Ol Yangpela i Laik Save . . .

I Stret Mi Mekim Ol Pilai Bilong Kompyuta o Video?

Ol man bilong ples antap i raunim yu pinis! Tasol i no olsem yu no gat wanpela samting bilong helpim yu. Yu sut long lesa-gan na kilim i dai birua bilong yu olsem yu katim na rausim wit. Tasol taim yu wok long sutim planti man, planti moa i kamap. Olsem na yu gat wanpela rot tasol bilong abrusim bagarap​—⁠kilim i dai olgeta samting yu lukim. Taim yu sut, ol birua i bagarap olgeta na blut bilong ol i kapsait nabaut. . .

‘RAUSIM bun bilong baksait, kamautim ol mit bilong bodi, brukim het​—⁠em ol samting bilong amamas!’ Wanpela niusman i mekim dispela tok long nupela kain pilai bilong kompyuta em planti man i save laikim. Em wanpela bilong ol nupela kain pilai bilong kompyuta na video ol man i save mekim na kisim amamas long en. Bipo ol pilai bilong kompyuta o video ol i no nogut olsem bilong nau; long nau ol i moa nogut​—⁠pasin pait na bagarapim man nogut tru i stap long ol dispela pilai.

Tasol planti yangpela i laikim ol dispela kain pilai nogut bilong video na kompyuta. Long Amerika, klostu 33 pesen bilong ol famili i gat wanpela kain pilai bilong kompyuta o video, olsem na planti milion yangpela i gat rot bilong pilai. Ol yangpela i no gat ol dispela samting long haus bilong ol, ol inap go long haus bilong wanpela pren o long wanpela kain stua na pilai.

Olsem wanem long yu? Tingting bilong yu i bin kirap long baim wanpela pilai, o yu gat laik long traim wanpela bilong ol dispela nupela pilai? Orait, taim yu skelim olgeta samting bilong en, ating bai yu tingting gen​—⁠i stret yu mekim olsem o nogat.

Olgeta Pilai i No Wankain!

Pastaim mipela i laik tok, i no olgeta pilai bilong video o kompyuta i nogut. Planti i bilong skulim yumi. Na long gutpela rot ol i lainim yumi long ol ples na kantri samting, na pasin bilong bungim ol namba, na long pasin bilong paitim taipraita samting. Sampela pilai i bilong spot olsem basketbal na hoki na i save helpim skin na tingting bilong yumi. Na tu, sampela pilai i bilong kirapim tingting na bilong traim save bilong yumi.

Tru, maski em i gutpela pilai, em inap kisim bikpela hap taim bilong yumi. Na Baibel i tokim ol Kristen long ‘nogut taim bilong ol i lus nating,’ olsem na ol i mas mekim gutpela wok long taim bilong ol bilong mekim ol wok bilong spirit. (Efesus 5:​16) Tasol Baibel i no tok, olgeta taim yumi mas wok wok o stadi. Nogat. Em i tok, i gat “taim bilong lap . . . na taim bilong singsing.” (Saveman 3:⁠4) Sapos yumi mekim ol kain pilai inap long skel, dispela bai givim gutpela amamas long yumi.

Tasol yumi mas save, i olsem ol i wokim ol dispela pilai bambai ol man i ken lusim bikpela hap taim long en. Long sampela pilai yu mas lusim planti aua bilong winim wanpela mak, na taim yu winim pinis, nau yu luksave​—⁠bilong pinisim pilai i gat sampela mak moa yu mas winim, na ol dispela mak i hatwok moa! Na i gat sampela pilai yu bai lusim bikpela hap taim long en, tasol yu no kisim wanpela gutpela samting long en. Tupela brata Kristen wanblut, em Dan na Sam, ol i bin givim bel long wanpela pilai bilong helpim ol long bungim ol namba. Tasol bihain ol i save, taim ol i bungim ol namba long pepa, ol i mekim hariap​—⁠long kompyuta nogat!

