Ol Yangpela i Laik Save . . .

Bilong Wanem Ol i Putim Planti Tambu?

WANPELA yangpela man, nem bilong em Len, em i no save kam bek hariap long haus long nait, em i save amamas na raun wantaim ol pren bilong em. Bihain papa bilong Len i kisim save olsem, taim Len i raun wantaim ol pren bilong em, ol i mekim sampela pasin i no stret. Len i tok: ‘Wanpela taim mi bin mekim bikpela rong, olsem na papamama i tambuim mi olsem mi no ken lusim rum slip bilong mi inap tupela wik samting​—long taim bilong kaikai na skul tasol mi inap lusim rum. Taim dispela tupela wik tambu i pinis, mi raun gen wantaim ol pren bilong mi i go inap long biknait. Taim mi kam bek long haus mi lukim papa i sindaun na wet i stap . . . ’

Planti yangpela i no amamas long papamama i bosim tumas wokabaut bilong ol. Wanpela yangpela meri i tok: ‘Taim mi go bikpela liklik papamama i putim planti tambu long mi, olsem mi mas kam long haus paslain long 12 klok biknait, na mi no amamas long dispela.’ Taim papamama i putim tambu na ol yangpela i bikhet long en, dispela i no helpim ol​—papamama bai putim sampela tambu moa long ol.

Long ol liklik pasin bikhet, ating papamama bai putim lo long yangpela i mas kamap kwiktaim long haus, olsem long apinun samting. Tasol sapos em i mekim bikpela rong, ating papamama bai putim tambu long em olsem em i no ken kisim sampela gutpela samting o kisim wanpela kain amamas samting, o em i mas stap long haus. Wanpela yangpela meri i tok: ‘Sapos long wanpela Sarere long nait mi no kam hariap long haus, papamama bai tambuim mi long raun long Sarere antap.’ Sampela papamama i save putim strongpela tambu olsem pikinini i no ken toktok wantaim narapela, em i mas stap long rum slip bilong em tasol, o em i no ken telefon long ol pren bilong em, o em i no ken lukim televisen. Sampela papamama i save givim sampela tok long yangpela bilong stretim ol.

Papamama bilong yu i save laikim yu tru, olsem na i stret sapos ol i putim lo long yu mas i kam hariap long haus. Na sapos yu no kam kwik long haus, ating ol bai tingting planti na ol i no inap slip. Olsem na sapos yangpela i save tingim tru papamama bilong em, ating em i no ken mekim wanpela samting olsem bilong givim hevi long papamama. Sapos em i no mekim ol samting papamama i laik bai em i mekim, ating em i tingim em yet tasol.

Tasol planti yangpela i ting papamama i save putim nating ol tambu na i no gat gutpela as bilong en. Yangpela man Fred i gat 18 krismas, na em i tok: ‘Papamama i mekim long mi olsem mi gat 15 krismas tasol. Mi no bihainim tok bilong papa, olsem na planti taim mipela save tok pait.’ Tasol nogut yu belhat na kros wantaim papamama​—yu ken mekim narapela samting, winim dispela.

I Stret o i No Stret?

Orait, yu ting i stret long papamama i putim tambu long yu o nogat? Papamama i no laik bai wanpela samting i bagarapim yu, olsem na ol i putim lo bilong lukautim yu. Papamama bilong planti yangpela Kristen i save putim ol tambu long ol tu, i no yu tasol i gat ol tambu. Olsem na i no gat gutpela as sapos yu toktok planti long wok bos bilong papamama, a?

Dispela yangpela man Len, em i no ting papa i putim tambu bambai Len i ken i stap gutpela. Len i no bihainim dispela tambu, olsem na taim em i kam bek long haus long biknait, papa i wet i stap. Len i bin mekim wanem? Em i bin bikhet moa. Len i tok: ‘Taim mi lukim papa, mi hait insait long ka na tokim pren bilong mi long draiv i go. Long dispela taim stret mi pasim tingting long bel olsem mi mas ranawe lusim papamama.’ Em nau, Len i lusim papamama na em i raun wantaim ol pren nogut. Em i pamuk, na kisim ol drak nogut, na stilim ol ka. Bihain em i kalabus. Dispela samting i kamap long Len i truim tok bilong Sindaun 1:​32, em i tok: “Ol manmeri i no gat gutpela tingting, ol i save givim baksait long mi, na dispela pasin bilong ol i save kilim ol yet i dai.”

Wanpela yangpela i tok: ‘Bikpela brata bilong mi, Mak, em inap raun na kam bek long haus long laik bilong em yet, na papamama i no save putim tambu long em. Tasol sapos mi no kam hariap long haus, papamama i save krosim mi. Dispela i no stret.’ Sapos dispela kain samting i kamap insait long famili ating sampela yangpela bai kros. Tasol em i gutpela sapos olgeta yangpela i tingim tok bilong Galesia 6:​4, 5. Em i tok: “Olgeta man i mas skelim wok bilong ol yet, em i gutpela o nogat. . . . Em i no [ken] skelim pasin bilong en wantaim pasin bilong narapela man, long wanem, olgeta man wan wan bai i karim hevi bilong pasin ol yet i mekim.”

