As na Mi No Laik Smok

WANPELA lain MSMA (Missouri State Medical Association) i kamapim wanpela resis bilong raitim stori em ol i laik bai ol sumatin long ol skul long Yunaitet Stets i ken insait long en na raitim stori long dispela tok i stap antap. Inap 675 sumatin long 42 skul i insait long dispela resis. Ol i givim prais long Breanna, em i gat 12-pela krismas, na ol i putim stori bilong em insait long nius Missouri Medicine bilong MSMA. Breanna i ritim tu stori bilong em long ol lain i kam long wanpela kibung bilong MSMA. Paslain long em i ritim stori bilong em, Breanna i tokim ol:

“Mi wanpela Witnes Bilong Jehova na ol tok i stap long stori bilong mi i kam long nius Kirap! Wanpela tok mi laikim tru long stori mi raitim em mi bin kisim long fran pes bilong dispela nius. Nius i gat piksa bilong bun bilong het na long maus i gat smok i stap. I gat het tok olsem: ‘Ol i Laik Bai Yu Baim Dai.’ Inap planti yia, nius Kirap! i bin kamapim planti stori long ol samting nogut smok i save kamapim.”

Ol Witnes Bilong Jehova i save sakim pasin bilong smok. Ol i bilip olsem pasin bilong mekim wok long ol samting em ol inap bagarapim skin, dispela i soim olsem man i no tingim gut laip na Man Bilong Wokim yumi. (Aposel 17:​24, 25) Olsem na ol i save bihainim tok bilong Baibel i tok: “Yumi mas rausim olgeta pasin doti bilong bodi na bilong spirit.”​—2 Korin 7:1.

Olsem ol narapela yangpela Witnes, Breanna i save bihainim ol stiatok bilong Baibel long i stap bilong em. Tru tumas, ol kain yangpela olsem i save mekim bel bilong Man Bilong Wokim ol i amamas.​—Sindaun 27:11.

[Piksa long pes 16]

Breanna (nau em i gat 14 krismas) i holim stori bilong em