‘Maski Maus Bilong Ol i Hevi, Bai Ol i Toktok’

EM BELO BEK long wanpela bikpela de kibung bilong ol Witnes Bilong Jehova long Sekoslovakia (nau ol i kolim Ripablik Sek), na planti handet manmeri i bung bilong kisim save long Baibel. Mi sanap baksait long pletfom na skelim gen tok bilong mi. I no wanpela bikpela tok mi mas mekim. Tupela yangpela Witnes bai kamapim gutpela stori bilong ol na mi mas bosim tasol dispela hap. Long moningtaim mi bin tingting planti na nau mi no stap isi liklik. Mi pilim olsem mi no inap mekim wanpela samting, i olsem skin bilong mi i dai, na mi no inap toktok.

Ating yu bai ting, olgeta man bai pret sapos ol i mas mekim wankain samting mi mas mekim. Tasol mi no pret nating, nogat; pret bilong mi i gat narapela as. Mi laik stori long en.

Hevi Long Toktok

Taim mi gat 12-pela krismas mi pundaun na bagarapim het, nek, na baksait bilong mi. Bihain, wan wan taim maus bilong mi i hevi o mi hatwok long kolim sampela tok, na mi hatwok moa long kolim sapos namba wan leta bilong dispela tok i olsem p, k, t, d, m. Sampela taim mi no inap tru toktok.

Long dispela taim mi no tingting planti; i liklik hevi tasol. Tasol taim ol yia i kam i go pinis, mi pret tru long sanap long ai bilong ol man na toktok. Wanpela taim long skul mi hap i dai taim mi kamapim wanpela ripot bilong mi long klas. Na taim mi go long stua bilong baim sampela samting na ol wokman i askim mi, mi laik baim wanem samting, sampela taim mi no inap toktok. Mi save sanap na wok strong long toktok, na kros bilong wokman bilong stua i go bikpela moa na em i save tok: “Hariap. Yu ting mi inap sanap de olgeta na wetim yu. Ol narapela man i wet.” Em nau, mi no inap baim ol samting mi laik baim.

Mi hatwok tru long skul. Taim mi mas kolim long maus wanpela ripot na maus bilong mi i hevi, ol wanklas i save lap na tok bilas long mi. Tasol mi bin winim haiskul, na long 1979 mi go skul long wanpela yunivesiti long Prak, Sekoslovakia. Mi save laikim ol spot, olsem na mi stadi bilong kamap wanpela tisa bilong spot. Tasol olsem wanem mi inap winim dispela mak bilong kamap kain tisa olsem? Maski mi tingting planti, mi bin wok strong long winim dispela mak.

Kisim Helpim

I mas i gat rot bilong stretim dispela hevi bilong mi long maus i hevi na mi no inap toktok gut. Olsem na bihain long mi winim yunivesiti mi tingting long go lukim dokta. Mi painim wanpela kain klinik long Prak i save helpim ol man i gat hevi long toktok gut. Namba wan taim mi go long klinik nes i no tingting gut na em i tok: “Tingting bilong yu i paul long pasin i narakain tru!” Mi bel hevi stret long em i tok olsem, long wanem, ol saveman i wanbel long tok, man i gat hevi long maus, tingting bilong em i no paul. I no longtaim na mi save hevi bilong mi i narakain: Mi wanpela yangpela man i gat 24 krismas, na ol narapela long klinik ol i pikinini.

I no longtaim na olgeta nes long klinik na dokta bilong skelim tingting, ol i wok long helpim mi. Ol i traim olgeta samting bilong helpim mi. Wanpela taim ol i tambuim mi long toktok long ol man inap 5-pela wik. Narapela taim ol i larim mi i toktok, tasol ol i tokim mi nek i no ken i go antap na i go daun, na mi no ken h-a-r-i-a-p taim mi toktok. Dispela pasin i helpim mi liklik, tasol taim mi kamapim ol ripot bilong mi, mi kisim hap nem olsem man i gat strong long mekim olgeta man i slip.

