‘Mi Laik Mekim Wok Bilong God Paslain Long Mi Dai’
STORI BILONG MAMIE FREE
LONG 1990 pait i kirap insait long Laibiria. Taim pait i go bikpela, Mamie, wanpela yangpela gel bilong lain Kran i gat 12-pela krismas, na famili bilong em ol i no inap lusim haus bilong ol i stap long biktaun Monrovia. Mamie i tok: “Mipela harim bikpela pairap long haus i stap klostu. Wanpela roket-bom i sut i go insait long haus na haus i paia. Hap paia bilong haus i kisim haus bilong mipela tu.” Bikpela pait i stap yet na Mamie, mama bilong em, na kandere bilong em i ranawe lusim dispela hap.
Mamie i tok: “Wantu, wanpela samting i sutim mi.”
“Mama bilong mi i askim, ‘Olsem wanem?’ ”
Mi tok: “Wanpela samting i sutim mi! Mi ting em wanpela bulet.”
Mamie i pundaun long graun, em i pilim bikpela pen nogut tru na em i beten: “Plis God, harim prea bilong mi. Mi ting klostu nau bai mi dai, tasol mi laik mekim wok bilong yu paslain long mi dai.” Na nau em i hap indai.
Ol neiba i ting Mamie i dai, olsem na ol i laik planim em long wanpela nambis i stap klostu. Tasol mama bilong em i strong long ol i mas kisim em i go long haus sik. Sori tru, dispela haus sik i no gat planti samting bilong helpim ol man, meri, na pikinini em ol i bin kisim bagarap. Long dispela nait yet, kandere bilong Mamie husat i bin kisim bagarap tu em i dai. Tasol Mamie i stap laip. Lek bilong em i dai olgeta.
Blut i wok long lus insait long bodi bilong Mamie, em i pilim bikpela pen nogut tru. Fopela mun bihain, ol dokta i kisim X-rei long Mamie na ol i kisim save long ples we bulet i stap. Bulet i stap namel long klok na waitlewa. Nogut Mamie bai dai long taim ol i katim em, olsem na mama bilong em i karim em i go long dokta bilong ples. Mamie i tok: “Em i katim mi long resa, bihain em i putim maus long ples em i katim na i trai long pulim bulet i kam ausait. Em i tok, ‘Em nau em dispela bulet tasol,’ na em i rausim bulet long maus bilong em. Mipela i baim em na i go.”
Tasol dispela man i bin giaman. Sampela X-rei moa i soim olsem bulet i stap yet. Olsem na Mamie na mama bilong em i go lukim gen dispela dokta bilong ples, na em i kirapim ol long bilip olsem bihain long 9-pela mun, X-rei bai soim olsem bulet i no stap moa. Ol i go bek long haus na wet. Insait long dispela haptaim, Mamie i kisim kain kain marasin bilong helpim em long karim dispela bikpela pen. Bihain long 9-pela mun em i kisim sampela X-rei moa, tasol bulet i stap yet. Dispela dokta bilong ples i ranawe.
Inap 18 mun olgeta bulet i stap yet insait long bodi bilong Mamie. Wanpela wanblut i kisim Mamie i go lukim wanpela glasmeri. Tasol glasmeri i no helpim em, em i tok Mamie o mama bilong em bai dai long wanpela de em i makim. Long dispela taim Mamie i gat 13 krismas. Mamie i tok: “Mi bel hevi na krai planti. Tasol taim dispela de i kamap, mi o mama i no bin dai.”
Wanpela ankol i kisim Mamie i go long wanpela lida bilong sios. Dispela lida i tok em i lukim driman na kisim save olsem bulet i no mekim na lek bilong Mamie i dai—samting bilong ples i as bilong en. Em i tok sapos Mamie i mekim ol samting em i tokim Mamie long mekim, orait insait long wanpela wik Mamie bai wokabaut gen. Mamie i tok: “Mi waswas long wara bilong solwara planti taim, mi tambu long kaikai, na long olgeta biknait mi tanim tanim long graun, mi lusim planti aua long mekim olsem. Tasol olgeta dispela samting mi mekim i lus nating, mi stap wankain yet.”
