Maus i Hevi Long Toktok—Olsem Wanem Mi Karim Dispela Hevi

Em stori bilong Sven Sievers

KIRAP long taim mi liklik yet maus bilong mi i hevi na mi no inap toktok gut. Mi amamas long pasin papamama i bin mekim long mi. Taim mi laik toktok na maus bilong mi i hevi, ol i wok strong long putim yau long tok mi laik mekim, na ol i no wok long stretim tok bilong mi. Ol saveman bilong helpim ol man i gat hevi long toktok i tok, sapos ol papamama i stretim tok bilong pikinini long olgeta taim, dispela inap mekim na hevi long toktok i go bikpela moa.a

Mama bilong mi i kamap wanpela Witnes Bilong Jehova taim mi gat tripela krismas. Taim mi yangpela yet mi pasim tok long bel long bihainim pasin bilong em, na ol i helpim mi long stadi gut long Baibel. Long Julai 24, 1982, mi kisim baptais olsem wanpela wokman bilong God i dediket pinis long wanpela kibung long Noimunsta, Jemani. Bihain mi go long Saut Afrika, na long dispela hap mi wok yet long mekim wok autim tok, em dispela wok olgeta trupela Kristen i mas mekim. (Matyu 28:​19, 20) Ating yu laik save, olsem wanem mi inap mekim dispela wok, long wanem, maus bilong mi i hevi?

Stretpela Tingting i Kamapim Gutpela Samting

Mi mas tok stret olsem sampela taim i hatwok long holim stretpela tingting long dispela hevi bilong mi, tasol mi kisim save olsem taim mi gat stretpela tingting long en, dispela i save helpim mi tru. Tru tumas, long olgeta taim mi inap kamapim tingting bilong mi long sampela rot. Sapos mi no inap toktok, mi save raitim sampela tok long wanpela pepa o mi soim tasol sampela nius long ol man. Stretpela tingting i helpim mi long kirapim toktok. Taim mi kirapim tok long man, mi save mekim liklik tok tasol i no gat hatwok long en. Long kirap bilong tok bilong mi, mi save larim man bilong haus i mekim planti tok. Ol manmeri i save amamas long toktok, na long dispela rot mi ken kisim save long tingting bilong ol. Nau mi ken toktok long ol samting ol i laik harim, na kamapim tok bilong Baibel. Taim mi putim gut yau long tok bilong ol mi no save tingim hevi bilong mi long toktok, na nau maus bilong mi i no hevi tumas.

Stretpela tingting i save helpim mi long bekim tok long ol miting Kristen. Mi kisim save olsem taim mi bekim tok planti taim, ol brata sista na brata i lukautim miting ol i lain long pasin bilong mi long toktok na ol i putim gut yau long tok mi mekim, na ol i no tingim hevi bilong mi long toktok.

Bilong kisim amamas long ol toktok bilong mi i kamap gutpela, mi mas mekim traim planti taim. Dispela i helpim mi long sakim pasin bilong sori long mi yet na tingim mi yet tasol. Long olgeta taim mi mas wok strong long daunim pasin bilong sori long mi yet. Ol man i save tok, sapos man i pundaun long hos em i mas kirap na go antap gen long hos, nogut em i pret na em i no laik go antap moa long en. Olsem na taim mi bekim tok na mi no inap pinisim tok bilong mi, long wanem, maus bilong mi i hevi, kwiktaim mi redi long bekim tok gen, kain olsem mi go antap gen long hos.

Olsem Wanem Ol Narapela i Ken Helpim Yu

Taim mi mas ring long telefon o askim sampela samting long ol man mi no save long ol, mi amamas long gutpela helpim ol i laik givim long mi. Tasol sampela i mekim pasin kranki taim ol i laik helpim mi. Na ol i toktok long mi kain olsem mi wanpela liklik pikinini i no inap wokim tingting bilong em yet.

Mi amamas tu long helpim mi save kisim long gutpela meri bilong mi Tracy. Taim em i stap olsem “maus” bilong mi, pastaim mipela i save toktok gut wantaim long dispela samting na em i save long samting mi laik mekim. (Skelim wantaim Kisim Bek 4:​10, 14, 15.) Long dispela rot em i stap daun long mi na mi pilim olsem mi bosim laip bilong mi yet.

Narapela bikpela helpim mi kisim em Skul Bilong Wok Autim Tok. Dispela miting i save kamap long olgeta wik, na ol sumatin i kaunim Baibel long ai bilong ol man na mekim ol sotpela tok long sampela tok bilong Baibel. Mi kirap nogut long kisim save olsem, long planti taim mi inap kaunim buk na toktok gut long ai bilong ol manmeri. Sapos mi no insait long dispela skul, ating mi no inap long kisim save olsem mi inap mekim ol dispela tok.