Olsem na maski sampela pilai bilong kompyuta na video i gutpela, yumi gat wok long skelim gut. Dan na Sam i tok: “Taim yu go long stua na yu skelim gut, yu inap painim wanpela gutpela pilai.” Yumi bihainim savepasin sapos yumi no tromoi nating mani long ol pilai em liklik taim bihain yumi bai les long en. Wanpela papa i save strongim ol pikinini man bilong em long mekim wok tasol long ol pilai em inap helpim ol long ol samting ol i lain long en long skul.

Samting Nogut Bilong Ol

Sori tru, i no olgeta pilai bilong kompyuta na video i gutpela bilong amamas long en o i gutpela bilong skulim yumi. Planti kompyuta program bilong nau i kamapim ol samting Baibel i kolim olsem “pasin bilong olpela bel”​—⁠ol pasin doti God i no save laikim. Wanpela bilong ol dispela “pasin” God i no laikim em “pasin bilong mekim olkain posin.” (Galesia 5:​19-21) Tru tumas, long ai bilong God Jehova pasin bilong wokim marila posin em i “samting nogut tru.”​—⁠Lo 18:​10-12.

Ol samting bilong ol spirit nogut, olsem marila samting i pulap long planti pilai bilong nau. Long wanpela pilai olsem, yu mas kolim ol tok marila bambai yu ken win. Pilai i gat ol tok olsem: ‘Taim yu redi long kolim ol tok marila, yu mas subim baten i gat mak bilong klaut i bruk, em i stap daunbilo long han sut long kompyuta; nau subim baten na makim wanem animal samting yu laik kilim.’ Ating ol kain pilai olsem inap kirapim tingting bilong man na em i laik save long ol spirit nogut?

Na olsem wanem sapos wanpela i lukim planti tumas ol pilai bilong kompyuta o video nogut? Nius U.S.News & World Report i stori long tupela pilai planti man i save laikim na ol i kamapim piksa bilong ‘narapela i kamautim lewa bilong narapela,’ na ‘wanpela man nogut i kilim i dai ol yangpela meri na dringim blut bilong ol.’ Sampela i tok ol dispela pilai bilong kompyuta long bagarapim man na blut bilong ol i kapsait, ol i pilai nating tasol. Tasol nogat. Baibel i toksave olsem: “Jehova yet i save skelim ol stretpela man na ol man nogut. Na em i no laikim tru ol man i laikim pasin pait.”​—⁠Song 11:​5, NW; skelim wantaim Aisaia 2:⁠4.

I no hatwok tu long kamapim long kompyuta ol rabis piksa nogut tru i gat pasin sem. Pasin bilong i stap skin nating na pasin pamuk nogut tru i go bikpela long pilai bilong kompyuta, olsem na ol kampani bilong wokim ol pilai bilong kompyuta long Amerika ol i toksave long ol man i laik baim, olsem em i wanpela pilai nogut. Tasol planti stua i amamas long salim yet ol pilai nogut i go long ol yangpela. Wanpela wokman bilong stua i tok: “Mipela i gat wanpela wok tasol, em bilong salim long ol man ol samting ol i laikim.” Tasol askim yu yet olsem: ‘Sapos mi lukim ol piksa bilong kirapim bel bilong man long mekim pasin pamuk, dispela bai helpim mi long tingim ol samting i “stretpela, klinpela, naispela, na gutpela tru”?’​—⁠Filipai 4:⁠8.

Kalabus Tru!

Tru, ol saveman i tok pait long olsem wanem ol pilai bilong kompyuta i save nogutim ol yangpela. Wanpela ripot em nius New Scientist i kamapim i tok, ol kain pilai olsem “i no as bilong ol pasin nogut.” Tasol dispela ripot i kamapim tingting bilong 97 pesen bilong ol yangpela ol i bin givim askim long ol na ol yangpela “i ting ol dispela pilai inap kalabusim ol.” Ol yangpela i tok, ol stua i gat masin bilong pilai ol i nogut tru, long wanem, “ol dispela stua i strongim ol long tromoi bikpela mani.”

