Pas Bilong Ol Man

Kisim Gutpela Mak Moa Long Skul  Mi wanpela sumatin, na mi laik tok tenkyu long yupela long stori “Ol Yangpela i Laik Save . . . Mi Inap Mekim Gutpela Wok Moa Long Skul?” (Epril 8, 1998) Maski mi save mekim gutpela wok long skul, mi no bin ting i gat as na mi mas mekim gutpela wok moa. Tasol taim mi kaunim dispela gutpela stori bilong kirapim tingting bilong ol yangpela, mi save mi inap mekim gutpela wok moa long skul sapos mi putim sampela mak mi inap winim.

B. R., long Amerika

Mi gat 14 krismas, na mi no bin save gut tumas long pasin bilong stadi. Mi ting sampela samting i no inap helpim mi long bihain, na mi ting i no gat wok long mi mas stadi long en. Taim mi kaunim dispela stori, mi senisim tingting bilong mi. Na tu, mi laik tok tenkyu long yupela i kamapim klia olsem wanem yumi ken stadi!

K. F., long Japan

Skrapim Tit  Dispela stori, “Yu Save Skrapim Tit Bilong Yu?” (Ogas 8, 1998) i bin helpim mi tru. Mi gat dispela hevi, olsem na dispela stori i bin helpim mi tru na strongim mi. Mi no ting yupela inap kamapim dispela kain stori. Yupela i save kamapim kain kain stori, olsem na olgeta wan wan man i save kaunim ol dispela stori ol i save pilim tru.

A. M. N. C., long Brasil

Ol Meri  Taim mi kirap long kaunim stori “Ol Meri​—⁠Wanem Samting Bai Painim Ol Bihain?” long Kirap! bilong Epril 8, 1998, aiwara i pundaun long pes bilong mi. Mi pilim tru dispela stori winim ol narapela. Tenkyu tru long strongim mipela long tingim ol samting bai kamap bihain, taim pasin bilong mekim nogut long ol meri em i pinis.

C. J., long Amerika

Mi bin sori tru long i stap bilong planti meri i gat hatwok long en. Aiwara i pulap long ai bilong mi taim mi save long ol samting ol dispela meri i save mekim, na planti taim ol yet i mas karim ol dispela hevi. Mi gat tupela pikinini, na planti taim mi save krai long ol hevi i painim mi. Dispela stori i helpim mi long save olsem i stap bilong mi i winim i stap bilong planti narapela meri.

K. S., long Amerika

Long Taim Bilong Stap Meri Wanpis  Mi laik tok tenkyu tru long stori bilong Barbara Schweizer, “Mi Painim Bel Isi ‘Long Ples Nogut i Gat Bikpela Tudak.’ ” (Epril 8, 1998) Man bilong mi i no dai yet, tasol insait long 3-pela yia, papamama na wanpela brata bilong mi ol i dai. Barbara Schweizer i tok olsem, ‘bel hevi bilong em i samting bilong i kam na i go.’ Mi amamas tru long save olsem i gat wanpela i pilim wankain hevi olsem bilong mi.

H. T., long Hawaii

Mi gat 17 krismas na mi save mekim wok autim tok long olgeta de. Maski mi no gat sampela bikpela hevi, dispela stori i bin helpim mi long stap amamas na kisim pasin bilong givim bel long mekim wok. Dispela stori i bin helpim mi long save olsem Jehova i wok long sambai long mi na em i no inap lusim mi.

T. C., long Itali

Pren i Strong Long Bosim Mi  Mi laik tok olsem mi pilim tru stori “Ol Yangpela i Laik Save . . . Mi Ken Mekim Wanem na Pren Bilong Mi i No Strong Long Bosim Mi?” (Me 8, 1998) Maski mi wanpela meri i bikpela pinis na mi marit, mi save amamas long kaunim ol dispela stori bilong ol yangpela. Dispela stori i kamapim ol tok i stret long ol samting i painim mitupela man bilong mi long nau, olsem na mi bin kaunim stori inap 5-pela taim na bihain mi lusim. Stori i bin helpim mi long save olsem Jisas tu i gat laik long i stap wanpela long sampela taim.

P. A., long Trinidat

Sampela liklik kros i mekim na sampela taim mitupela pren bilong mi i no save toktok. Dispela i mekim na mi save bel hevi tru, na mi no inap putim gut tingting long wanpela samting. Bihain long mi kaunim dispela stori inap sampela taim, mi save olsem mi no larim pren bilong mi i stap wanpis wanpela taim. Mi pilim olsem yupela i bin raitim dispela stori bilong mi stret, long wanem, stori i helpim mi long planti samting mi ken mekim bilong stretim pasin bilong mi long sindaun gut wantaim ol narapela.

R. S., long India