Yu Save Skrapim Tit Bilong Yu?

KIRAP long bipo yet na i kam inap nau, ol manmeri i bin skrapim tit bilong ol taim ol i no stap bel isi. Planti taim Baibel i stori long dispela pasin bilong skrapim tit bilong makim belhat o bel hevi tru. (Jop 16:​9, NW; Matyu 13:​42, 50) Long nau i gat ol hevi na ol man i save belhat, olsem na planti milion manmeri i save skrapim tru tit bilong ol na planti bilong ol i no save ol i mekim olsem. Ating ol i wok long pinisim tit bilong ol.

Wanem as na sampela manmeri i save skrapim tit bilong ol? I gat planti as, tasol ol i no save gut yet long ol. Ol i ting bel hevi i as na sampela manmeri i gat dispela hevi. Nius UC Berkeley Wellness Letter i tok: “Planti manmeri i save skrapim tit bilong ol i tok, ol i gat hevi long marit o hevi long mani, o ol i wokim laspela tes bilong ol, o ol i pret bos bai pinisim ol long wok, o ol i gat narapela hevi.” Sampela samting moa em inap mekim na ol man i skrapim tit bilong ol i olsem: Tit antap na tit daunbilo long maus bilong ol i no lain gut wantaim, o ol man i no slip gut, o pasin bilong ol long dring inap mekim. Olsem na dispela nius (Wellness Letter) i tok, ol man i gat hevi long skrapim tit, i gutpela sapos ol i no dring tumas na ol i mekim sampela liklik samting bilong maloloim skin paslain long ol i go slip, olsem waswas long wara i hat liklik, o toktok long ol hevi bilong ol wantaim wanpela pren o wanpela man ol i bilip long em.

Long san ating yu save olsem yu skrapim tit bilong yu. Tasol olsem wanem yu ken save yu mekim olsem taim yu slip? Sampela taim pairap i save kamap long pasin bilong skrapim tit oltaim na dispela inap bagarapim slip bilong narapela i slip long rum bilong yu. O taim yu kirap long slip, het i pen o wasket bilong yu i mekim liklik pairap.a Na ating dokta bilong tit bai lukim olsem tit bilong yu i wok long pinis liklik. Em inap tokim yu long sampela samting bilong helpim yu liklik, olsem i gutpela long pasim wanpela hap plastik samting long tit long nait. Tru, ol i no wokim dispela kain plastik bilong pasim yu long skrapim tit, tasol em inap lukautim tit bilong yu na ol i no ken bagarap moa. Tasol yu no ken tingting tumas! Sapos yu no tingting planti long dispela samting, ating yu no ken skrapim tit tumas.

[Futnot]