Pas Bilong Ol Man
Ol Niuspepa Long Rasia Tenkyu tru long dispela stori “Ol Niuspepa Long Rasia i Litimapim Nem Bilong Ol Witnes Bilong Jehova.” (Mas 8, 1998) Mi laik bai yupela i save olsem, dispela em i no namba wan taim aiwara i pulap long ai bilong mi taim mi kaunim wanpela gutpela stori bilong yupela, nogat. I gutpela long save olsem bihain bai graun olgeta i kamap naispela tru olsem ol samting long dispela nupela brens-ofis bilong ol Witnes Bilong Jehova long Solnesnoye.
I. C. S. A., long Brasil
Papa i No Bilip Em i Senis Dispela stori “Em i Pilim Tru Long Bel” (Mas 8, 1998) i kirapim mi long tingim famili bilong mi yet. Man bilong mi tu i no wanpela bilipman. Dispela stori i strongim bel bilong mi olsem ating bihain em bai pilim tok i tru.
S. M., long Amerika
Famili i Sakim Ol Natsi Man! Mi no bin kaunim wanpela stori i gutpela moa olsem stori bilong Horst Henschel, em stori “Pasin Bilong Famili Bilong Mi Long Stap Gut Long God i Kirapim Mi.” (Mas 8, 1998) Taim mi kaunim, mi mas malolo planti taim namel long ol paragraf na bai mi no ken krai tumas. Tru tumas, papa bilong Horst em i wanpela man i bin sanap strong long ol traim, na em i stap olsem gutpela piksa mi bai tingim gut oltaim.
A. K., long Amerika
Stori bilong Horst Henschel i sutim tru bel bilong mi. Pasin bilong em long sanap strong na laikim tru Jehova i kirapim tru bel bilong mi. Mi no inap tru long lusim tingting long tok i bin strongim em taim em i stap long kalabus, olsem: “No ken guria long ol man.”
J. V. S., long Brasil
Mi gat 10-pela krismas, na mi laik tokim yupela olsem taim mi kaunim stori long i stap bilong ol Witnes Bilong Jehova long dispela taim bipo, maski ol inap i dai sapos ol i no tok “Heil Hitler!,” dispela i strongim mi tru. Tasol ol Witnes i sanap strong na ol i no tok olsem.
R. B., long Amerika
Hambak Long Lain na Skin Mi amamas tru long kaunim dispela stori “Ol Yangpela i Laik Save . . . Olsem Wanem Long Pasin Bilong Hambak Long Lain na Skin?” (Mas 8, 1998) Planti taim ol man i askim mi, “Yu bilong wanem lain?” Mi no save long lain tumbuna bilong mi, olsem na bilong bekim tok bilong ol, mi save tok pilai olsem: ‘Mi gat blut bilong kain kain lain!’ Wanpela wasman bilong raun i tok: “Sapos wanpela man i askim yu, yu bilong wanem lain, yu ken tok, ‘Mi wanpela Witnes Bilong Jehova.’ ” Mi amamas long i stap insait long wanpela oganaisesen i save tingim ol man bilong olgeta lain i wankain tasol.
D. H., long Amerika
Mi gat 14 krismas na mi laik tok tenkyu long dispela gutpela stori. Pasin bilong hambak long lain na skin i mekim na mi birua long ol narapela lain na skin. Dispela stori i helpim mi long save, long ai bilong Jehova yumi olgeta i wankain tasol.
I. P., long Itali
Taim mi yangpela, planti wanskul bilong mi i save hambak long lain na skin bilong ol, na ol i tok, ol tumbuna bilong ol i kam long Spen, tasol lain bilong mi em wanpela liklik lain tasol. Dispela i mekim na mi save sem, na mi no amamas tumas long mi yet. Sampela taim mi pilim olsem ‘mi nolaik tru long skin bilong mi!’ Dispela stori i helpim mi long amamas gen long mi yet na tingim gut samting Jehova i givim long mi.
A. G., long Filipin
Bipo mi gat tingting kranki tru. Mi ting ol man em mama i karim ol long ol kantri i gat planti mani na wok bisnis long en, ol i winim mipela. Stori bilong yupela i helpim mi long save, tru tumas yumi olgeta i wanpela lain manmeri tasol.
L. G., long Brasil