Taim Ol i No Tokim Man Em i Gat Sik Kensa
LONG Me 1987, mi kaunim wanpela Kirap! (tok Inglis) bilong Jun 8, na mi lukim wanpela stori i kam long Japan, olsem:
“Mipela laik tok tenkyu long sampela tok yupela i bin raitim long sik kensa. (Dispela stori i stap long Kirap! bilong Me 1987 na Jun 1987.) Pikinini meri bilong mipela i gat 16 krismas, na em i no save kisim sik, tasol long yia i go pinis mipela i kisim em i go long dokta, na dokta i tok em i gat sik tibi na em i mas slip long haus sik inap 6-pela mun. Tasol ol i glasim skin bilong em na ol i no painim dispela sik, olsem na em i lusim haus sik.”
Mi tingting olsem: “Olaman! Wankain samting i bin painim dispela meri olsem i bin painim mi.” Mi kaunim dispela stori i go moa:
“Long mun bihain mipela i kisim save olsem em i gat sik kensa long tairoit (thyroid) na dispela sik i bin i go daun long waitlewa bilong em. Wantu ol i bin katim em bilong rausim dispela sik long tairoit na sampela hap moa bilong bodi na ol i katim na rausim sampela hap bilong waitlewa bilong em tu. Nau ol i wok long givim wanpela kain marasin long em, ol i kolim kobalt.”
Dokta i bin katim mi tu olsem ol i bin katim dispela yangpela meri nau mi kaunim stori bilong em. Olsem na mi laik save, “Ating dispela stori em i stori long mi o olsem wanem?” Na mi tokim skin bilong mi, “Tasol mi no gat sik kensa, a?” Klok long bel bilong mi i pairap hariap na mi wok long kaunim kwik ol narapela hap bilong dispela stori:
“Dokta i katim em, na sik bilong em i pinis. Tasol mitupela i papamama bilong em, olsem na oltaim mitupela i tingim pikinini bilong mipela na mipela wok long painim rot bilong helpim em. Mipela kaunim ol stori yupela i bin raitim long kensa na dispela i helpim mipela na mipela i no bel hevi tumas. Yupela i raitim sampela tok mipela inap mekim wok long en bilong helpim pikinini bilong mipela long bihain.—H. K., Japan.”
Mi kirap nogut long lukim dispela nem, long wanem em nem bilong papa bilong mi! Olsem wanem? Dispela stori em i stori bilong mi? Wantu mi go painim mama bilong mi. Em i lap liklik na em i tok: “Tasol yu save em stori bilong yu, a?” Em i lukluk long mi, long wanem em i laik save long tingting bilong mi. Long dispela rot mi kisim save olsem mi gat sik kensa, tasol pastaim mi no bin save long dispela samting.
I Gat Wanem As na Ol i No Bin Tokim Mi?
Long Japan, sapos dokta i save olsem man i gat sik kensa, dokta i no save tokim em. Na dokta bilong mi i tokim papamama ol i no ken tokim mi olsem mi gat dispela sik. Mama i laik tokim mi, tasol papa i no laik. Em i ting, sapos mi save olsem mi gat sik kensa, bai mi bel hevi, olsem na em i no laik tokim mi. Olsem na tupela i tingting planti, bai ol i toksave long mi o nogat.
Bihain ol i kaunim sampela tok i kamap long tupela Kirap! long tok Japan i stori long sik kensa, na taim ol i kaunim pinis, ol i pilim olsem ol i mas painim rot bilong tokim mi olsem mi gat sik kensa. Tasol pastaim papa i raitim pas i go long Sosaiti Was Taua long Japan bilong tok tenkyu long gutpela tok em i bin kaunim long Kirap! Taim Sosaiti Was Taua i putim tok bilong dispela pas insait long wanpela Kirap!, papamama i pilim olsem Jehova i bin kirapim ol long mekim olsem. Em wanpela gutpela rot bilong tokim mi olsem mi gat sik kensa, long wanem, taim mi lukim nem bilong papa bilong mi long Kirap! dispela i bin helpim mi na mi no bel hevi tumas.