Long taim mi mekim tok long Skul Bilong Wok Autim Tok, em i strongim bel bilong mi taim brata i lukautim skul i putim gut yau long ol tok mi mekim, na i no tingim hevi bilong mi. Buk Bilong Skul Bilong Wok Autim Tokb i helpim mi gut, maski sampela tok bilong buk i hatwok long bihainim sapos maus bilong man i hevi long toktok, na i no hatwok tumas long ol man i save toktok gut. Olsem: Sampela taim mi no inap pinisim tok bilong mi long taim stret, long wanem, maus bilong mi i hevi. Tasol taim brata i lukautim skul i kamapim ol samting mi inap stretim long tok bilong mi, dispela i save strongim bel bilong mi.

Ol Bikpela Wok Bilong Mekim

Long bipo, long ol miting bilong mipela mi save kaunim ol nius Kristen long ai bilong ol manmeri. Na tu, mi bin lukautim miting long taim ol narapela brata bilong mekim dispela wok i no stap, na long nau mi save mekim long olgeta taim. Tru, pastaim mi guria, tasol God i helpim mi long mekim ol dispela wok.

Tasol inap planti yia wan wan taim tasol mi inap kaunim buk o mekim wok tisa long pletfom bilong kongrigesen. Em i olsem, long wanem, sampela taim mi lusim bikpela hap taim tumas long kamapim tingting bilong mi bambai ol brata sista i ken kisim gut. Olsem na mi bin wok strong long mekim ol narapela wok. Pastaim mi wok olsem helpim bilong brata i lukautim ol nius Wastaua na Kirap! bilong kongrigesen. Orait taim mi kamap wokman bilong kongrigesen, mi lukautim ol Baibel, ol buk, na ol nius samting. Bihain ol i makim mi long lukautim ol kat bilong ol hap mipela i save mekim wok autim long en. Mi givim bel long mekim ol dispela wok na mi wok strong, na dispela i givim bikpela amamas long mi.

Inap 8-pela yia nau mi wantaim Tracy i mekim wok bilong God long olgeta de. Jehova i mekim gut long mi long dispela wok tu. Sampela taim mi tingting ating Jehova i save mekim wok long dispela hevi bilong mi long toktok. Mi bin helpim 5-pela man long kamap Kristen i dediket pinis, na tupela bilong ol em maus bilong ol i hevi long toktok.

Mi tingim yet bikpela amamas mi bin kisim long taim ol i makim mi long kamap wanpela elda long kongrigesen. Tru, wok tisa bilong mi long pletfom i no gutpela tumas, tasol mi wok strong long helpim ol brata sista long ol narapela rot. Dispela hevi bilong mi long toktok i no pasim mi long stadi gut long Baibel, bilong kisim save na bilong helpim ol brata sista long kongrigesen i gat ol bikpela hevi.

Inap 5-pela yia nau, ol i makim mi long mekim sampela tok moa long ol miting. Mi mekim ol tok long Skul Bilong Wok Autim Tok, na tu mi bin mekim ol sotpela toksave long ol narapela miting. Isi isi toktok bilong mi i kamap gutpela liklik. Tasol bihain toktok bilong mi i go nogut gen. Mi tingting planti, ating ol i no ken makim mi moa long mekim ol tok, tasol mi kirap nogut long lukim nem bilong mi stap gen long sedyul bilong mekim ol tok! Wasman siaman bilong kongrigesen bilong mipela em i tokim mi, sapos maus bilong mi i hevi na mi no inap toktok, mi ken lukluk tasol long em na em bai kam long pletfom na pinisim tok bilong mi. Inap wanpela o tupela taim mi mekim olsem, tasol mi no bin mekim olsem inap sampela mun nau. Taim toktok bilong mi i kamap gutpela liklik, ol i makim mi long mekim ol longpela tok, na ol pablik-tok tu. I no longtaim i go pinis na mi luksave olsem toktok bilong mi kamap gutpela liklik, long wanem, ol i makim mi long mekim tupela soim long kibung sekit bilong ol Witnes Bilong Jehova.

Mi mas tok stret, mi no save bilong wanem toktok bilong mi i wok long kamap gutpela. Na tu, bihain em inap go nogut gen. Tru, ol tok mi mekim long pletfom i wok long kamap gutpela, tasol taim mi toktok wantaim ol man, sampela taim maus bilong mi i hevi na mi no toktok gut. Olsem na mi no winim dispela hevi bilong toktok. Long taim toktok bilong mi i go nogut, mi tokim mi yet olsem mi mas karim dispela hevi na ‘daunim mi yet na stap wanbel wantaim God.’​—⁠Maika 6:⁠8.

Maski wanem samting bai painim mi long bihain mi laik wok strong yet long winim hevi bilong toktok, long wanem, mi save, long nupela taim God bai kamapim, dispela hevi long toktok bai pinis olgeta. Baibel i tok: “Ol man, maus bilong ol i hevi long toktok, bai ol i toktok gut tru.” Mi bilip olsem dispela bai kamap tru long samting bilong skin na bilong spirit tu na “ol mauspas bai ol i singaut na amamas.”​—⁠Aisaia 32:4; 35:⁠6.

[Ol Futnot]

[Piksa long pes 15]

Mi wantaim meri bilong mi Tracy