Mi Lukim Lain Bilong God i Go Bikpela Long Korea
Stori bilong Milton Hamilton
“Mipela i sori long toksave long yupela olsem gavman bilong Ripablik Bilong Korea i kisim bek ol visa bilong yupela ol misineri, na ol i tok ol i no laik bai yupela i go long kantri bilong ol. . . . Long dispela as, yupela bai wok misineri long Japan inap sotpela taim.”
KLOSTU long pinis bilong yia 1954, mi na meri bilong mi i kisim dispela toksave i stap antap, long Brooklyn, New York, Amerika. Long kirap bilong yia 1954, mipela i bin grediuet long namba 23 klas bilong Skul Gileat long hap not bilong New York. Taim mipela i kisim dispela pas, mipela i mekim wok autim tok inap sotpela taim long Indianapolis, Indiana.
Mi na meri bilong mi, Liz (nem bilong em bipo Liz Semock), mipela i bin wanklas long haiskul. Bihain, long yia 1948, mitupela i marit. Liz i save laikim wok autim tok fultaim, tasol em i no gat laik long lusim Amerika na mekim wok long narapela kantri. Wanem samting i bin senisim tingting bilong em?
Liz i wanbel long i go wantaim mi long miting bilong ol lain i laik go long Skul Gileat. Dispela miting i bin kamap long kibung intenesenel long Yankee Stediam, New York, long Julai, 1953. Bihain long dispela gutpela miting, mipela i pulimapim aplikesen bilong insait long Skul Gileat. Mipela i kirap nogut long ol i singautim mipela long insait long narapela klas, em bai kirap long Februeri 1954.
Ol i makim mipela long i go long Korea maski bikpela pait i bin stap long dispela hap inap 3-pela yia na i pinis long namel bilong yia 1953. Dispela pait i mekim na kantri i stap nogut tru. Olsem pas antap i tok, mipela i go pastaim long Japan. Mipela i ron long sip inap 20 de na mipela i kamap long Japan long Janueri 1955 wantaim sikspela narapela misineri em ol i bin makim tu bilong wok long Korea. Lloyd Barry, em wasman bilong brens long Japan long dispela taim, i kam bungim mipela long bris long 6 klok long moning. I no longtaim na mipela i go long haus misineri long Yokohama. Bihain long wankain de yet, mipela i go autim tok.
Mipela i Kamap Long Korea
Bihain, mipela i kisim visa bilong i go long Ripablik Bilong Korea. Long Mas 7, 1955, mipela i kalap long balus i lusim Haneda Intenesenel Ples Balus long Tokyo, na inap 3-pela aua bihain mipela kamap long Yoido Ples Balus long Seoul. Winim 200 bratasista long Korea i tok welkam long mipela na mipela i amamas tru, na mipela i krai. Long dispela taim i gat 1,000 Witnes tasol long Korea. Olsem planti man bilong ol Westen kantri, mipela i ting maski ol man i bilong wanem kantri bilong Esia, ol i luk wankain na ol i gat wankain pasin. Tasol i no longtaim na mipela i luksave olsem dispela tingting i no stret. Ol Korea i gat tokples na ol leta ABC bilong ol yet. Na tu, ol i gat sampela arapela samting em bilong ol tasol, kain olsem ol kaikai, klos, lukluk bilong ol, na stail bilong ol haus bilong ol.
Namba wan bikpela hatwok bilong mipela em long lainim tok ples. I no gat ol buk i stap bilong helpim mipela long lainim tok ples Korea. I no longtaim na mipela i save olsem pasin bilong kolim stret tok Korea i no wankain olsem pasin bilong kolim tok Inglis. Man i mas lainim ol ABC bilong tok ples Korea na bai em inap kolim stret ol tok.
Mipela i save popaia. Olsem, Liz i bin askim wanpela meri bilong haus sapos em i gat Baibel. Pes bilong meri i senis taim em i go insait long haus na kisim masis i kam. Liz i bin askim em long sungnyang (masis) na i no tok sungkyung, em dispela tok i makim “Baibel.”
Bihain long sampela mun, ol i makim mipela long i stap long wanpela haus misineri long Pusan, em wanpela taun klostu long nambis long hap saut. Mipela i rentim tripela liklik rum, bilong mitupela na bilong narapela tupela sista husat i wok wantaim mipela. Ol dispela rum i no gat tep wara na toilet. Long nait tasol presa bilong wara i gat strong inap long subim wara long raba hos i go antap long namba tu plua bilong haus. Olsem na mipela i senis senis long kirap long bikmoning na pulimapim wara long ol baket samting. Mipela i mas boilim wara o putim marasin klorin long en bambai mipela inap dringim dispela wara.
I gat ol narapela hatwok tu. Strong bilong pawa i liklik tru, olsem na mipela i no inap mekim wok long masin bilong wasim klos na ainim klos. Haus kuk bilong mipela i stap long ples bilong kam insait long haus, na i gat wanpela kerasin stov tasol. I no longtaim na mipela olgeta i lain long kukim kaikai. Bihain long 3-pela yia, mi na Liz i kisim sik hepataitis. Planti misineri long dispela taim ol i bin kisim dispela sik. Sampela mun i lus na dispela sik i pinis, na mipela i bin kisim ol narapela sik tu.
Helpim Ol Long Winim Ol Hevi
Inap 55 yia nau, long poin bilong Korea i gat hevi long ol samting bilong wok politik. Namel long dispela poin i gat hap we ol ami i no ken i go long en. Em i stap longwe long Seoul, em biktaun bilong Ripabik Bilong Korea inap 55 kilomita long hap not. Long 1971, Frederick Franz bilong hetkota long Brooklyn i kam raun. Mi kisim em i go long dispela hap ol ami i no ken go long en, na long boda bilong en i gat planti soldia i was i stap. Insait long planti yia, ol ofisa bilong Yunaitet Nesen i bin bung planti taim long dispela hap wantaim ol mausman bilong tupela gavman.
