Pas Bilong Ol Man
Mekim Nogut Long Animal Mi raitim pas bilong tokim yupela olsem yupela i bin kamapim gut tru stori bilong yupela olsem: “Baibel i Tok Wanem? Yu Ting i Gat Rong Long Mekim Nogut Long Animal?” (Disemba 8, 1998) Mi ting em gutpela tru yupela i kamapim klia olsem God i no orait long pasin bilong mekim nogut long ol animal, na dispela pasin i no stret long ol man i tok ol i Kristen.
J. L. C., long Amerika
Papamama i No Stap Wantaim Ol Yangpela Mi tenkyu tru long stori “Ol Yangpela i Laik Save . . . Bilong Wanem Papamama i No Stap Wantaim Mi?” (Disemba 8, 1998) Nau mi gat 39 krismas. Tasol taim mi gat 11-pela krismas, mama i dai na papa i lusim mipela. Inap long nau mi no inap helpim ol man long pilim kain sindaun i nogut, em mi na ol brata bilong mi i bin kisim. Tasol nau mi save ol narapela i pilim hevi bilong mipela. Tenkyu.
K. Y., long Japan
Papa bilong mi i dai taim mi gat 9-pela mun, na mama i dai paslain long mi kisim 12-pela krismas. Stori bilong yupela i mekim gut tru bel bilong mi, na i kamapim klia bel hevi ol pikinini i save kisim taim papamama i dai. Man! Em gutpela tru long save Jehova bai kirapim bek ol manmeri yumi laikim tumas ol na ol bai stap laip gen!
M. S. S., long Brasil
Mi gat 40 krismas, na mi kaunim dispela stori planti taim. Aiwara i pulap long ai bilong mi taim mi kirap long kaunim stori inap long taim mi pinisim, long wanem, papamama i dai taim mi gat tupela krismas. Bipo taim mi lukim piksa bilong Mama na Papa, oltaim mi save krai. Tenkyu long yupela i raitim ol gutpela stori olsem!
J. C. V., long Frans
Papamama bilong mi ol i stap laip, tasol mi gat bikpela sik bilong bel hevi na mi laikim ol stori i toktok long olsem wanem yumi inap winim ol taim nogut bilong hevi. Mi laik tokim yupela olsem, mi save laikim ol stori long samting tru i save painim ol man, na ol tok Baibel i save kamapim long stori “Ol Yangpela i Laik Save . . .”
S. H., long Kanada
Wasim Han Mi gat 11-pela krismas, na mi laik tok tenkyu long stori “Wasim na Draim Han Bilong Yu!” (Janueri 8, 1999) Dispela stori i kirapim mi long wasim han paslain long mi kaikai na bihain long mi yusim toilet. Long taun bilong mi, ol man i kisim kain kain sik, olsem na dispela stori i helpim mi tru.
M. F., long Itali
Amamas Long Ol Liklik Samting Tenkyu long stori “Ol i Amamas Long Ol Liklik Samting” long hap “Sampela Tok i Kam Long Olgeta Hap.” (Disemba 8, 1998) Mi no stap wantaim ol pikinini bilong mi, na man bilong mi i orait long mi ken lukim ol wanpela taim tasol insait long olgeta 3-pela mun. Mi no save bai mi mekim wanem ol samting taim mi stap wantaim ol, olsem na mi bin tingim tingim planti samting bilong mekim; mi pret nogut ol i les. Long de paslain stret long mipela bai bung, mi kaunim dispela stori. Em i kamap long taim stret!
M. Y., long Japan
Jisas i Bin Luk Olsem Wanem? Tenkyu tru long ol stori “Jisas—Em i Bin Luk Olsem Wanem? Em i Gat Wanem Namba Long Nau?” (Disemba 8, 1998) Ol piksa bilong Jisas long ol haus lotu samting, na long ol piksa wokabaut, ol i no wokim stret. Mi amamas long kaunim stori bilong Jisas long wok em i mekim nau na em bai mekim bihain. Em i no olsem wanpela liklik bebi tasol i slip long bokis kaikai bilong bulmakau.
M. W., long Ostria
Mi amamas tru long dispela stori, winim ol narapela stori mi bin kaunim! Mi save olsem ol dispela stori bai helpim planti man long bilip long ol Witnes Bilong Jehova na long ol nius bilong yumi.
B. D., long Yugoslavia
Em i gutpela long kaunim stori olsem Jisas em i no man i no gat bun, na em i no pes drai olgeta taim olsem planti piksa ol man i wokim. Nogat. Em i gat pasin na strong olsem man tru na em i bihainim pasin bilong Papa bilong em, em “as bilong pasin tru bilong amamas.”—1 Timoti 1:11.
R. O. R., long Brasil