Mipela i Go Lukim Ol Gorila Bilong Maunten

Wanpela man long Tansania i raitim dispela stori bilong Kirap!

I GAT 320 tasol bilong ol i stap long hap bilong ol maunten paia long boda bilong Ruanda na Demokratik Ripablik Bilong Kongo. Narapela 300 i stap long bikbus bilong Yuganda. Em ol gorila bilong maunten. Ol i wanpela bilong ol lain animal i laik pinis olgeta.

Wanpela meri bilong Amerika em i savemeri bilong ol animal, em Dian Fossey, em i mekim bikpela wok bilong kirapim ol manmeri long tingim ol dispela animal. Fossey i kam long Afrika long 1969 samting bilong kisim save long ol gorila bilong maunten. Long dispela taim ol i wok long pinis hariap, long wanem, long pasin hait ol man i kilim ol. Dispela savemeri i gat strongpela bel, em i go na stap wanpis long ol maunten Virunga, na kwiktaim em i kamap pren bilong ol gorila i stap long dispela hap. Fossey i raitim ol samting em i kisim save long en long sampela nius na long wanpela buk (Gorillas in the Mist). Em i strong moa long lukautim ol pren bilong em, na em i pait strong long rausim ol man i save kilim ol dispela animal long pasin hait. Tasol em yet i bagarap long dispela pait bilong em. Wanpela man ol i no save long em i kilim em i dai long 1985.

Long 1993 mi wantaim meri bilong mi i pasim tok long go long hap ol gorila i save stap long en, long wanem, mipela i laik lukim ol dispela animal i save stap isi tasol. Mipela i laik stori long yupela long raun bilong mipela.

Raun bilong mipela i kirap, taim ol man bilong soim rot long mipela i kisim mipela long as bilong maunten paia Visoke, em i go antap inap 3,700 mita. Mipela wokabaut inap wanpela aua na mipela i kamap long arere bilong Nesenel Pak Bilong Ol Maunten Paia long Ruanda. Taim mipela i malolo, ol man bilong soim rot i stori gut long pasin mipela i mas mekim taim mipela i stap klostu long ol gorila. Ol i tokim mipela olsem, long wan wan de 8-pela manmeri tasol i ken go lukim ol dispela lain animal. Dispela lo i lukautim ol na bai ol sik i no inap kisim ol, na tu ol inap stap isi.

Wanpela man bilong soim rot long mipela i tok: “Taim yumi go insait long bus yumi mas toktok isi. Dispela bai helpim yumi long lukim ol narapela animal na pisin i stap long bus, long wanem, i no ol gorila bilong maunten tasol i stap, i gat ol monki, ol narapela narapela antelop, ol elefan, na bafalo tu i stap.”

Ol i tokim mipela tu olsem, ol lip i gat mosong nogut na ol anis i stap long pak, na ating mipela i mas wokabaut long bus em sno i karamapim na i gat graun malumalum. Meri bilong mi i lukluk long mi na mi lukluk long em. Mipela i no redi long dispela! Tasol ol man bilong soim rot i gat gutpela pasin na ol i givim ol klos bilong ren na ol su gumi long mipela.

Man bilong soim rot i tokim mipela olsem, ol sik bilong ol man inap kalap hariap long ol gorila, olsem na bilong lukautim ol, ol man i gat sik o man i save em i gat wanpela kain sik em inap kalap long narapela em i no ken kam. Wanpela bilong ol man bilong soim rot i tok: “Sapos yu laik kus taim yu stap klostu long ol gorila, plis go longwe liklik long ol animal na karamapim nus na maus. Tingim! Yumi stap long ples bilong ol.”

Mipela i Stap Klostu Tru Long Ol!

Mipela i wokabaut i go antap moa long maunten. Mipela i go antap inap 3,000 mita. Antap long maunten i hatwok long pulim win, na ol rot long bus i liklik tru. Tasol mipela i amamas long lukim wanpela diwai ol i save kolim hagenia, ol kain kain gras na naispela plaua i karamapim ol han bilong en. Dispela i mekim na bus i luk olsem paradais.

Nau ol man bilong soim rot ol i wok long painim hap ol i bin lukim ol gorila long asde, long wanem, ol gorila i save raun oltaim bilong painim kaikai. Wanpela bilong ol i tok: “Lukluk long hap!” Namel long ol gras i gat wanpela bet, o ples slip bilong gorila i gat waitpela gras long baksait.

Man bilong soim rot i tok: “Nem bilong em Umugome. Taim gorila man i gat 14 krismas samting, ol gras long baksait bilong en i kamap waitpela olsem silva. Long dispela taim em i kamap olsem hetman bilong wanpela lain gorila. Dispela gorila i gat waitpela gras, em tasol i save kamapim ol pikinini wantaim ol gorila meri. Ol gorila meri i rausim ol yangpela gorila man i laik kamapim pikinini wantaim ol! Tasol sapos narapela gorila i laik kamap het bilong lain gorila na em inap kilim i dai dispela gorila i gat waitpela gras, em bai kilim ol pikinini tu. Nau nupela gorila i go pas long ol, na em bai kamapim ol pikinini wantaim ol gorila meri.”

