Kirap! Em i Helpim Ol Long Lusim Smok!

FIFTI MILION manmeri long Amerika i save smok. Planti ol i laik lusim, long wanem, long olgeta yia smok i kilim i dai klostu 400,000 bilong ol. Long Frans smok i bagarapim 65,000 man long olgeta yia na ol i dai, na long Jemani dispela samting i painim 70,000 manmeri long olgeta yia.

Dispela nius Kirap! i bin tingting long helpim ol man long abrusim dispela kain bagarap long smok, olsem na Kirap! bilong Janueri 8, 1990 i bin kamapim wanpela stori, nem bilong en “Ol i Laik Bai Yu Baim Dai,” na i gat piksa bilong smok i stap long tit bilong man i dai pinis, na ol man i kirap nogut long en. Laspela stori bilong en long pes 16 i gat het-tok olsem: “Tenpela Rot Bilong Lusim Smok.” Orait, yumi laik save, dispela Kirap! i bin helpim sampela man long lusim smok, o nogat?

Rolf em wanpela Witnes Bilong Jehova long Jemani, na em i tingim wanwok bilong em i save smok na em i hatwok long lusim, olsem na Rolf i givim dispela Kirap! bilong Janueri 8, 1990 long em na bai em i ken kaunim dispela tok, “Tenpela Rot Bilong Lusim Smok.” Dispela stori i bin helpim em, o nogat?

Rolf i tok: “Wanwok i kaunim dispela tok, na em i kirap mekim ol samting stori i kolim, na ol dispela tok i helpim em long lusim smok, na nau em i no bin smok inap 18 mun. Taim em i laik smok em i kamautim dispela Kirap! na em i lukim piksa bilong smok i stap long tit bilong man i dai pinis, na em i pret na em i no smok moa.” Narapela man i askim wanwok, “Yu lusim smok olsem wanem?” Wanwok i givim dispela Kirap! long man, na em i bihainim ol tok em i kaunim, na em tu i lusim smok, na inap wanpela yia pinis em tu i no bin smok moa!