Tok i Tru i Mekim Mi i Kamap Fri

PAPA bilong mi i bin dai taim mi gat 7-pela krismas. Olsem na mama bilong mi i mas mekim bikpela long 6-pela pikinini. Mipela bin stap long Johanisbek long Saut Afrika. Taim mi yangpela mi no poromanim ol narapela, long wanem, maus bilong mi i hevi.

Tasol maski maus bilong mi i hevi, dispela i helpim mi long kisim save long mekim sampela wok. Long skul mi hapman stret long raitim ol stori. Na maski maus bilong mi i hevi, mi inap singsing. Olsem na taim mi stap nating long haus, mi save paitim gita bilong mi na singsing.

Bihain mi givim bel tru long musik. Mi laik tru long insait long wanpela string-ben. Mi givim bel long musik, olsem na mi slek long ol samting bilong skul. Mi no pinisim skul yet na mi lusim. Mi yet mi kirapim string-ben na klostu olgeta Sarere Sande mipela raun long sampela hap bilong Johanisbek na pilaim musik bilong mipela. Mi larim gras bilong mi i go longpela na mi kirap long dring.

Mipela i bin pilaim musik long wanpela nait-klap long Johanisbek, na wanpela meri i wok long dispela klap i laikim mi na em i save baim dring na givim long mi. Mi kirap nogut taim mi kisim save olsem dispela meri i no wanpela meri tru, em wanpela man i save putim klos bilong ol meri! Planti man i go long dispela klap em ol man i save mekim pasin sem wantaim narapela man. Mipela save pilaim musik long dispela klap long olgeta nait, kirap long 9 klok nait i go inap 5 klok moningtaim, olsem na mipela mas kisim sampela drak bilong helpim mipela long mekim olsem.

Inap 5-pela yia mi insait long dispela string-ben na nau wanpela samting i kamap na dispela i mekim na mi kirap long tingting long lotu. Wanpela pris Katolik i singautim mipela long pilaim musik long haus lotu. I gat 500 yangpela i kam na harim musik bilong mipela. Musik mipela i kamapim em musik nogut na planti bilong ol dispela yangpela i dring, na ol i wok long kisim ol drak nogut. Taim mi lukim dispela samting mi wok long tingting olsem: God i stap o nogat?

I Gat Wanpela God i Stap?

Long painim God mi bin go long lotu Seven-De, na Metodis, na Katolik. Tasol mi no inap givim bel long wanpela bilong ol dispela lotu. Wanpela Sande long nait mipela pilaim musik long wanpela haus disko. I gat liklik lait tasol na musik i pairap bikpela tru. Mi kirap nogut tru taim mi lukim man i givim dring long ol man i kam baim​—em wanpela pris Katolik. Em i pasim narapela kain trasis, na singlis tasol, na em i pasim kruse long nek bilong em. Mipela i no ting em i man bilong God, mipela i ting em i wankain olsem mipela.

Nau mi kirap na tingim lotu Buda. Mi baim wanpela piksa olsem imis bilong Buda na putim long rum slip bilong mi. Mi save brukim skru long en na tok: “Buda, yu mas helpim mi.” Mi ting ol man i gat tewel na wanpela rop i pasim tewel i go long skin bilong man, na long dispela rop man inap raun long ples antap long laik bilong em.

Dispela bilip giaman olsem man i gat tewel, mi kamapim long musik bilong mi. (Saveman 9:​5, 10; Esekiel 18:4) Mi kisim ol drak na taim mi mekim olsem mi raitim ol musik bilong mi. Ol narapela i insait long string-ben bilong mi, ol i lain long pilaim dispela musik. Wanpela kampani i putim musik bilong mipela long kaset. Ol singsing long kaset i stori long tewel i raun long ples antap. Na wanpela bilong ol dispela singsing i stori long Satan, na em i stori olsem strong bilong Satan i winim strong bilong God.

Mi givim bel long ol samting bilong ol spirit nogut, na tu, mi kisim ol drak nogut. Tupela samting i mekim na mi kisim planti hevi. Sampela taim long nait mi kirap na mi lukim samting nogut i raun long rum slip bilong mi. Wanpela nait mi lukim wanpela samting i kam klostu long mi. Mi pret, tasol mi no inap mekim wanpela samting, long wanem, tupela han bilong mi i dai. Nau mi kirap na ting mi mas lusim dispela ol samting i kalabusim mi.

Bikpela Senis i Kamap Long i Stap Bilong Mi

Brata bilong mi na meri bilong em, i bin kamap Witnes Bilong Jehova. Planti taim long nait mi save dring, olsem na long moningtaim het bilong mi i pen nogut long dispela. Klostu long bet bilong mi Sals i save putim hap pepa. Long dispela pepa Sals i bin raitim sampela tok bilong Baibel i sutim pasin nogut mi save mekim.

