Pas Bilong Ol Man
Yangpela i Gat Sik Kensa Mi gat 18 krismas, na mi laik tok tenkyu long stori bilong Matt Tapio, em yupela i bin kamapim long stori “Em i No Les.” (Novemba 8, 1998) Bilip bilong em, na pasin bilong em long pilim tru ol samting bilong spirit, na pasin bilong em long tingim olsem taim i sot pinis, ol dispela pasin i kirapim tru bel bilong mi. Mi laik tok tenkyu long Matt yet taim em i kirap bek long Paradais.
E. G. G., long Spen
Mi na famili bilong mi i laik tok tenkyu long dispela stori. Mipela i gat ol yangpela pikinini man, olsem na taim mipela i stori wantaim ol long pasin bilong Matt Tapio long sanap strong long bilip, dispela i helpim ol. Dispela stori i helpim mipela long skelim gut wanem ol samting i bikpela samting long mipela wan wan yet, na long famili.
M. F. N. G., long Brasil
Dispela stori i bin strongim tru mipela ol yangpela, long wanem, em i stori long wanpela yangpela i givim bel tru long tokim ol narapela long Jehova na em i no lusim dispela pasin, maski em i gat bikpela sik.
D. M., long Itali
Maski Matt Tapio i kisim sik nogut tru, em i bin taitim bun tru bilong i stap laip bambai em i ken givim biknem long Jehova na mekim wok bilong em. Em i stap olsem gutpela piksa tru bilong yumi ol lain i no gat sik long bihainim pasin bilong em.
D. P., long Pueto Riko
Mi kirap nogut tru long stori bilong Matt, em ol dokta i mas katim em taim em i gat 14 krismas bilong rausim buk nogut long kru bilong em. Laspela tok em i mekim, i olsem: “No ken tru lusim wok bilong autim tok bilong Jehova.” Dispela tok i strongim mi long no ken lusim wok na i helpim mi long save em i bikpela samting long stadi long ol tok bilong Baibel na kisim stretpela save i bringim man long laip!
D. V., long Filipin
Sik AIDS Mi laik tok tenkyu tru long stori, “AIDS—Bai Ol Inap Daunim Tru?” (Novemba 8, 1998) I gat ol gutpela tok i stap insait long en. Mi gat 19 krismas, na long skul na long haus mi bin kisim planti save long sik AIDS na binatang jem HIV, tasol mi bin paul yet long sampela samting. Dispela stori i helpim mi long pilim tru olsem em i bikpela samting long mi mas bihainim gutpela tingting long makim wanpela poroman marit, na mi mas bihainim pasin i stret.
S. T., long Amerika
Ol dispela stori bilong yupela i givim gutpela save, na i stret, na i kamapim tok tru. Inap 10-pela yia nau mi gat sik AIDS. Wanpela pren bilong mi i wok long skulim mi long ol tok bilong Baibel long rot bilong ol buk na nius samting bilong yupela. Tenkyu long yupela i no surik long kamapim ol dispela kain stori.
B. W., long Amerika
Mi no bin lusim nius Kirap! inap long mi kaunim pinis ol stori bilong sik AIDS. Mi no bin kaunim wanpela stori i kamapim stret ol stori bilong sik AIDS olsem dispela. Mi wanpela nes, olsem na dispela i bikpela samting long mi. Tenkyu tru.
D. E., long Jemani
Mi pilim tru dispela stori, long wanem, pikinini man bilong mi i lusim rot Kristen na bihain em i kisim sik AIDS. Jehova i helpim em na nau em i gat gutnem. Marasin i helpim em na skin bilong em i orait liklik. Mipela i save olsem planti manmeri i gat sik AIDS na ol i no save yet long dispela. Sapos wanpela i gat tingting long marit, em i mas tingim gut dispela samting.
N. J., long Amerika
Traipela Win Ren Polin Mi save amamas tru taim mi tingim olsem mi insait long wanpela oganaisesen i save tingim tru ol manmeri. Tenkyu tru long gutpela stori “Tupela Samting Long Wanpela Bagarap.” (Oktoba 8, 1998) Em i gutpela tru long save olsem ol narapela i save, ol Witnes Bilong Jehova ol i lain bilong ‘stretim gut ol samting bilong wok na ol i no save stil’!
D. F. S., long Brasil