Matematiks Em Samting Olgeta Inap Yusim

MATEMATIKS i no samting bilong ol saientis tasol long yusim. Nogat. Em bilong yumi olgeta. Taim yu baim samting long stua, stretim haus, o skelim pe bilong ol kopra samting yu save yusim matematiks.

Planti man i ting ol i no gat wok long yusim matematiks long ol samting ol i mekim long ol wan wan de. Olsem wanem? Yu gat kain tingting olsem? Yumi laik skelim olsem wanem yumi ken yusim matematiks na olsem wanem i no hatwok.

Baim Samting Long Stua

Tingim olsem yu raun long ol stua na ol i daunim tru pe bilong ol samting. I gat wanpela samting pe bilong en K35, tasol ol i tok ol i daunim pe inap 25 pesen. Yu ting olsem em i gutpela tru, tasol wanem nupela pe bilong dispela samting? Em nau, matematiks inap helpim yu.a

Pastaim, rausim 25 pesen long 100 pesen, na bai yu kisim 75 pesen (100 pesen – 25 pesen = 75 pesen). Nau kisim namba wan pe, em 35 kina, na mekim olsem: 35 taims 75 pesen (0.75). Nupela pe em K26.25 (35 x 0.75 = 26.25). Taim yu save long nupela pe, nau yu ken wokim tingting olsem em i gutpela long baim o nogat.

Tasol olsem wanem sapos yu no gat kalkuleta? Ating yu inap bungim ol namba long tingting tasol. Olsem, sapos pe bilong samting em K45 na ol i daunim pe 15 pesen. Bilong painim pe bilong dispela samting, yu ken mekim olsem. Pastaim painimaut olsem 10 pesen bilong dispela pe em i hamas. Bilong save 10 pesen i hamas, brukim namba 45 long 10-pela hap. Dispela i no hatwok long mekim long tingting. Orait, yu save olsem yu ken bungim 10 na 5 bilong kisim 15, na 5 em i hap stret bilong 10, nau yu ken bungim na rausim ol namba bilong save long nupela pe bilong samting yu tingting long baim. Orait yumi traim mekim olsem.

Yumi save 10 pesen bilong 45 em i 4.50, na 5 pesen bai hap bilong dispela, olsem 2.25, na bungim tupela namba wantaim bai mekim 15 pesen, o 6.75 (4.50 + 2.25 = 6.75). Nau rausim 6.75 long 45 na bai yu save long nupela pe, em K38.25 (45 – 6.75 = 38.25). Na tu, yu ken bihainim dispela pasin bilong painimaut hamas VAT yu mas baim. Tasol long VAT yu no ken rausim mani long namba wan pe, yu mas bungim.

Tasol was gut, nogut yu kisim tingting kranki taim yu bungim ol namba long tingting. Sapos pastaim stua i bin daunim pe bilong wanpela dres o trausis 40 pesen na bihain ol i daunim 40 pesen gen, i no olsem ol i daunim pe long 80 pesen bilong namba wan pe, nogat, em 64 pesen tasol. As bilong dispela i olsem, taim ol i daunim pe namba tu taim ol i rausim 40 pesen bilong namba tu pe i no bilong namba wan pe. Ating yu bai amamas yet long pe ol i rausim, tasol gutpela long save gut long pe stret bilong samting yu laik baim.

I gat sampela samting em wok bilong bungim na rausim ol namba i no inap helpim yu long mekim. Tasol i gat ol narapela samting olsem ol tul bilong matematiks i stap bilong helpim yu.

Stretim Haus

Ating yu mas putim nupela plua-mat o tail samting long plua bilong yu na yu no gat planti mani bilong mekim. Paslain long yu go long stua, yu mas skelim wanem ol samting yu mas kisim. Nambawan bikpela askim em i olsem, Yu mas baim hamas mat o tail samting? Bilong helpim yu, gutpela sapos yu save liklik long matematiks ol i kolim jiometri.