Wanpela Sande, Sals na Loren i singautim mi long go long wanpela kibung bilong ol Witnes na lukim wanpela pilai bilong Baibel. Mi laik save long wanem samting bai kamap, olsem na mi go. Mi kirap nogut long lukim bikpela lain i sindaun! Klostu olgeta tok mi harim mi no kisim gut, tasol mi amamas long mi bin go. Planti man i kam na sekanim mi, maski mi gat longpela gras na klos bilong mi i no stret long man bilong lotu. Na long dispela de Sals i stretim tok wantaim wanpela Witnes long kam na stadi Baibel wantaim mi.

Long wik bihain long dispela kibung, mi no go na redim musik wantaim ol poroman bilong mi, mi go long Haus Kingdom bilong ol Witnes bilong harim sampela tok. Taim dispela wik i pinis, mi pasim tok long bel bilong mi long lusim string-ben, na sampela ol samting mipela bin mekim wok long en long dispela ben, mi laik baim i go long ol man. Tasol mi wantaim ol poroman bilong mi long string-ben i pasim tok long mi mas holim namba wan kaset bilong olgeta singsing na musik bilong mipela, long wanem, mi yet i bin raitim ol dispela singsing na musik. Olsem na mi amamas tru long holim dispela kaset. Mi holim gita bilong mi tu, olsem na taim mi malolo samting, mi wanpela i pilaim na singim dispela musik mi bin raitim.

Taim mi kisim sampela save moa long Baibel na long ol miting Kristen, mi kisim save long ol samting God i laik bai mi mekim. Olsem: Bilong amamasim God mi mas mekim sampela tok long ol miting, na mi mas i go long haus bilong ol man na autim gutpela tok bilong Baibel olsem olgeta Witnes i save mekim. (Aposel 5:42; Rom 10:10) Taim mi tingim dispela samting mi mas mekim, mi pret. Maus bilong mi i hevi, olsem na mi save sem. Mi no laik toktok.

Maus i Hevi Tasol Dispela i No Pasim Mi

Taim mi sindaun na harim ol tok long ol miting, mi save ting: ‘Olaman, sapos mi inap bekim tok olsem dispela Witnes i mekim, bai mi amamas.’ Bihain mi mekim, tasol mi hatwok tru! Taim miting i pinis, planti i kam na tok amamas long mi. Taim ol i tok olsem, mi gat wankain tingting olsem wanpela man i pilai kikbal na em i sutim gol. Nau mi kirap long pilim gutpela pasin sori bilong ol dispela Kristen, em mak bilong ol trupela Kristen.​—Jon 13:35.

Bihain mi go insait long Skul Bilong Wok Autim Tok. Mi mas kaunim wanpela hap bilong Baibel. Maus i hevi tru, olsem na mi no inap pinisim tok bilong mi long taim stret. Bihain long miting wasman bilong dispela skul i mekim sampela gutpela tok bilong helpim mi. Em i tok, taim mi kaunim buk o Baibel samting long haus, mi no ken mekim long tingting tasol, mi mas kaunim long maus. Olsem na mi mekim olsem long olgeta de taim mi kaunim Baibel o nius Wastaua samting. Skul Bilong Wok Autim Tok i strongim bel bilong mi na mi inap insait long wok bilong go long haus bilong ol man na toktok wantaim ol. Long Oktoba 1973 mi kisim baptais bilong makim olsem mi bin dediketim laip bilong mi long God Jehova.

Lusim Tru Ol Samting Bilong Bipo

Maski mi baptais, mi wanpela nupela Kristen i no strong yet. Olsem: Taim mi pinis long autim tok long ol man long olgeta Sande, kol i mekim na mi sindaun liklik long ka bilong hatim skin. Taim mi mekim olsem mi save amamas long harim kaset bilong mi, em dispela kaset mi bin wokim taim mi gat string-ben. Long dispela taim tu mi save prenim wanpela gutpela meri Witnes, nem bilong em Debi. Wanpela taim mi sindaun long ka na mi wok long harim dispela kaset na Debi i wokabaut i kam long ka. Taim em i kamap klostu, mi pasim kaset. Long bel bilong mi yet, mi save dispela musik i no gutpela long Kristen i harim.

Bihain long mitupela Debi i marit ol hevi i kamap. Taim mi slip long nait, planti taim mi kirap na bikpela tuhat i kamap long skin na skin bilong mi i guria. Mi save driman nogut olsem mi gat bikpela blut i ran olsem wara na mi wokabaut long en na ol spirit nogut i ranim mi. Mi sori tru long meri bilong mi, long wanem, planti mun mi gat dispela hevi. Debi i no save gut long ol musik long dispela kaset, tasol em i ting em i wanpela kaset nogut, na dispela i mekim na ol dispela hevi i painim mi. Taim em i tokim mi olsem, mi no amamas na mi tok: ‘Mi no ken tru tromoi dispela kaset. Mi laik holim bilong tingim ol samting mi bin mekim bipo.’