Mipela i no insait long ol wok politik bilong dispela graun, na long samting i kamap long poin bilong Korea. (Jo. 17:14) Ol i no laik insait long pait, olsem na winim 13,000 Witnes long Korea i go kalabus. Na taim yumi bungim ol yia bilong olgeta wan wan i stap long kalabus, em i kamap olsem 26,000 yia olgeta. (2 Ko. 10:3, 4) Ol yangpela brata long dispela kantri i save olsem dispela hevi bai painim ol, tasol ol i no pret. Sori tru, gavman i kolim ol Kristen olsem ol raskol, long wanem, ol i no laik insait long ami.
Long 1944, taim Wol Woa 2 i stap yet, mi no laik insait long wok ami, olsem na mi mas stap 2 na hap yia long kalabus long Luwisburg, Pennsylvania, long Amerika. Maski ol brata long Korea i karim bikpela hevi moa long kalabus, mi save pinis long wanem kain hevi ol dispela yangpela Witnes i karim. Planti i kisim strong taim ol i harim olsem sampela bilong mipela ol misineri long Korea i bin karim wankain hevi.—Ais. 2:4.
Traim i Painim Mipela
Pasin bilong mipela ol misineri yet long i no insait long ol samting bilong graun i insait long wanpela bikpela tok i kamap long 1977. Ol ofisa i ting mipela i bin stiaim tingting bilong ol yangpela bilong Korea long ol i no ken insait long pait na holim gan. Olsem na gavman i no laik givim tok orait long ol misineri long kam bek long Korea sapos ol i go raun long narapela kantri. Dispela tambu i kirap long 1977 na i pinis long 1987. Sapos mipela i bin lusim Korea insait long ol dispela yia, bai ol i no larim mipela i kam bek. Olsem na mipela i no go bek long ples bilong mipela insait long ol dispela yia.
Mipela i bung planti taim wantaim ol ofisa bilong gavman na kamapim bilip bilong mipela olsem mipela i disaipel bilong Krais, olsem na mipela i no laik insait long ol samting bilong graun. Bihain, ol i luksave olsem mipela i no inap pret na lusim bilip bilong mipela, olsem na dispela tambu i pinis—bihain long 10-pela yia. Insait long ol dispela yia, sampela misineri i mas lusim kantri, long wanem, sik i painim ol, tasol sampela bilong mipela i stap bek, na mipela i amamas olsem mipela i mekim olsem.
Long 1985 samting, ol lain husat i birua long wok autim tok bilong mipela, ol i giaman sutim tok long ol dairekta bilong koporesen bilong mipela, olsem ol i lainim ol yangpela man long no ken insait long ami. Dispela i mekim na gavman i singautim mipela wan wan bilong givim ol askim long mipela. Long Janueri 22, 1987, ol ofisa bilong kot i painimaut olsem tok ol i sutim i no gat as bilong en. Dispela i helpim mipela long stretim tok sapos sampela i sutim tok gen long mipela long bihain.
God i Blesim Wok Bilong Mipela
Long Korea, pasin birua long wok autim tok mipela i mekim i go bikpela moa long olgeta yia, long wanem, mipela i no laik insait long ami samting. Dispela i mekim na i hatwok tru long painim gutpela ples bilong wokim ol bikpela kibung bilong mipela. Olsem na ol Witnes i kirap mekim ol samting na ol i wokim wanpela Haus Kibung long Pusan, na em i namba wan Haus Kibung long Esia. Mi amamas tru long givim tok bilong dediketim dispela haus long Epril 5, 1976, long ai bilong 1,300 manmeri.
Kirap long 1950 na i kam, planti tausen soldia bilong Amerika i kam i stap na mekim wok soldia long Korea. Bihain taim ol i go bek long Amerika, planti i kamap Witnes. Planti taim mipela i save kisim pas long ol, na mipela i ting em i wanpela blesing bilong mipela long mipela i bin helpim ol long kisim save long Jehova.
Sori tru, gutpela poroman bilong mi, Liz, i dai long Septemba 26, 2006. Mi misim em tru. Insait long 51 yia em i stap long hia, em i amamas long kisim ol asainmen ol i givim na i no gat wanpela taim em i bin toktok planti long en. Em i no bin tok liklik olsem em i laik go bek long Amerika, em dispela ples bipo em i tok em i no laik lusim!
Mi stap yet olsem wanpela memba bilong famili Betel long Korea. Bipo famili Betel i liklik tru, tasol nau i gat inap olsem 250 long en. Mi amamas tru long wok wantaim 7-pela arapela insait long Brens Komiti i save lukautim wok long hia.
Taim mipela i bin kamap long Korea, kantri i bin stap rabis tru, tasol nau em i wanpela bilong ol kantri i gat gutpela sindaun tru. Winim 95,000 Witnes i stap long Korea, na klostu 40 pesen bilong ol i wok olsem painia oltaim o painia haptaim. Olgeta dispela samting i mekim na mi amamas long mi inap mekim wok bilong God long hia na lukim lain bilong God i go bikpela.
[Piksa long pes 24]
Mipela wantaim ol arapela misineri i kamap long Korea
[Piksa long pes 24, 25]
Mekim wok autim tok long Pusan
[Piksa long pes 25]
Mi na Brata Franz long hap ol ami i no ken go long en, 1971
[Piksa long pes 26]
Mi wantaim Liz paslain liklik long em i dai
[Piksa long pes 26]
Korea brens we mi stap yet olsem wanpela memba bilong famili Betel