Planti taim ol i save salim ol mat o tail samting long pe bilong wan wan skwe mita. Longpela bilong wanpela skwe mita em wanpela mita na braitpela bilong em tu em wanpela mita. Paslain long yu ken save long hamas tail samting yu mas baim, yu mas painimaut sais bilong plua long olgeta wan wan rum bilong haus. Klostu olgeta plen bilong ol haus ol i wokim long ol skwe na ol rektengel. Dispela rait bilong matematiks inap helpim yu: s = l x b (sais ikols longpela taims braitpela). Dispela rait bilong matematiks em bilong painim sais bilong ol skwe na rektengel.

Bilong soim yu long olsem wanem yu ken yusim dispela rait bilong matematiks, yumi ken wokim wanpela tok piksa olsem: Ating yu laik putim nupela plua-mat long olgeta plua bilong haus, tasol plua bilong haus kuk na toilet nogat. Yu metaim olgeta rum na plen bilong haus i luk olsem dispela i stap long pes 27. Ol skwe na rektengel long plen i soim ol hap we ol rum i stap na sais bilong ol. Yusim dispela rait bilong matematiks antap na traim painimaut hamas skwe mita bilong plua-mat samting yu mas baim. Sampela tingting bilong helpim yu i olsem: Painimaut sais bilong ol wan wan rum na bungim ol dispela namba. O painimaut sais bilong haus olgeta na rausim sais bilong haus kuk na toilet.b

Ol i kisim dispela tok “jiometri” long tok Grik, na mining bilong en i olsem “metaim graun.” Jiometri i karamapim pasin bilong skelim sais, samting i stap longwe, hamas spes i stap insait long samting, na ol narapela samting bilong ol skwe nabaut na ol lain man i droim. I gat kain kain rait bilong matematiks bilong skelim olgeta dispela samting. Long olgeta de ol saientis, ol ensinia, na ol man i stretim ol haus ol i yusim ol dispela rait bilong matematiks bilong kisim save long ol samting ol i mas kisim. Tasol i gat sampela samting moa i insait long matematiks.

Yusim Matematiks Long Olgeta De

I gat ol narapela kain matematiks ol i kolim aljebra na kalkulas. Insait long planti handet handet yia matematiks i bin kamap olsem wanpela tok ples olgeta man i save long en maski ol i bilong wanem lain, lotu, o ol i man o meri. Long saiens, ol faktori, ol wok bisnis, na long ol samting ol man i save mekim long olgeta de, matematiks i gat strong long stretim planti samting. Maski yu wok long kisim save long ol samting i kamap long ples antap o yu laik lukautim gut mani bilong famili, em i bikpela samting long yusim gut dispela tok ples bilong matematiks.

Olsem na maski yu no bin laikim matematiks taim yu bin i stap long skul, ating em i gutpela long skelim gen dispela, a? Olsem ol narapela tok ples, pasin bilong mekim dispela tok ples i save helpim yu long lain long mekim gut. Wok long yusim sampela matematiks long olgeta de. Traim save bilong yu long mekim ol gem i gat matematiks i stap insait long en. Sapos yu kisim amamas long mekim samting olsem, dispela inap senisim tingting bilong yu long matematiks. Taim yu mekim wok long matematiks dispela bai kirapim yu long tingim tru bikpela save bilong dispela Nambawan Man bilong Matematiks husat i bin kirapim ol dispela tingting long bipo yet, em Man bilong wokim yumi, God Jehova.

[Ol Futnot]

[Sat long pes 27]

(Bilong save ol dispela rait i stap we long pes, lukim buk o magasin)

⇩ |⇦ 3 m. ⇨|⇦ 3 m. ⇨| |

| | | |

| | | |

| | | |

3 | Haus kuk | Rum kaikai | Famili |

m. | | | rum |

| | | |

| | | |

| | | |

⇧⇩ ------------ ------ ------- |

|

1.5 Hap wokabaut |

m. |

|

⇩⇧ ----------------------- ----- |

| | | |

| | | |

| | | |

3 | | Toilet | |

m. | Rum slip | | |

| | | |

| | | |

| | | |

⇧ |⇦ 4.5 m. ⇦|⇦ 1.5 m ⇨|⇦ 3 m. ⇦|

[Ol Piksa long pes 27]

Matematiks inap helpim yu long mekim ol samting long olgeta de