Mi no pret, long wanem mi save long tok bilong Baibel i stori long ol man i dai pinis. Baibel i tok: “Ol man i dai pinis, ol i no inap save long wanpela samting.” (Saveman 9:5) Na mi bilip tru long tok bilong Baibel i tok: “Olgeta manmeri i stap long matmat . . . ol bai i lusim matmat na i kam ausait.”—Jon 5:28, 29.
Wanpela samting tasol i mekim na mi bel hevi, em mi tingting olsem: “Papamama i no gat planti pikinini, mi wanpela tasol, olsem na sapos mi dai, papamama bai stap wanpis i go inap long taim God i kirapim bek ol man i dai pinis.” Tasol bihain mi tingting olsem, “Jehova bai lukautim na strongim ol,” olsem na mi no bel hevi moa.
Mi Slip long Haus Sik
Long Epril 1985, em olsem tupela yia paslain long mi kaunim dispela stori bilong papa long Kirap!, papamama i putim mi long haiskul. Mi gat 15 krismas tasol. Dokta i skelim skin bilong mi, na bihain mi kisim wanpela pas i tok mi gat sik bilong bros, na mi mas i go lukim narapela dokta na ol i mas glasim gut dispela sik.
Mi no pilim olsem mi gat sik, tasol dispela tok bilong dokta i mekim na mi tingting planti. Bipo i no gat wanpela taim bikpela sik i bin painim mi, na ol man i ting mi gat strongpela skin. Tasol mi bihainim tok bilong dokta na mi go long haus sik bambai ol i ken glasim gut skin bilong mi. Ol i tok mi gat sik tibi na wantu ol i putim mi long haus sik.
Mi slip long wanpela rum long haus sik wantaim ol narapela man i gat sik tibi, na mi no amamas. Inap 6-pela mun ol i tambuim ol narapela man long i kam lukim mi—papamama tasol i ken i kam. Ol wantok Kristen i salim sampela pas, na sampela kaset i gat ol tok long en bilong ol miting Kristen, na dispela samting i helpim mi na mi no bel hevi tumas. Na mi kaunim ol buk na magasin bilong Sosaiti Was Taua na dispela i helpim mi na mi no tingim mi yet tasol. Na mi beten oltaim long God, na dispela samting i bin helpim mi tru.
Mi Laik Mekim Wok Bilong God
Taim mi gat 4-pela mun, papamama bilong mi i kirap stadi long ol tok bilong Baibel, na ol i kirapim mi long bilip tru long olgeta tok bilong Baibel. Papamama i lainim mi gut tru, olsem na taim mi go bikpela, mi save amamas tru long toktok wantaim Jehova, na long laik bilong mi yet, mi bilip long em. Mi dediket long em, na long Disemba 4, 1982, taim mi gat 13 krismas, mi kisim baptais.
Mi lusim haus sik long Oktoba 1985; mi bin i stap long haus sik inap 6-pela mun. Mi no kalabus moa long haus sik, olsem na mi pilim tru gutpela win. Bilong makim olsem mi pilim tru dispela gutpela samting, mi tingting long mekim wok bilong autim tok long olgeta de, olsem mekim wok painia haptaim. Olsem na long Novemba na long Disemba mi mekim dispela wok Kristen inap olsem 60 aua. Tasol long Disemba mi kisim save olsem mi mas slip long haus sik gen na ol i mas katim mi na rausim dispela hap long nek bilong mi ol i kolim tairoit. Mi tingim dispela samting na mi krai.
Hevi long Blut
Baibel i tokim ol Kristen olsem ol i mas klia long blut. Mi dediket pinis long God, olsem na mi no laik mekim wanpela samting bilong mekim em i bel hevi. (Aposel 15:29) Ol i tok ol i mas katim mi, olsem na mi toktok wantaim dokta bilong mi na tokim em bilong wanem mi no laik kisim blut. Em i orait long dispela tok bilong mi na em i tok em i no ken givim blut long mi.