Olsem wanem? Ol dispela pilai inap tru long kalabusim man? Sampela manmeri bilong pilai i ting ol inap. Wanpela yangpela meri i tokim Kirap!: “Yu inap tingting long wanpela samting tasol, em long pinisim pilai na win.” Na wanpela yangpela man i tok: “Mi bin lusim planti aua bilong painim rot bilong kilim i dai olgeta man insait long pilai na long kamap long narapela mak bilong pilai.”

Yu inap ting olsem yu no inap kalabus long wanpela pilai, tasol tingim ol samting ol program long televisen na ol piksa wokabaut i save mekim bilong stiaim tingting na bel bilong ol man​—⁠ol man i lukim ol i save krai, o belhat, o singaut amamas. Orait, tingim wanpela pilai i gat gutpela stori, na i narakain, na i gat kain kain pairap samting long en, na em i larim yu yet i kamap hapman stret, yu ting em bai isi long sakim? Olsem na yumi no kirap nogut long save, sampela manmeri bilong pilai i hatwok long save ol dispela pilai ol i wanpela pilai nating o ol i makim samting i tru. Wanpela yangpela i tok: “Samting ol pilai nogut i mekim long mi i nogut tru, na mi ting han bilong mi i olsem gan na mi makim long ol man.”

Skelim Gut

Sapos papamama i no putim lo long ol yangpela long tambuim ol long mekim pilai bilong kompyuta o video, ol yangpela i mas tingim tok bilong Saveman 2:14: “Ol saveman i save lukim gut rot ol i bihainim.” Olsem: Man i gat save, em i lukluk gut long rot em i bihainim na em i save long wanem samting bai kamap bihain. Tru tumas, planti samting long ol pilai bilong kompyuta i birua long save bilong God. (Skelim wantaim 2 Korin 10:⁠5.) Na husat i save wanem narapela samting ol saveman bilong wokim ol dispela pilai bai kamapim? Olsem na paslain long wanpela yangpela i baim, o mekim pilai, o rentim wanpela pilai, em i mas askim em yet olsem: ‘Em wanem kain pilai? Nem bilong en i makim olsem em i kamapim ol samting bilong ol spirit nogut? Piksa long karamap bilong en i kamapim ol samting bilong pait nogut na bagarapim man?’

Sampela taim ol pilai bilong kompyuta i gutpela na i rot bilong kisim amamas na long lain long wanpela samting. Tasol olsem wanem? Ol i gutpela samting bilong lusim bikpela hap taim long en? Sam em i gat 14 krismas na yumi bin stori long em long pastaim, em i tok: “Papa bilong mipela i no bin tokaut stret olsem mitupela i no ken kisim ol pilai bilong video. Tasol em i bin askim mipela, ‘Yu kisim wanem kain amamas taim yu subim wanpela baten na lukim wanpela man i ran o kalap i go i kam long kompyuta?’ ” Na brata bilong em Dan, i tok, “Nau mipela i gat wankain tingting olsem papa long ol pilai bilong video.”

Tru tumas, no ken lusim tingting olsem i gat ol narapela rot bilong amamasim yupela yet na ating ol i gutpela moa, olsem kaunim buk, wokim ol samting long han, insait long ol gutpela spot, singsing, o lain long paitim gita samting. Em i gutpela moa long lusim taim bilong yu long “lain gut long pasin bilong God.” (1 Timoti 4:⁠7) Taim yu mekim olsem, dispela i gutpela samting bilong helpim yu​—⁠winim ol pilai bilong video o kompyuta.

[Rait long pes 13]

Inap 97 bilong ol yangpela ol i bin givim askim long ol, ol “i ting ol dispela pilai inap kalabusim ol”

[Piksa long pes 14]

Taim yu pilai long ol pilai nogut bilong video, dispela inap bagarapim yu?