Ol i Tingting Planti Long Blut i Gat Sik Long En
TAIM wanpela saveman long Bolivia, em Demetrio Pessoa, em i kisim sik nogut tru bihain long ol dokta i katim em, ol i kisim em i go hariap long haus sik. Long haus sik ol i givim blut long em, na em i kamap orait liklik. Tasol bihain liklik, skin bilong dispela man i hat. Taim ol dokta i glasim em pinis, ol i tokim em long wanpela samting nogut i bin painim em: Mista Pessoa i bin kisim blut i gat wanpela kain binatang jem (Trypanosoma cruzi) long en. Olsem na em i kisim wanpela bikpela sik ol i kolim sik Sagas.
Wanpela lain bilong nius (Panos) long Landon i tok, planti man long Bolivia ol i painim wankain hevi olsem Mista Pessoa. Inap longpela taim, wanpela lain dokta i skelim dispela samting long 12-pela kantri bilong Latin Amerika, na ol i kisim save olsem, long dispela hap long olgeta de, ol man i kisim sik long blut i gat jem nogut long en. Long wanpela kantri long Latin Amerika, long olgeta 10 tausen 10 tausen sikman i bin kisim blut, inap 220 i kisim bikpela sik long en. Dispela i makim olsem long olgeta 45 45 man i kisim blut, wanpela i kisim sik long blut!
Tasol i no dispela sik Sagas tasol ol man inap kisim long blut, nogat. Ripot bilong dispela lain dokta i kamapim olsem, long planti kantri long Latin Amerika, ol i no save glasim blut ol man i bin givim bilong ol i ken save blut i gat sik hepataitis C o nogat, na long sampela kantri ol i save glasim blut wan wan taim tasol bilong save i gat sik sifilis long blut o nogat. Na tu, planti kantri i no gat ol masin samting bilong glasim blut bilong ol i ken save i gat binatang jem HIV long en o nogat. Taim minista bilong helt long Bolivia, em Tonchi Marinkovic, em i stori long blut i gat sik long en, em i tok: “God i mas helpim yumi long abrusim dispela hevi, long wanem, yumi inap kisim bikpela bagarap tru long sik sifilis, sik hepataitis, sik Sagas, o sik AIDS.”
Dispela bikman bilong gavman, em i no save em i stori long samting em inap pasim rot na bikpela bagarap long sik i no ken kamap. Inap sampela yia i go pinis, wanpela nius (Notícias Bolivianas) i stori long ol samting nogut pasin bilong kisim blut bilong narapela man inap kamapim. Nius i tok: “Em i gutpela long abrusim blut olsem lo bilong Baibel i tok.” Lo bilong Baibel dispela nius bilong Bolivia i stori long en, em i stap long Aposel 15:29. Em i tok: “Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, olsem na yupela i no ken kaikai abus ol man i bin pasim nek bilong en na kilim i dai. Na yupela i mas abrusim olkain pasin pamuk. Sapos yupela i lukaut gut na yupela i abrusim ol dispela pasin, em bai i gutpela.”—Lukim tu Stat 9:4; Wok Pris 3:17.