol samting ol i bin mekim bilong kamapim dispela mirakel.​—⁠Mak 5:​24-29; Luk 7:​11-15.

Ol man Jisas i bin wokim mirakel na oraitim ol, sampela taim em i tokaut olsem ol i man bilong bilip. Tasol maski man i no bilip, dispela i no pasim Jisas long wokim mirakel. Taim em i stap long Kaperneam long Galili, “ol i bringim planti manmeri i gat spirit nogut i stap long ol, na ol i kam long Jisas. Na em i tok na ol spirit nogut i lusim ol dispela manmeri. Na em i mekim orait olgeta sikman.”​—⁠Matyu 8:⁠16.

Jisas i bin wokim ol mirakel bilong helpim ol man i gat ol kain kain bagarap long skin​—⁠em i no mekim bambai ol man i ken lukim na kirap nogut long en, nogat. (Mak 10:​46-52; Luk 23:⁠8) Na Jisas i no bin wokim ol mirakel bilong kisim mani long en.​—⁠Matyu 4:​2-4; 10:⁠8.

Olsem Wanem Long Stori Bilong Ol Gutnius?

Ol stori tru tru bilong ol mirakel Jisas i bin wokim, ol i kamap long yumi long rot bilong 4-pela Gutnius. Olsem wanem? I gat as na yumi ken bilip long ol dispela stori taim yumi skelim ol mirakel ol i tok Jisas i bin wokim, olsem ol i bin kamap tru o nogat? Yes, i gat as na yumi ken bilip long en.

Olsem yumi tok pinis, Jisas i bin wokim ol mirakel long ai bilong planti manmeri. Long taim ol man i kirap raitim ol Gutnius, ol i bin raitim taim planti bilong ol dispela manmeri i stap yet, em ol i bin lukim ol dispela mirakel long ai bilong ol yet. Buk The Miracles and the Resurrection i stori long ol man bilong raitim ol Gutnius, em ol i raitim ol tok tru tasol na ol i no giaman. Buk i tok: “I no stret liklik sapos yumi sutim tok long ol man bilong raitim gutnius olsem ol i laik haitim ol samting tru tru i bin kamap na ol i kamapim planti stori nating bilong ol mirakel bilong grisim planti man long bihainim bilip bilong ol. . . . Ol i laik raitim stret ol samting i bin kamap.”

Ol Juda i birua long lotu Kristen ol i no tok olsem ol dispela strongpela wok ol Gutnius i stori long en i no bin kamap tru. Ol i sutim tok tasol long strong Jisas i bin wokim ol dispela mirakel long en. (Mak 3:​22-26) Na ol narapela birua long bihain tu ol i no inap tok ol mirakel bilong Jisas i no bin kamap tru. Long taim bilong ol aposel na bihain liklik long en, i gat ol rait bilong ol samting i bin kamap bipo na i stori long ol mirakel Jisas i bin wokim. Olsem na i gat as tru na yumi ken bilip olsem ol stori bilong ol mirakel bilong Jisas i stap long ol Gutnius ol i bin kamap tru tru.

Man i Bin Wokim Ol Dispela Mirakel

Bilong skelim gut ol mirakel bilong Jisas, yumi no ken skelim ol tok tasol, olsem ol i bin kamap tru o nogat. Taim ol Gutnius i stori long ol strongpela wok bilong Jisas, ol i kamapim pasin bilong em, olsem em i man bilong pilim tru hevi bilong ol man na man bilong bel sori tru, na em i gat bikpela laik tru long helpim ol man.

Yumi ken tingim wanpela man i gat sik lepra, em i kam long Jisas na i krai long em: “Sapos yu laik, yu inap long mekim mi i kamap klin long ai bilong God.” Orait Jisas i putim han long lepraman na i tok: “Mi laik. Yu kamap klin.” Em nau, wantu sik lepra bilong dispela man i pinis. (Mak 1:​40-42) Long dispela rot Jisas i kamapim long ples klia pasin sori i save kirapim em long wokim ol mirakel long strong God i bin givim long em.

Wanem samting i kamap taim Jisas i bungim wanpela lain i karim bodi bilong wanpela yangpela man i dai pinis i kam ausait long taun Nain? Mama bilong en i gat dispela wanpela pikinini man tasol, na man bilong en i dai pinis. Jisas “i sori tru” long meri na em i go klostu na i tokim meri: “Yu no ken krai.” Orait nau Jisas i kirapim bek pikinini bilong em.​—⁠Luk 7:​11-15.

Samting ol dispela mirakel bilong Jisas i skulim yumi long en na i mekim gut bel bilong yumi i olsem: Em i “sori tru” long ol man na em i mekim ol samting bilong helpim ol. Tasol ol dispela mirakel i no samting bilong bipo tasol, nogat. Hibru 13:8 i tok: “Pasin bilong Jisas Krais i save stap wankain tasol long asde na long nau tu na long olgeta taim bihain.” Nau em i stap King long heven na em i redi na em inap tru long mekim wok long strong God i bin givim long em bilong wokim ol mirakel, tasol em bai mekim moa yet, winim tru dispela taim em i bin stap man long graun. Liklik taim nau na Jisas bai mekim wok long dispela strong bambai em i ken oraitim olgeta manmeri i bihainim tok bilong God. Ol Witnes Bilong Jehova bai amamas long helpim yu long kisim sampela save moa long dispela gutpela taim bai kamap bihain.

[Ol Piksa long pes 4, 5]

Ol mirakel bilong Jisas i kamapim klia “bikpela strong bilong God”

[Piksa long pes 7]

Jisas em i man bilong pilim tru hevi bilong ol man