Taim Ol Dragon i Lus Nating
LONG nius Ocean Realm, David Hall i tok: “Taim mi go klostu liklik long dragon, pasin bilong en i senis wantu. Em i lusim kaikai na tanim, em i go insait long sampela gras bilong solwara i stap klostu na i lus nating.” Hall i kirap nogut na i tok: “Dispela animal inap haitim gut tru skin bilong en insait long ol gras samting.” Long dispela taim Hall i lukim wanpela animal inap haitim gut skin bilong em aninit long wara—em wanpela dragon (leafy sea dragon) bilong Australia.
Ol dispela dragon i save swim isi isi na pasin bilong ol long haitim gut skin bilong ol i helpim ol long abrusim ol pis i laik kaikaim ol. Long skin ol i gat ol yelopela na grinpela mak na tel na ol pul samting bilong ol i luk olsem ol lip, olsem na ol inap hait gut namel long ol gras bilong solwara. Taim ol i swim ol i save meknais wankain olsem gras bilong solwara i drip long solwara.
Ol inap haitim gut skin bilong ol, olsem na ol inap go klostu long feiveret kaikai bilong ol, em ol liklik kindam. Wanpela man i tok: “Ol inap haitim gut tru skin bilong ol, olsem na ol kindam i no luksave long ol olsem wanpela birua.” Dispela dragon bilong solwara i save daunim tasol ol kindam taim em i swim i go, em i pulim ol i go insait long longpela nus bilong em na daunim ol. Namel long ol dispela haptaim bilong painim abus em i save stap nating inap tripela de, em i amamas long stap long wanpela hap tasol na kisim wanem abus i save kam klostu long em.
Ol dispela dragon bilong solwara i save stap tasol long solwara i no daun tumas long nambis bilong Australia long hap saut. Skin bilong ol i save tanim tanim na tel na ol pul bilong ol i olsem lip, olsem na ol i luk olsem ol dragon bilong ol bikpela de bilong ol Saina, em ol i bin kisim nem bilong ol long ol dispela dragon. Ol i save go longpela inap 43 sentimita, ol i bikpela bilong wanpela lain pis em ol si-hos tu i insait long en.
Long taim bilong karim pikinini, dragon man na dragon meri bilong solwara i save senisim ples. Em nau, dragon man i save kisim bel na karim ol pikinini! Long taim bilong kol i pinis, dragon i laik kamap papa em i kamapim antap long tel bilong en wanpela samting i gat 120 liklik hul bilong putim ol kiau long en. Orait nau dragon meri i putim ol pinkpela kiau bilong em i go insait long wan wan hul. Fopela i go inap sikspela wik bihain, ol bebi dragon bilong solwara i kamap em longpela bilong ol i 20 milimita, na olgeta wan wan i luk wankain olsem papamama bilong ol.
Tru tumas, ol dispela naispela animal i wanpela samting moa i kamapim klia God Jehova i gat save long wokim ol samting na wokim ol samting i luk nais tru!—Song 104:24, 25.
[Ol Piksa long pes 25]
Dragon man bilong solwara i karim ol kiau; liklik piksa i soim samting bilong putim ol kiau long en
[Ol Piksa long pes 25]
Dragon bilong solwara i haitim gut skin bilong en; liklik piksa i kamapim klia skin bilong dragon
[Piksa Kredit Lain long pes 25]
All photos except brood patch: Michael Morris-Immersedimagery@scubadiving.com