Bihain, i gat sampela haus sik moa i kirap mekim wok bilong ol, olsem na nau ol inap rausim bulet long Mamie. Winim tupela yia em i karim bikpela pen nogut tru. Em i tok: “Bihain long operesen, klostu olgeta pen i pinis, na mi inap pulim gut win. Maski lek bilong mi i dai, mi inap sanap taim mi holim wanpela kain stik wokabaut.”
Mamie i Bungim Ol Witnes Bilong Jehova
Sampela wik bihain long operesen, mama bilong Mamie i bungim tupela Witnes Bilong Jehova. Em i save pikinini meri bilong em i save amamas long ritim Baibel, olsem na em i singautim tupela long i kam long haus bilong em. Wantu Mamie i laik kirap stadi long Baibel. Tasol sampela mun bihain, em i go bek long haus sik na dispela i mekim na em i no stadi moa wantaim ol Witnes.
Tasol Mamie i hangre yet long kisim save long tok bilong Baibel. Olsem na taim wanpela lida bilong wanpela sios i tokim Mamie olsem em i laik helpim em, Mamie i tok orait. Long wanpela Sande skul klas, wanpela sumatin i askim tisa, “Yu ting Jisas i wankain olsem God o?”
Tisa i tok: “Yes, em i stret. Tupela i wankain. Tasol Jisas i no wankain stret olsem God.”
Mamie i tingting: ‘Hau na Jisas i no wankain stret? I hatwok long kisimgut mining bilong dispela tok.’ Em i pilim olsem em i no lainim tok i tru bilong Baibel, olsem na em i no go moa long dispela lotu.
Long 1996 pait i kirap gen long Monrovia. Tupela wanblut moa bilong Mamie i dai na haus bilong em i paia namba tu taim. Sampela mun bihain, tupela Witnes i bungim Mamie taim ol i autim tok long ol haus. Mamie i kirap stadi gen long Baibel. Taim em i go namba wan taim long miting, em i kirap nogut long lukim olsem olgeta—ol kongrigesen elda tu—i klinim Haus Kingdom. Long dispela yia yet em i amamas long i go long “Ol Man Bilong Autim Tok Long Bel Isi God i Save Givim” Kibung Distrik, em namba wan taim em i go long wanpela bikpela bung bilong ol Witnes Bilong Jehova.
Mamie i tok: “Pasin bilong ol Witnes Bilong Jehova long laikim tru narapela narapela, maski ol i bilong ol narapela narapela lain, i kirapim tru bel bilong mi. Na kibung i ron gut.”
Inapim Laik Bilong Em Long Mekim Wok Bilong God
Long 1998 pait i kirap gen na Mamie wantaim mama bilong em i mas ranawe i go long Kot Diwa. Ol i stap long Peace Town Refiuji Kem i gat 6,000 manmeri bilong Laibiria i stap long en. Mamie i stadi yet long Baibel wantaim ol Witnes na em i kamap strong hariap. I no longtaim na em i laik tokim ol narapela long bilip bilong em. Bilong em i ken mekim wok autim tok, ol bratasista spirit i mas subim em long wilsia bilong em. Long dispela rot Mamie inap autim tok long planti narapela refiuji.
Haus Kingdom i stap 6-pela kilomita longwe long em, na maski Mamie i no inap wokabaut, em i save go long olgeta miting. Long Me 14, 2000, em i go longwe olsem 190 kilomita bilong go long spesel de kibung na bilong kisim baptais bilong makim em i dediket pinis long God. (Matyu 28:19, 20) Planti i aiwara taim ol brata i karim Mamie i go long wara bilong kisim baptais. Pes bilong em i lait taim em i lusim wara.
Long nau, Mamie i stap long wanpela refiuji kem long Gana, na em i putim mak long kamap wanpela painia oltaim, olsem wanpela meri bilong autim tok bilong God fultaim. Mama bilong em tu i bin kirap long stadi long Baibel wantaim ol Witnes Bilong Jehova na nau em i save tokim ol narapela long ol samting em i lainim. Tupela wantaim i wet long lukim dispela taim we “ol lek nogut bai ol i kalap olsem ol dia, na ol mauspas bai ol i singaut na amamas” olsem Baibel i tok promis long en.—Aisaia 35:5-7.
[Piksa long pes 14]
Bulet em ol i bin rausim long bodi bilong Mamie
[Piksa long pes 15]
Ol brata i karim Mamie i go long wara bilong kisim baptais
[Piksa long pes 15]
Em i mekim Baibel stadi wantaim mama bilong em, Emma