Pas Bilong Ol Man

Sampela Tok i Kam Long Olgeta Hap  Mi wanpela niusman, na planti wanwok bilong mi i laik tru long kaunim stori bilong nius “Sampela Tok i Kam Long Olgeta Hap” bilong kisim sampela tingting bilong helpim wok bilong ol yet. Mi mas tokaut stret olsem, sampela bilong ol dispela stori i bin helpim wok bilong mi tu. Mi laikim tru pasin bilong ol lain bilong yupela long tanim tok, na ol lain i save kaunim na skelim ol rait bilong en, i stret o nogat. Kain gutpela pasin olsem bilong raitim na skelim tok i no save kamap planti taim long ol nius samting.

J. B., long Sek

Sampela yia i go pinis taim mi kirap long kaunim Kirap!, mi no gat laik tumas long kaunim stori, “Sampela Tok i Kam Long Olgeta Hap.” Tasol nau mi tingim dispela stori i gutpela bilong kisim planti save long en. Planti samting i kamap long graun na i no save kamap long nius long televisen, em i save kamap long “Sampela Tok i Kam Long Olgeta Hap.” Yupela i mas mekim yet dispela gutpela wok bilong yupela!

I. K. M. C., long Brasil

Ol Bikpela Sik  Long ol stori “Ol Bikpela Sik​—⁠Bai Ol i Pinis?” (Disemba 8, 1997) wanpela stori i tok: “Long nau ol sik i save kalap long planti man ol i nambawan bikpela samting bilong kilim i dai ol man​—⁠ol dispela kain sik i bin kilim i dai 50 milion manmeri long 1996.” Tasol wanpela ripot bilong lain Wol Helt Oganaisesen i tok, winim 52 milion i dai long 1996, na winim 17 milion bilong ol i dai long ol sik i save kalap long planti man o long sik ol binatang jem i as bilong en.

B. B., long Amerika

Wanpela niuspepa (“Nassauische Neue Presse”) bilong Jemani i as bilong ol tok mipela i kamapim. Ating dispela niuspepa i no bin raitim stret tok bilong lain Wol Helt Oganaisesen. Olsem na mipela i tok tenkyu long yu kamapim stret dispela samting.​—⁠Edita.

Ol Pikinini na Pait  Mi sori nogut tru taim mi kaunim ol stori “Ol Samting Pait i Save Mekim Long Ol Pikinini.” (Novemba 8, 1997) Mi tu, mi wanpela pikinini i bin kisim hevi long pait. Long taim bilong Namba Tu Pait, mi bin stap 4-pela yia na hap long ol banis kalabus nogut bilong ol Japan long Nawi na Bandung, Indonisia. Taim mi gat 10-pela krismas, ol i kisim mi long famili bilong mi na mi mas wok leba 7-pela de long olgeta wik long bikpela san. Mi sot long kaikai na mi kisim sik beriberi na pekpek blut. Tasol samting i painim mi i olsem samting nating taim mi skelim wantaim ol samting nogut i painim planti milion pikinini long nau. Yumi no ken bel hevi long Jehova i larim hap taim i stap yet bilong ol man long olgeta hap bilong graun, na ol pikinini i kisim hevi long pait tu, long ol i ken kisim save long ol tok promis bilong em i save mekim gut bel!

R. B., long Amerika

Papamama i Tingim Tasol Brata Bilong Mi  Stori “Ol Yangpela i Laik Save . . . Bilong Wanem Papamama i Save Tingim Tasol Brata Bilong Mi?” (Novemba 8, 1997) i kamap long taim stret. Dispela stori i helpim mipela long save taim papamama i mekim gut long wanpela brata o susa, i no olsem ol i mekim pasin i no stret. Nau mipela i save i gat gutpela as na papamama i tingim moa yet brata o susa bilong mipela. Mipela i wanbel tru long dispela stori.

B. K., H. K., na G. U. O., long Naijiria

Anis i Wokim Gaden  Taim mi kaunim pinis dispela stori “Save Tru Long Wokim Gaden” (Epril 8, 1997), mi raun long wanpela ples na lukim wanpela kain so. Long ai bilong mi yet mi lukim dispela samting yupela i stori long en. Samting mi lukim i olsem ol liklik hap lip i wokabaut long wanpela rop i hangamap long het bilong haus i kam daun. Em ol anis i karim ol dispela lip, na long hap klostu tasol ol anis i wok strong long wokim wanpela gaden mosong. Mi lukim stret ol samting yupela i stori long en na dispela i mekim na mi kirap nogut long en, na i helpim mi na tupela liklik pikinini meri bilong mi long stap klostu moa long gutpela Papa bilong yumi long heven, em Jehova.

P. F., long Skotlan