Tasol wanpela de paslain long ol i mas katim mi, ol i kisim mi i go insait long wanpela rum long haus sik, inap olsem 12-pela dokta ol i wetim mi i stap. Mi no bin bungim ol dispela dokta bipo, na ol bai stap taim dokta i katim mi. Taim mi lukim ol dispela dokta, bel bilong mi i guria tru.
Namba wan dokta i tok, “Mipela laik toktok wantaim yu long ol samting bai kamap taim dokta i katim yu long tumora. Bai mipela katim waitlewa wantaim tairoit bilong yu. Yu tok yu no laik kisim blut, tasol olsem wanem sapos wanpela samting i kamap na i luk olsem yu bai dai? Yu laik bai mipela i givim blut long yu?”
Ol dokta i putim gut yau long ol tok bilong mi, na mi tokim ol, “Maski wanem samting i laik painim mi, mi no laik kisim blut. Plis, yupela i mas bihainim tok bilong mi.”
Nau sampela dokta i kirap givim sampela askim long mi, olsem: “Bilong wanem yu no laik kisim blut?” “Em laik bilong yu yet na yu no laik kisim blut?” Olgeta i putim gut yau long tok bilong mi. Pastaim bel bilong mi i guria, tasol taim mi wok long tokim ol dokta long tingting bilong God long blut, bel bilong mi i wok long i stap isi. Mi tokim ol dokta, mi laik bihainim lo bilong God, olsem na mi no laik kisim blut. Papamama i no bin subim mi long sakim blut. Ol dokta i tok ol bai bihainim laik bilong mi na ol i tok mi no ken tingting planti, long wanem ol bai redim gut pastaim ol samting ol bai mekim taim ol i katim mi.
Ol i Katim Mi na Givim Marasin Kobalt long Mi
Taim dokta i katim mi, em i mas katim nek bilong mi bilong rausim tairoit na sampela hap moa long skin bilong mi na ol i katim na rausim sampela hap bilong waitlewa bilong mi tu. Pastaim ol dokta i ting mi gat sik tibi, tasol nau ol i kisim save olsem mi gat sik kensa. Tasol ol i no tokim mi olsem mi gat sik kensa.
Taim ol dokta i katim mi, ol i bin mekim sampela samting long nek bilong mi, na ol i ting, bihain bai mi no inap toktok, olsem na ol i tokim papamama olsem ol i ting ol i mas katim mi gen bilong stretim dispela samting na bai mi inap long toktok gen. Papamama wantaim ol dokta i amamas tru taim mi kirap na mi askim ol: “Yu no bin givim blut long mi, a?”
Ol dokta i bin mekim gutpela wok, na skin bilong mi i kamap gutpela, na bel bilong mi i no gat tok. Tasol ol dokta i tokim papamama bilong mi, “Ating em bai stap laip inap olsem 4-pela yia tasol, o ating em bai dai insait long dispela yia. Bihain em bai hatwok long pulim win, na em bai pilim bikpela pen na em bai dai. Maski em i kaikai planti, tasol em bai kamap bun nating. Yupela i mas redi long karim ol dispela hevi bai painim em.” Mi no bin save long tok bilong ol dispela dokta, tasol papamama i kirap nogut long dispela tok, na ol i bel hevi tru.
Ol dokta i katim mi long Janueri 1986, na long mun Februeri na Novemba mi mas i go slip long haus sik bilong kisim marasin kobalt. Taim dokta i kam lukim mi long rum mi slip long en, em i pasim wanpela kain samting long bros bilong em na long han bilong em. Em i kamautim tupela marasin i stap long wanpela karamap ain na givim long mi. Em strongpela marasin tru, na taim mi dring em i save pait wantaim sik kensa. Tasol strong bilong dispela marasin i save lusim skin bilong mi na i kam ausait, olsem na ol i mas putim mi i go long wanpela rum i no gat narapela man i stap long en, nogut dispela marasin i bagarapim ol, na mi mas i stap long dispela rum inap wanpela wik. No gat wanpela man inap i kam lukim mi, mi save lukim tasol ol nes i save kam givim kaikai long mi.