Mipela kirap na tok kros long sampela ol narapela samting tu, olsem na planti taim mi bikmaus long Debi. Mipela tok kros planti taim, olsem na Debi i go long ol elda long kongrigesen na askim ol long helpim mipela. Sampela taim wanpela elda bai kam na toktok wantaim mipela, tasol taim em i lusim haus, nau mi kirap na krosim Debi. Mi hambak na mi no laik ting ol elda i gat wok long helpim mipela, olsem na mi krosim Debi na tok: “Mi bos bilong famili, olsem na i no stret long yu go long ol elda na kamapim dispela hevi bilong mitupela. Em wok bilong mi.” Olsem na mi no gat stretpela tingting long wok bos bilong famili. Bihain long mipela tok kros, mi save pes drai, na mi no toktok wantaim Debi. Tasol nau mi save, samting Debi i bin mekim long go lukim ol elda, em gutpela samting, long wanem, em i no laik bai marit bilong mitupela i bagarap.

Debi i bin toktok wantaim wanpela elda long pasin bilong mi long paitim gita na long kain musik mi save harim. Olsem na long dispela nait stret wanpela elda i kam long haus na stori gut wantaim mi. Em i askim mi olsem: ‘Yu ting yu gat wanpela samting long haus na dispela samting i mekim na yu gat ol dispela hevi?’ Nau mi tokim em long dispela kaset mi holim na bel bilong mi i gat tok long dispela samting.​—1 Timoti 1:​5, 19.

Taim dispela elda i lusim mitupela, mi pasim tok long bel bilong mi long tromoi dispela kaset. Mitupela Debi i karim kaset i go ausait na mipela laik kukim long paia, tasol paia i no inap kukim. Olsem na mi digim hul na planim dispela kaset. Mi baim gita bilong mi tu i go long wanpela man. Mi tingting olsem: ‘Sapos mi laik lusim tru olgeta dispela musik nogut, mi mas lusim olgeta samting bilong kamapim dispela kain musik, olsem gita bilong mi tu.’ Taim mi mekim olsem, mi no kisim moa ol driman nogut. Na kirap long dispela taim marit bilong mipela i wok long kamap gutpela.

Hatwok Long Mekim Pablik-Tok

Skul Bilong Wok Autim Tok i bin strongim mi long mekim ol tok, tasol maus bilong mi i hevi yet. Mi laik tru long mekim tok long kongrigesen na maus bilong mi i no ken hevi. Olsem na Debi i tokim mi long go long wanpela kain dokta i save helpim ol man i gat wankain hevi. Long wanpela taim long olgeta wik, mi bin go long dispela dokta. Mi bihainim ol tok em i kamapim, na tu, mi bihainim ol tok em lain bilong Jehova i kamapim bilong helpim man long mekim gutpela pablik-tok, olsem na ol tok bilong mi i kamap gutpela liklik.

Long 1976 mi amamas long kamap wanpela elda bilong kongrigesen. Tupela mun bihain long dispela mi mekim namba wan pablik-tok bilong mi. Sampela yia bihain long dispela mi amamas long mekim namba wan tok bilong mi long wanpela kibung. Bihain moa ol i makim mi long mekim tok long planti kibung. Long Disemba 1990 mi amamas tru, long wanem, mi bin givim wanpela tok long 4,000 manmeri long wanpela kibung bilong ol Witnes long Johanisbek.

Mi mas wok strong yet long lainim maus bilong mi. Sapos nogat, ating maus inap hevi gen. Wan wan taim maus i hevi, olsem na mi tingim Jehova na askim em long helpim mi. Taim mi wokabaut i go long pletfom bilong mekim tok, mi save beten askim Jehova long helpim mi long stap isi na helpim mi long mekim gut tok bilong mi. Na taim tok bilong mi i pinis, mi save tok tenkyu long Jehova, long wanem, em i givim strong long mi na mi mekim dispela tok.

Mitupela Debi i gat tupela pikinini​—Pendre i gat 15 krismas, na narapela, nem bilong em Kaili, em i gat 11-pela krismas. Mipela olgeta i amamas long mekim wok autim tok long ol haus. Taim mitupela Debi i lukim pasin bilong Pendre na Kaili, em ol i givim bel tru long mekim dispela wok, mipela i amamas tru.

Taim mi tingting bek long i stap bilong mi, mi save amamas na mi save bel hevi. Mi bel hevi, long wanem, musik nogut bilong mi i no bin helpim ol man. Tasol mi amamas long mi bin painim tok i tru, na mi bin lusim olgeta musik nogut, na mi winim dispela hevi bilong maus i hevi. Planti taim mi tingim tok bilong Jisas, em i tok olsem: “Yupela bai i save long tok tru, na tok tru bai i mekim yupela i kamap fri.” (Jon 8:32) Jehova i bin marimari long mi, olsem na mi amamas long wanem, dispela tok bilong Jisas i bin kamap tru long mi.​—William Jordaan i kamapim dispela stori.

[Ol Piksa long pes 26]

Debi na Wiliam Jordan long nau

Mi wok yet long winim dispela hevi long maus i hevi long toktok