Bungim Ol Witnes Bilong Jehova

Wanpela de long 1984, mi wokabaut i go long taun na tupela man i kam na toktok wantaim mi. Mi no kirap nogut long skin o bilas bilong ol, mi kirap nogut long toktok bilong ol. Ol i tok God i gat wanpela gavman, wanpela Kingdom, na dispela Kingdom bai pinisim ol hevi bilong yumi man. Ol i givim telefon namba long mi na bihain mi ring long ol.

Long dispela taim long Sekoslovakia lotu bilong ol Witnes Bilong Jehova i tambu. Tasol bihain liklik, bel bilong mi i gat bikpela laik long dispela lotu, olsem na mi kirap na go long ol miting bilong ol. Mi inap pilim tru ol gutpela pasin bilong ol Witnes, olsem narapela i sori long narapela na tingim tru narapela.

Rot Bilong Strongim Bel

Long dispela hevi bilong mi long toktok gut, mi kisim helpim long rot bilong Skul Bilong Wok Autim Tok, em wanpela skul i save kamap olgeta wik long ol kongrigesen bilong ol Witnes Bilong Jehova. Ol i strongim mi long go insait long dispela skul na mi mekim olsem. Wanpela buk bilong dispela skul, em Buk Bilong Skul Bilong Wok Autim Tok, i save kamapim ol gutpela tingting long pasin bilong toktok, na mi bin wok long stretim ol samting bilong toktok, olsem no ken brukim brukim tok, na kolim stret ol tok, na kolim strong ol bikpela tok, na senisim pasin bilong toktok.a

Namba wan tok bilong mi em wanpela kaunim long Baibel na mi lus tru taim mi mekim. Bihain long en, skin bilong mi i guria yet na mi hatwok long go bek long haus. Man! Mi amamas tru long waswas long wara i hat na skin bilong mi inap stap isi!

Bihain long dispela namba wan tok, wasman bilong skul i givim gutpela helpim long mi. Em i givim gutpela tok bilong helpim mi long stretim tok bilong mi, na tu, em i givim tok bilong strongim mi. Dispela i strongim bel bilong mi long mi no ken les. Liklik taim bihain, long 1987, mi kisim baptais na kamap wanpela Witnes. Sampela mun bihain, mi lusim Prak na mi go sindaun long liklik taun Sdar nad Sasavo. Liklik lain Witnes long dispela taun ol i amamas long mi kam. Na maski maus bilong mi i hevi liklik yet ol i no tingting planti, na dispela i bin helpim mi long amamas long mi yet.

Bihain mi bin lukautim wanpela liklik lain i stadi wantaim long ol tok bilong Baibel, na bihain moa mi givim namba wan pablik-tok bilong mi long Baibel. Taim gavman bilong Sekoslovakia i senis, mi save go na givim pablik-tok long ol narapela kongrigesen klostu. Mi no save gut long ol man bilong ol dispela kongrigesen, olsem na hevi bilong mi long toktok i kamap gen. Tasol mi no les.

Winim Ol Narapela Kain Traim

Wanpela taim wanpela elda Kristen i askim mi long go long ples wok bilong em. Em i tokim mi: “Petr, mi gat gutpela tok bilong givim long yu! Mipela i laik bai yu givim wanpela tok long taim bilong kibung sekit.” Mi pilim olsem mi bai hap dai na mi mas sindaun. Pren bilong mi i bel hevi taim mi tok, mi no laik givim dispela tok.

Mi sakim dispela samting na olgeta taim mi tingim. Sapos wanpela tok i kamap long ol miting Kristen olsem yumi mas bilip tru long God, mi save tingim gen dispela samting mi bin mekim long sakim wanpela tok bilong kibung na mi bel hevi stret. Na sampela taim ol i stori long Gideon, olsem em i man bilong bihainim tok bilong God, na maski em i gat 300 soldia tasol, em i no pret long pait long ami bilong Midian. (Hetman 7:​1-25) Em i wanpela man i bilip tru long God bilong em, em Jehova! Olsem wanem? Taim mi sakim dispela tok bilong kibung, mi bihainim gutpela pasin bilong Gideon? Mi no inap tok, yes. Mi sem pipia.