Taim mipela i bihainim ol man bilong soim rot i go long naispela bus i gat ol mambu, wanpela man i stap long grup bilong mipela i askim ol: “Ol gorila inap i stap hamas krismas?”

Em i bekim isi: “Inap 40 krismas samting.”

Mipela i harim nois i kain olsem bilong gorila na wanpela i tok isi tru: “Sh! Sh! Em wanem samting? Wanpela gorila?” Nogat, tasol wanpela man bilong soim rot i mekim nois kain olsem bilong gorila bilong kirapim ol gorila long bekim tok bilong em. Ating mipela i stap klostu tru long ol!

Tru tumas, klostu long mipela inap olsem 5-mita i gat 30 gorila i stap! Ol i tokim mipela long go daun na stap isi. Wanpela man bilong soim rot i tok: “No ken apim han na makim ol, nogut ol i ting yupela i laik tromoi sampela samting long ol. Plis no ken singaut. Taim yupela i kisim piksa, mekim isi isi na no ken mekim wok long lait bilong kamera.”

Mipela i stap klostu long ol inap long mipela i ken holim ol! Tasol paslain long mipela inap mekim olsem, wanpela man bilong soim rot i tok isi tru: “No ken holim ol!” Em i tok olsem na wantu tasol tupela liklik gorila i kam lukim mipela. Man bilong soim rot i paitim ol liklik long wanpela liklik han bilong diwai, na tupela yangpela i ran go daun long maunten na ol i pilai olsem ol liklik pikinini. “Mama” i lukim narapela i mekim nogut long narapela na em i pasim ol long pilai.

Gorila i gat waitpela gras i stap longwe liklik na em i lukluk long mipela. Wantu em i kirap na wokabaut i kam klostu long mipela na em i sindaun, klostu tru inap long sampela mita tasol long hap mipela i sindaun long en. Em i traipela tru na hevi bilong en ating em inap olsem 200 kilo! Em i wok long kaikai na em i larim mipela i stap, tasol em i was long mipela. Namba wan wok bilong ol gorila, em ol i save kaikai! Gorila i gat waitpela gras i save kaikai inap 30 kilo long wanpela de. Na olgeta animal insait long lain bilong ol, i wok strong long painim kaikai long moning i go inap long apinun. Sampela taim yu inap lukim ol i pait long sampela gutpela kaikai ol i painim pinis.

Kaikai ol i save laikim tru em insait bilong wanpela traipela plaua ol i save kolim senesio. Na tu, ol i save laikim wanpela kain kumu ol i save kolim wel seleri, na as bilong sampela plaua, na kru bilong mambu. Sampela taim ol i save bungim ol narapela narapela kaikai wantaim, kain olsem kru bilong mambu wantaim lip bilong ol plaua na kumu, na ol narapela narapela as bilong plaua na ol rop bilong diwai. Wanpela man i kamapim askim olsem: “Bilong wanem ol nil i no sutim ol gorila taim ol i kisim na klinim ol dispela gras i gat nil?” Wanpela man bilong soim rot i tok: “Ol i gat strongpela skin long han bilong ol.”

Mipela i amamas long lukluk long ol gorila na wantu traipela gorila man i kirap sanap long tupela lek bilong en, na paitim bros bilong en long han bilong en, na em i singaut nogut tru! Em i ran i go long wanpela man bilong soim rot, na wantu em i go sanap klostu long em. Em i lukluk strong long man bilong soim rot! Tasol man i no pret. Nogat. Em i brukim skru na i go daun na mekim nois kain olsem ol gorila i save mekim, na isi isi em i wokabaut i go bek. I luk olsem gorila i gat waitpela gras i laik mipela i mas pilim strong bilong en. Na tru tumas, mipela i pilim!

Ol man bilong soim rot i tokim mipela long redi long go bek. Winim wanpela aua mipela i bin stap wantaim ol dispela narapela kain animal i save stap isi long ples bilong ol. Tru, mipela i stap liklik haptaim tasol, tasol mipela i no inap lusim tingting long samting mipela i lukim. Mipela i tingim tok promis bilong Baibel long nupela taim bai kamap, taim ol man na animal bai stap wanbel wantaim!​—⁠Aisaia 11:​6-9.

[Ol Mep long pes 18]

Ples Bilong Ol Gorila Bilong Maunten

DEMOKRATIK RIPABLIK BILONG KONGO

Raunwara Kivu

YUGANDA

RUANDA

AFRIKA

Dispela Hap Ol i Wokim i Go Bikpela

[Kredit Lain long pes 18]

Mountain High Maps® Copyright © 1997 Digital Wisdom, Inc.