Samting i Flai Insait Long Solwara

OL I save flai na raun gut tru insait long solwara klostu long ol nambis na solwara i raunim ol ailan. Ol i save stap long olgeta hap bilong solwara, maski wara i hat liklik o wara i kol, na sampela taim yu ken lukim ol long sampela raunwara na wara i ran. Em wanem samting? Em wanpela samting ol i kolim par, na i olsem ol i save flai insait long ol hap bilong solwara!

I no olsem yu mas stap man bilong kisim pis o go long biksolwara na kalap i go daun tru bilong kisim amamas long lukim wanpela par i flai; yu inap lukim wanpela maski yu no stap insait long wara. Wanpela saientis bilong skelim ol samting i stap long solwara, nem bilong em Bart, em i tok ol lain i save go long nambis bilong subim wara, planti taim ol i save lukim ol par i gat wing i kalap i kam antap long solwara.

I gat planti ol narapela narapela kain par, sampela i liklik olsem sampela sentimita tasol, na sampela i bikpela olsem sampela mita. Yu inap luksave olsem ol par i wanlain bilong ol sak. Planti ol narapela pis i save putim kiau na bihain pikinini i kamap long en, tasol ol par i no olsem​—⁠pikinini i save kamap long ol kiau taim kiau i stap yet insait long bel bilong mama. Wanpela lain bilong par i save putim ol kiau long wanpela hap na bihain kiau i bruk na pikinini i kamap, tasol sampela par i save karim pikinini taim kiau i bruk pinis insait long bel bilong mama​—⁠mama i karim ol na ol i liklik tru, tasol lukluk bilong ol i olsem bilong papamama.

Planti man i save long dispela par i gat nil long tel bilong en, na i no gat bun i stap long bodi bilong en, na wing bilong en i kirap long het bilong en na i go inap long tel bilong en. Sampela par i raunpela, na sampela i skwe liklik. Bodi bilong ol i slip stret, olsem na ol i ken raun hariap long wara. Wok bilong wing bilong ol i mekim na ol i save raun gut tru insait long solwara, i olsem ol i no gat hatwok liklik. Taim ol i no raun, ol i hait i stap long wesan long as bilong solwara.

Ai bilong ol par i stap antap long het bilong ol, na maus bilong ol i stap aninit. Ol i gat strongpela tit na maus, na dispela i save helpim ol long brukim skin bilong ol gam samting. Olsem na ol lain i save lukautim fam bilong ol kina, ol i no amamas long lukim par i stap namel long ol dispela samting, long wanem, ol kina i olsem nambawan kaikai bilong ol par. Na tu, ol par i gat nil long tel, mit bilong ol i gutpela long ol manmeri long kaikai, na ol inap wokim ol kain kain kaikai long en.

Ol nil bilong tel bilong sampela par i gat marasin nogut long en, olsem na long tok Inglis ol i kolim ol dispela kain par olsem stingray. Ol nil inap givim bikpela pen na sutim marasin nogut long birua, o long man i krungutim, o holim kranki. Planti taim ol nil i save bruk na stap insait long skin, na i hatwok long rausim, na man inap kisim bikpela sik o bagarap sapos em i no stretim gut hap em nil i bin sutim em. Sapos nil bilong par i sutim yu, wasim gut dispela hap long wara​—⁠sapos wara i no stap klostu, orait wasim long solwara. Taim yu wasim pinis, orait dispela hap bilong skin em nil i sutim, putim hariap long wara i hat tru. Wara i hat i save pinisim strong bilong marasin nogut na daunim pen. Orait nau yu mas i go hariap long dokta.

Tru, ating tel bilong par i gat ol nil long en i save pretim yu, tasol i no pasin bilong ol par long kros hariap sapos ol i ting olsem ol bai kisim sampela bagarap, long dispela taim tasol ol bai sutim man long tel bilong ol. Bart, em mipela stori pinis long em, i subim wara wantaim meri bilong em long wanpela hap bilong ol ailan Keiman ol par i save kam long en bilong kisim kaikai, na ol par i stap isi namel long ol manmeri. Em i tok: “Mipela stap long as bilong solwara i go daun inap long 5-pela mita. Na taim mipela givim kaikai long sampela par, planti ol i kam na banisim mipela! Ating i gat 30 o 40 i subim wara namel long mipela, sampela i bikpela na sampela i liklik. Bilong painim kaikai ol i kam klostu tru long mipela na sekim mipela gut tru, olsem ol i kirap skelim skin bilong mipela, kirap long skru bilong lek na i go antap long het na i go daun long baksait na ol i subim mipela liklik bilong kisim liklik hap kaikai. Mipela kirap nogut long pasin isi bilong ol dispela naispela animal tru. Ol i larim mipela i putim han long bel bilong ol taim ol i kam klostu.” Bart i tok ol dispela par i kisim pasin isi tru na inap planti yia pinis ol man i subim wara namel long ol na i no gat wanpela stori i kamap olsem ol par i bin sutim wanpela.

Yumi ol manmeri i no gat save long raun long solwara, yumi inap kisim amamas long lukim ol par long solwara klostu long nambis o long planti hap bilong graun i gat ol lain i save lukautim ol kain kain pis samting bilong ol man i ken lukim. Long sampela ples olsem i gat wanpela hap bilong en ol man i ken putim han bilong ol long ol pis na long sampela par, tasol ol man i lukautim ol dispela pis i no laik bai hevi i kamap, olsem na ol i rausim ol nil i stap long tel bilong ol par. Long Panama Siti long Florida, wanpela ples bilong lukautim ol pis samting em bilong Ron Hardy, na em i tok olsem: “Long hap mipela putim ol par long en yu inap lukim pasin bilong holim skin bilong ol i senisim tingting bilong man. Ol man i save pret long ol par​—⁠sampela i save pret nogut tru​—⁠tasol tingting bilong ol i senis taim ol i harim stori bilong mipela na kisim stretpela save long pasin bilong ol par. Na taim ol i holim wanpela pinis, ol i wok long amamas long naispela skin bilong en na pasin bilong en long raun gut insait long wara. Bihain long lukim ol par em taim bilong lukim ol dolfin, tasol sampela i no gat tingting moa long lukim ol dolfin, ol i laik stap yet na putim han bilong ol long ol par.”

Nau yu kisim sampela save pinis long pasin bilong ol par, na ating dispela i helpim yu na yu no ken pret tumas long ol. Tasol i gat wanpela toksave: Tingim pasin bilong par long hait long wesan long as bilong solwara i hat liklik na i no daun tumas. Olsem na taim yu wokabaut long kain hap olsem, yu no ken apim lek na wokabaut, yu ken meknaisim lek na wokabaut. Long dispela rot yu bai helpim ol par long save olsem wanpela samting i kam. Na bai yu no krungutim wanpela na kisim pen bilong nil bilong dispela naispela animal i save flai insait long solwara.

[Piksa long pes 26]

Par

[Piksa long pes 26]

I olsem ol manmeri i save pret long ol par, tasol tingting bilong ol i save senis taim ol i kisim stretpela save long en

[Piksa long pes 27]

Wanpela kain par ol i kolim epa

[Kredit Lain]

© Francois Gohier/ Photo Researchers