As na Ol i Save Go Long Lotu
“RIPABLIK Bilong Korea i gat planti manmeri bilong lotu Presbitirian, winim namba long Amerika inap 4-pela taim.” Planti man i ritim dispela tok long nius Newsweek, ating ol i kirap nogut, long wanem, planti ol i ting ol Korea ol i bilong lotu Konfusas o Buda. Long nau, ol man i go raun long Korea ol bai lukim planti haus lotu ol i kolim Kristen, em ol i gat ol kruse i gat retpela lait long en. Long Sande yu inap lukim planti manmeri i wokabaut olsem tupela o tripela wantaim i go long lotu na ol i holim Baibel long han bilong ol. Long 1998, wanpela lain bilong skelim dispela samting ol i tok, inap olsem 30 pesen bilong ol lain bilong Korea i bilong lotu Katolik o narapela lotu i gat nem Kristen, winim ol man i tok ol i bilong lotu Buda.
Long nau yumi no save lukim planti manmeri i go lotu long olgeta wik olsem yumi lukim long Korea. Tasol nau dispela pasin i no kamap long Korea tasol—em i kamap tu long ol narapela kantri long Esia, na long Afrika na Latin Amerika. I gat wanem as na planti ol i save tok ol i bilip long God, taim planti lain long olgeta hap ol i les long lotu? Bilong wanem ol i save go long lotu?
Wanpela lain i kisim tingting bilong ol manmeri long Korea, ol i tok, winim 50 pesen bilong manmeri i save go long lotu, ol i wok long painim bel isi, na 30 pesen samting ol i wet long kisim laip i stap oltaim bihain long taim ol i dai, na wanpela long olgeta tenpela tenpela i tok ol i laik bai ol i no gat sik, na ol i laik kisim planti mani, na ol i laik bai wok bilong ol i kamap gutpela.
Long Saina planti manmeri i save go long lotu na bai ol i ken painim ol samting bilong spirit ol i lus long en taim pasin Komiunis i pinis na isi isi ol tingting bilong wok bisnis i kamap strong. Long olgeta yia ol i save wokim na tilim planti milion Baibel long Saina, na ol man i save givim bel long ritim olsem ol i bin ritim liklik retpela buk bilong Mao.
Sampela Katolik long Brasil, na moa yet ol yangpela, ol i no tingting long amamas ol inap kisim long laip bai kamap bihain—ol i laik kisim nau tasol. Nius Tudo i tok: “Long 1970 samting, nupela tingting long pasin bilong i stap fri i kirapim tru ol man, tasol long nau tingting bilong kisim planti mani na gutpela sindaun i save kirapim ol man.” Wanpela lain long Briten i askim ol lain bilong go long lotu long kolim wanpela samting long lotu bilong ol em ol i save laikim. Planti ol i tok ol i save laikim pasin bilong bung na pren wantaim.
Ol dispela samting i soim olsem, maski planti man i bilip yet long God, planti ol i tingting long ol samting nau ol inap kisim, na ol i no tingting tumas long samting bai kamap bihain, o long God yet. Orait yu ting wanem stretpela as bilong bilip long God? Baibel i tok wanem long dispela samting? Bai yu painim bekim long stori i kamap bihain long dispela.