Mi kirap nogut long lukim ol i putim mi wanpela tasol long wanpela rum, na ol samting ol i mekim taim ol i laik givim marasin samting long mi, na mi kirap nogut long strongpela marasin ol i givim long mi. Tasol long Japan, ol i no save tokim man olsem em i gat sik kensa, olsem na ol i no tokim mi olsem mi gat dispela sik.
Dispela rum mi stap long en i olsem i stap aninit long graun, na i gat strongpela banis bilong en bambai strong bilong dispela marasin i no inap i go ausait long dispela rum, na mi no inap lukim planti samting long windo. Taim ol pren Kristen bilong mi i kam lukim mi na ol i sanap ausait na tromoi han long mi, mi save amamas. Mi pilim gutpela pasin sori bilong ol na dispela i strongim mi taim mi stap wanpis long dispela rum long haus sik.
Mi Inapim Laik Bilong Mi long Mekim Wok Bilong God
Taim mi stap long haus sik na mi kisim marasin kobalt, wanpela nes i askim mi, olsem wanem na mi save amamas oltaim. Mi tokim em mi save stadi long tok bilong Baibel na dispela samting i helpim mi long i stap bel isi. (Buk Song 41:3) Nes i kirap nogut long dispela tok bilong mi, na em i kirap stadi long ol tok bilong Baibel.
Taim mi tokim ol manmeri long God, dispela i save mekim bel bilong mi i amamas, olsem na taim mi liklik yet mi tingting long mekim wok autim tok long olgeta de. Tasol bilong mekim dispela samting, mi mas skelim gut ol wok bilong mi bambai mi inap mekim wok bilong skul na wok autim tok, na mi mas wok strong long daunim sik kensa tu. Mi amamas tru taim ol i makim mi bilong kirap mekim wok painia oltaim kirap long Mas 1988, em taim mi pinis long skul!
Sik bilong mi i stap yet. Na long dispela taim mi no pilim olsem mi no gat strong, tasol long sampela sampela taim mi mas i go slip long haus sik bambai ol i ken glasim skin bilong mi. Tasol taim mi slip long haus sik mi inap tokim ol dokta na nes na ol narapela sikman long ol gutpela samting God i tok promis long en, olsem laip oltaim long gutpela ples paradais long bihain.—Kamapim Tok Hait 21:3, 4.
Wanpela taim wanpela wokman bilong haus sik i tok: “Waitlewa bilong em i bagarap tru, olsem na mi ting em i mas hatwok long pulim win na em i pilim bikpela pen, na mi ting em bai sindaun nating tasol. Tasol nogat, em i no sindaun nating. Mi no save long as bilong dispela samting. Ating lotu bilong yupela i mekim na em inap wok strong na em i save amamas oltaim, a?”
Tru i gat wanpela samting i strongim mi na mi no bel hevi. Mi save beten oltaim long Jehova, olsem na mi stap klostu long em. Em i save strongim mi na mi no larim dispela sik bilong mi i daunim mi na bai mi no inap mekim wok bilong em. (Filipai 4:13) Olsem na maski mi gat sik kensa, bel bilong mi i stap isi na mi wet long kisim ol gutpela samting bai kamap long bihain. Mi no laik i dai, na mi laik i stap laip i go inap long dispela nupela taim Jehova bai kamapim long bihain, taim i no gat wanpela man bai i tok: “Mi gat sik.” (Aisaia 33:24) Tasol maski wanem samting i painim mi, na maski mi dai, tasol mi bilip tru olsem sapos mi mekim laik bilong Jehova, em i no inap lusim tingting long mi.—Em stori bilong Rie Kinoshita.
[Piksa long pes 27]
Mi bin mekim wok painia kirap long Mas 1988 na i kam inap long nau