Taim Narapela i No Inap Lukim Narapela
WANPELA MAN LONG SPEN I RAITIM DISPELA STORI BILONG KIRAP!
TINGIM olsem yu wok long painim wanpela meri bilong maritim, na yu no inap lukluk gut na ol meri i save lusim haus bilong ol long taim bilong tudak tasol. Dispela kain hevi i save painim wanpela kain bataplai (emperor moth) bilong nait. Tasol sampela samting bilong dispela naispela bataplai i mekim na wok bilong painim meri i no hatwok tumas.
Long taim bilong san, dispela bataplai man em i stap olsem wanpela katapila i save daunim olgeta kaikai em inap kisim. Olsem na long Epril samting taim em i lusim karamap em i save stap long en, kaikai em i bin kisim bai lukautim em i go inap long taim em i dai—em i save stap laip inap tupela mun.
Em i no gat wok long painim kaikai, olsem na dispela bataplai man i ken tingting tasol long wok bilong painim poroman. Tasol sapos em i no gat wanpela gutpela samting em i save karim raun wantaim em, ating em bai no inap painim bataplai meri long lait bilong mun.
Long liklik het bilong bataplai i gat tupela antena. Ating dispela tupela antena ol i nambawan gutpela masin long dispela graun bilong smelim ol samting. Na dispela tupela antena inap smelim wanpela kain smel (pheromone) em meri bataplai i save kamapim.
Maski i no gat planti bataplai meri, dispela smel bilong ol em i samting i toksave long hap ol i stap long en. Antena bilong bataplai man i wok gut tru na ol inap smelim wanpela bataplai meri i stap longwe inap 11-pela kilomita. Olsem na em inap winim ol samting i pasim rot bilong em long painim meri, na bataplai man i bungim bataplai meri. Maski bataplai man bilong nait em i no inap lukluk gut, em inap painim poroman.
Ol samting God i bin wokim i gat planti gutpela samting bilong en na i narapela kain! Man bilong raitim Song em i tok: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.”—Song 104:24.
[Piksa Kredit Lain long pes 16]
© A. R. Pittaway