Pas Bilong Ol Man

Gorila  Dispela stori “Mipela i Go Lukim Ol Gorila Bilong Maunten” (Februeri 8, 1998) mi amamas tru long kaunim. Mi no bin ting man inap i go klostu long gorila na gorila i no inap mekim nogut long em. Long ol piksa wokabaut ol i soim dispela animal olsem animal nogut. Tenkyu tru long gutpela stori.

R. P., long Veneswela

Maus i Hevi Long Toktok  Mi tenkyu tru long stori “Maus i Hevi Long Toktok​—⁠Olsem Wanem Mi Karim Dispela Hevi.” (Februeri 8, 1998) Stori bilong Sven Sievers i strongim mi tru, long wanem, mi tu i gat wankain hevi. Insait long ol yia i kam inap nau, Skul Bilong Wok Autim Tok i bin helpim mi na toktok bilong mi i kamap gutpela moa.

E. Z. S., long Brasil

Skul Bilong Wok Autim Tok i save kamap long olgeta wik long Haus Kingdom bilong ol Witnes Bilong Jehova long hap bilong yu.​—⁠Edita.

Mi pilim tru gutpela tingting bilong Sven Sievers, maski maus bilong em i hevi long toktok. Long kongrigesen bilong mipela i gat wanpela brata em i gat hatwok long toktok. Nau sapos mi toktok wantaim em, bai mi daun long em na tingim gut em.

K. K., long Japan

Taim mi liklik yet i kam inap nau maus bilong mi tu i hevi long toktok. Yupela i tok stret taim yupela i tok, yumi mas traim long save gut long man em maus bilong em i hevi long toktok, na no ken sori long em tasol. Tenkyu long dispela stori.

E. C., long Itali

Papamama i No Laik Mi Marit  Nau tasol mi kisim nius bilong Februeri 8, 1998, na mi kaunim hap bilong “Ol Yangpela i Laik Save . . . Olsem Wanem Sapos Papamama i No Laik Mi Marit?” Mi ting mi mekim pasin i no stret long pasim pikinini meri bilong mi long marit. Tasol dispela stori i kamapim olgeta samting mi tingting planti long en, olsem em i yangpela tumas long marit, na pasin bilong dispela man em i laik maritim, na nogut em i maritim man i no wanbilip bilong em, na em inap kisim sik AIDS long dispela man, na dispela man i bilong narapela ples. Mi laik bai dispela stori i sutim tru bel bilong pikinini meri bilong mi.

N. B., long Amerika

Man! Yupela i raitim gut tru dispela stori! Yupela i stori long ol samting ol yangpela i no amamas tumas long toktok long en, na long gutpela rot yupela i stori long dispela samting. Yupela i kamapim kain kain tok bilong helpim man i kaunim dispela stori long kisim stretpela tingting long dispela samting.

S. C., long Amerika

Mi bin mekim wok bilong God long olgeta de inap 8-pela yia. Papamama bilong mi ol tu i Kristen, na mi kros long tupela i no orait long mi marit. Tenkyu tru long dispela gutpela tok yupela i kamapim.

T. C. F., long Tansania

Pret Long God?  Mi ting mi mas kamapim amamas bilong mi long dispela stori “Baibel i Tok Wanem? Olsem Wanem Yu Inap Pret Long Wanpela God i Gat Pasin Sori?” (Janueri 8, 1998) Inap longtaim pinis mi bin tingim tingim dispela askim. Mi save olsem pasin bilong pret long God i olsem, yumi pret long mekim wanpela samting em i no laikim. Tasol mi pilim olsem mi mas save gut moa long dispela samting. Bihain mi kaunim dispela stori. Man! Em wanpela gutpela stori tru; nau mi save gut long insait bilong dispela tok, pret long God!

M. J. T., long Amerika

Stori Bilong Ginger Klauss  Em namba 6 taim nau long mi kaunim dispela stori, “Nau Mi Amamas Long i Stap Laip!” (Me 8, 1997), na bai mi kaunim yet! Mi gat 21 krismas na mi mekim wok bilong God long olgeta de. Mi laikim tru pasin bilong Ginger Klauss, long wanem, em i strong tru long autim tok maski em i mas sindaun long wilsia. Stori bilong em i kirapim mi long mekim olgeta samting mi inap mekim long wok bilong Jehova.

S. Z., long Itali