Olgeta wan wan i gat tingting na laik bilong ol yet. Olsem na sapos papamama i larim bikpela brata o bikpela susa bilong yu i mekim wanpela samting, na yu nogat, em samting bilong papamama. Ating taim bikpela brata o susa bilong yu i liklik ol i bin mekim sampela liklik samting, na nau papamama i larim ol i mekim sampela samting moa. Wanpela buk (After All We’ve Done for Them) i tok: ‘Planti papamama i no save stretim ol pikinini long wankain rot, long wanem, ol i save olgeta pikinini i narapela narapela kain.’

Tasol sampela taim ol yangpela i ting ol i karim hevi bilong bikpela brata o susa sapos bipo em i bin popaia long wanpela samting. Wanpela i tok: ‘Bikpela susa bilong mi i no kam bek hariap long haus, tasol papamama i no putim tambu long em wanpela tasol, ol i putim tambu long mi tu.’ Taim dispela samting i kamap pikinini i no ken ting papamama i no mekim gutpela pasin. Papamama i bin stap longtaim long dispela graun na ating taim bikpela brata o susa bilong yu i liklik yet, papamama i bin popaia long sampela samting, olsem na ol i no laik bai dispela wankain hevi i painim yu.

Tasol sampela yangpela i tingting: ‘Sapos mi kam bihaintaim liklik long haus, bilong wanem papamama i mas givim strafe long mi?’ As bilong en i olsem: Sapos papamama i givim strafe long yu, olsem yu mas stap tasol long haus, ating bai yu tingting gut sapos yu laik brukim gen tambu papamama i bin putim, a? Yangpela man Makus i tok: ‘Planti taim papamama i givim strafe long mi. Sapos ol i no mekim olsem, ating mi no inap pilim rong mi save mekim.’​—Sindaun 10:17.

Papamama i Tingim Tumas Pikinini

Ating sampela papamama i tingim tumas ol pikinini. Na sampela taim ol tambu bilong ol i strong tumas, tasol sapos papamama na ol pikinini i toktok gut wantaim, ating planti hevi i no ken kamap long dispela. Sapos yu toksave long papamama olsem yu laik go we, na yu bai mekim wanem samting, na yu bai go wantaim husat, na yu bai kam bek long haus long wanem taim, ating papamama bai amamas long larim yu i go. Tasol sapos yu pilim olsem papamama i no gat stretpela tingting, orait, makim taim stret bilong toktok wantaim ol, olsem taim ol i sindaun gut na stap isi samting. (Sindaun 25:11) Toktok gut wantaim papamama olsem yu save sapos yu no kam hariap long haus ol bai tingting planti. Na em i gutpela sapos yu tokim papamama yu laikim tru ol na yu laik bihainim tok bilong ol. Na helpim ol long save, sapos ol i larim yu i mekim wanpela samting, dispela i makim olsem nau yu wok long go bikpela.

Wanpela yangpela meri i tok: ‘Sapos wanpela taim mi no inap kam hariap long haus, mi save tokim gut papamama, bilong wanem mi no inap kam hariap. Taim mi mekim olsem, papamama i amamas.’ Sapos yu toktok gut wantaim papamama, nau papamama inap bilip long yu na ol bai larim yu i mekim sampela samting.

Sapos papamama i larim yu i mekim wanpela samting yu bin askim ol long en, orait, yu mas truim tok bilong yu. (Matyu 5:37) Tasol ating sampela taim, maski yu laik truim tok yu bin pasim wantaim papamama, hevi inap kamap na yu no inap truim tok. (Lukim Jems 4:​13, 14.) Sapos olsem, yu mas salim toksave long papamama. Wanpela yangpela i tok: ‘Sapos mama i save mi stap we na mi orait, bel bilong em bai stap isi.’

Sindaun 20:11 i tok: “Yumi lukim pasin bilong wanpela man na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.” Sapos planti taim yu bihainim gutpela pasin na nau wanpela taim yu no kam hariap long haus, ating papamama i no ken tingting tumas long dispela. Pasin bilong Jisas i stret olgeta, tasol wanpela taim papamama bilong em i bel hevi long pasin em i bin mekim. (Luk 2:48) Olsem na yu no ken kirap nogut sapos sampela taim papamama bilong yu i bel hevi o kros na ol i no larim yu i toksave olsem bilong wanem yu kam bihaintaim.

Sindaun 29:11 i tok: “Man i no gat gutpela tingting i save larim belhat bilong en i kamap ples klia. Tasol man i gat gutpela tingting i save pasim belhat bilong em yet.” Olsem na nogut yu toktok wantaim papamama taim ol i belhat, larim belhat i pinis, na bihain yu ken toktok wantaim ol. Tasol yu no ken giaman, yu mas tok tru long ol. (Efesus 4:25) Sapos yu giaman, papamama i no ken bilip moa long yu. Sapos yu mekim pasin i no stret o yu lusim tingting long tambu papamama i bin putim long yu, yu mas tok sori long tupela. Na sapos ol i laik givim strafe long yu, yu no ken bikhet long dispela. Olsem na sapos ol i putim sampela tambu moa, orait, yu mas bihainim inap long taim papamama i ken bilip gen long yu.

Ating yu no amamas long sampela tambu papamama i putim, tasol i stret ol i putim. Olsem na yu mas amamas sapos papamama i putim sampela tambu. Yu no ken bikhet long papamama. Sapos yu stap wanbel wantaim ol ating ol bai larim yu i mekim sampela samting moa.

[Piksa long pes 23]

Papamama bai putim sampela tambu moa long yu sapos yu bikhet long ol