Nius i Kam Long Olgeta Hap
◼ Inap 60 pesen bilong ol pikinini long Brasil i gat bagarap long tit taim ol i gat 3-pela krismas. Wanpela as bilong dispela, em ol i save dring long botol, na planti taim long nait ol i kisim ol dring i gat suga long en, na bihain ol i no wasim tit.—FOLHA ONLINE, BRASIL.
◼ Pasin bilong toktok long mobail fon taim man i draivim ka i mekim na planti man moa inap bam long ka na ol i mas i go long haus sik, maski ol i yusim mobail i gat hetfon o nogat.—BMJ, BRITEN.
◼ Wanpela nupela buk bilong helpim ol man i tanim tok bilong Baibel i gat lista bilong 6,912 tok ples ol man i save yusim yet.—THE NEW YORK TIMES, AMERIKA.
◼ Smok bilong sigaret bilong narapela man i “nogut tru, ol i no bin ting em i save nogutim ol man olsem.” Ol i bin tambuim ol man long smok insait long ol ofis, haus kaikai, na sampela narapela haus long Pueblo, Colorado, Amerika, na insait long 18 mun namba bilong ol man i kisim hat-atek long dispela hap i go daun inap 27 pesen.—TIME, AMERIKA.
Skrapim Bel Long Ples Wok
Nius Washington Post i tok: “Pasin bilong toktok long strongpela nek long telefon, yusim spikafon, na komplein long wok, em ol namba wan samting i save skrapim bel bilong ol wanwok.” Ol narapela pasin i save hatim bel bilong ol wanwok em “pasin bilong prenim sampela tasol, kam leit long wok, man i toktok long em yet, toktok wantaim wanwok i stap long narapela wok stesin, i no waswas gut, na mekim bikpela nois long maus taim em i kaikai.” Ol dispela samting i mekim na wok bilong ol man i no kamap gutpela. Tasol planti man husat i stori long dispela samting, ol i tok ol i no bin pesim ol wanwok husat i save skrapim bel bilong ol. Nius i tok: “Na gutpela ol i no mekim olsem, long wanem, ating ol yet i save mekim ol wankain pasin.”
Planti Manmeri Moa i Sindaun Long Ol Siti
Nius program CBC News i tok: “Long tupela yia bihain, inap 50 pesen bilong ol manmeri bilong dispela graun bai sindaun long ol siti.” Ripot bilong Yunaitet Nesen i tok, planti man i sindaun long ol siti long Amerika, winim ol narapela kantri. Long olgeta 10-pela 10-pela manmeri long Amerika, inap 9-pela i sindaun long ol siti. Long 55 yia i go pinis, New York na Tokyo tasol i gat winim 10 milion manmeri. Long nau, inap 20 siti i gat winim 10 milion manmeri, olsem Jakarta, Mexico City, Mumbai, na São Paulo. Seketeri-jeneral bilong Yunaitet Nesen, Kofi Annan, i tok: “Ol siti i go bikpela hariap, olsem na planti kantri i mas stretim ol samting bilong mani na sindaun bilong ol man.”
Ol Ka i Save Yusim Tupela Kain Petrol
Nius Veja i tok, inap 33 pesen bilong ol ka ol man i baim long Brasil i save yusim tupela kain petrol. Ol dispela ka i save yusim petrol na alkohol ol i wokim long stik suga, o ol i miksim tupela wantaim. Kirap long 2003 na i go inap long 2004, ol i salim planti moa alkohol, inap 34 pesen moa. Ol man i no save tingim olsem ol i no laik bagarapim graun, win, na wara na long dispela as ol i yusim alkohol. Nogat. Pe bilong em i daun, olsem na ol i yusim. Dairekta bilong Brazilian Center of Infrastructure, Rafael Schechtman i tok, ol ka i yusim tupela kain petrol inap helpim “ol man taim ol i hatwok long kisim petrol na taim pe bilong petrol i senis senis. Sapos pe bilong alkohol i go antap, yu ken yusim petrol, na sapos pe bilong petrol i go antap, yu ken yusim alkohol.”