Em i No Les
LONG Oktoba 5, 1995, ol dokta i katim Matt Tapio, em manki i gat 14 krismas, long wanem, wanpela buk i bin kamap long kru bilong em. Em wanpela buk nogut. Em namba wan taim ol dokta i bin katim Matt, tasol insait long 2 na hap yia bihain, ol i mas katim em planti taim. Na bihain long ol dokta i katim em, ol i mas givim kimoterapi na rediesen long em.
Matt i bin sindaun long Misigen, Yunaitet Stets, na long dispela hap em i go long wanpela skul gavman na em i bin go long ol miting Kristen. Taim rot i op em i autim bilip bilong em long ol tisa na ol wanklas, na em i bin autim tok long haus bilong ol man. Planti taim em i mas slip long haus sik—insait long 2 na hap yia paslain long taim em i dai, em i mas stap long haus sik inap 18 mun—tasol em i bin tilim planti handet buk na nius bilong Baibel long ol man em i bungim ol long dispela hap.
Planti taim i olsem Matt i no inap winim sik bilong em, tasol long ol dispela taim em i winim. Wanpela taim sik kain olsem sik epilepsi i painim em taim em i wok long i go long haus sik, na em i no pulim win moa. Tasol ol i mekim wok bilong kirapim em long pulim win gen. Taim Matt i kirap em i krai na em i singaut olsem: “Mi man bilong winim hevi! Mi man bilong winim hevi! Mi no les!” Ol man i tok Matt i bilip strong long God na dispela i mekim na em i bin stap laip longpela taim liklik.
Wanpela bikpela laik bilong Matt i kamap long Janueri 13, 1996, taim em i kisim baptais bilong makim dediket bilong em long God Jehova. Em i kisim baptais long wara bilong wanpela man, long wanem, nogut em i kisim sik. Sampela de bihain, em i stap gen long haus sik na ol dokta i katim em. Long Ogas 1997, Matt i traut i go i go inap sampela wik, tasol dispela i pinis bihain long taim ol dokta i katim em gen.
Maski bikpela sik i painim Matt, em i amamas long olgeta taim na em i mekim pani wantaim ol dokta na nes. Ol i no save bilong wanem em inap amamas olsem. Wanpela dokta i tokim Matt olsem: “Matt, sapos mi gat wankain sik olsem yu, bai mi askim ol nes long pasim laplap i banisim bet bilong mi, na bai mi hait aninit long sitbet na tokim olgeta man long lusim mi.”
Long Februeri 1998, Matt i lusim haus sik na em i go long haus. Em laspela taim em bai mekim olsem. Em i amamas tru long i stap na long kam bek long haus, olsem na taim em i wokabaut i kam insait long haus, em i tok: “Mi amamas tru! Yumi beten.” Em nau, long beten bilong em, em i kamapim amamas bilong em long Jehova. Tupela mun bihain, long Epril 19, sik kensa i winim em na em i dai.
Taim Matt i no dai yet, ol i bin givim sampela askim long em na putim ol dispela tok long kaset, na pilaim kaset long taim bilong wanpela miting long Haus Kingdom bilong ol Witnes Bilong Jehova. Ol i askim Matt olsem: “Yu laik tok wanem long mipela ol lain i gat strongpela skin liklik long wok autim tok bilong mipela na long ol miting Kristen?”
Matt i tok: “Wok strong nau inap long skel bilong yu. . . . Yu no save wanem samting bai kamap. . . . Tasol maski wanem samting i kamap, yu no ken tru lusim wok bilong autim tok bilong Jehova.”