Tasol ol brata Kristen bilong mi ol i no les long mi. Ol i askim mi long insait long program bilong wanpela bikpela de kibung. Dispela taim mi tok, yes. Mi amamas long kisim dispela gutpela wok, tasol mi no inap giaman. Taim mi tingting long sanap long pletfom bilong wanpela haus i pulap long planti man, mi pret nogut tru. Mi mas wok long bilip strong olsem Jehova inap helpim mi. Tasol olsem wanem mi inap mekim olsem?

Taim mi tingim gut ol narapela Witnes na strongpela bilip bilong ol long Jehova. Dispela i givim strong long mi. Na pas bilong pikinini meri bilong wanpela pren, em tu i helpim mi. Verunka i gat 6-pela krismas na em i bin rait olsem: “Long Septemba mi bai skul. Mi no save wanem hevi bai painim mi long taim bilong singsing long litimapim kantri. Mi bilip olsem Jehova bai sambai long mi olsem em i bin mekim long ol Israel.”

Em sampela samting i bin kamap paslain long dispela bikpela de kibung mi bin stori long en long kirap bilong stori. Mi bin beten strong. Nau mi no tingting planti long pasin bilong mi long toktok, nogat; mi tingting long litimapim nem bilong God long dispela bikpela lain man ol i stap bilong harim tok.

Em nau, mi sanap long maikrofon long ai bilong planti handet manmeri. Mi save ol samting man i toktok long en i winim man i givim tok, olsem na mi pulim win gut na kirapim tok bilong mi. Bihain mi tingim samting mi bin mekim. Olsem wanem? Mi pret? Yes mi pret, na wan wan taim maus bilong mi i hevi. Tasol mi save, sapos God i no bin sambai long mi, mi no inap tru mekim dispela tok.

Bihain mi lap long samting wanpela brata Kristen i bin tokim mi bipo. Em i tok: “Yu mas amamas maus bilong yu i hevi.” Taim em i tok olsem mi kirap nogut. Olsem wanem em i ken tok olsem? Taim mi tingting bek long tok bilong em, nau mi save long insait bilong en. Dispela hevi long mi no inap toktok gut, i bin helpim mi long bilip strong long God na mi no bilip long mi yet.

Nau sampela yia i go pinis bihain long dispela wanpela bikpela de kibung. Insait long ol dispela yia mi bin kisim sampela gutpela wok na mi toktok long ai bilong ol bikpela lain man. Ol i makim mi long kamap wanpela elda long kongrigesen Sdar nad Sasavo na long mekim wok painia. Ol Witnes Bilong Jehova i autim tok long olgeta de, ol i kolim olsem ol painia. Tingim! Long olgeta mun mi bin tromoi 100 aua long toktok wantaim ol man long Kingdom bilong God, na planti aua moa mi bin mekim wok tisa long ol miting Kristen long olgeta wik. Na nau mi wanpela wasman sekit, na long olgeta wik mi save givim ol tok long narapela narapela kongrigesen.

Olgeta taim mi save kaunim dispela tok profet bilong Aisaia long Baibel bel bilong mi i save amamas moa: “Ol man, maus bilong ol i hevi long toktok, bai ol i toktok gut tru.” (Aisaia 32:4; Kisim Bek 4:12) Tru tumas, Jehova i bin stap wantaim mi, na helpim mi long “toktok gut” bilong givim biknem long em, na litimapim nem bilong em. Mi stap belgut na amamas long dispela wok bilong litimapim nem bilong God bilong yumi, em i God bilong bikpela pasin marimari.​—⁠Stori bilong Petr Kunc.

[Futnot]