Rot Namba 2
Kamapim Pasin Laikim Insait Long Famili
Bilong wanem yumi mas mekim olsem? Ol pikinini i mas pilim olsem papamama i laikim ol, tasol sapos ol i no pilim olsem, bai ol i no inap kamap gutpela. Long 1950 samting, saveman M. F. Ashley Montagu i tok: “Bikpela samting ol man i mas kisim bilong kamap gutpela, em pasin laikim bilong papamama; as na skin i stap gutpela, em pikinini i mas pilim olsem papamama i laikim em, na ol i mas kamapim moa yet dispela pasin i go inap long pikinini i gat 6-pela krismas.” Ol lain bilong skelim dispela samting ol i wanbel long tok bilong Montagu, em i tok “sapos papamama i no kamapim pasin laikim long pikinini, dispela i save nogutim tru skin na tingting bilong em.”
Hatwok bilong en: Ol famili i stap long dispela graun i no gat pasin laikim na ol man i save tingim ol yet tasol, olsem na i hatwok long famili i pas gut wantaim. (2 Timoti 3:1-5) Bikpela mani ol papamama i mas tromoi bilong mekim bikpela long ol pikinini, na hatwok bilong en, dispela inap mekim na sampela hevi bilong marit bai go bikpela. Olsem: Ating tupela marit i gat narapela narapela tingting long pasin bilong stretim ol pikinini, na praisim ol long taim ol i mekim gutpela pasin, na dispela inap mekim kros i kamap namel long tupela sapos ol i no save toktok gut wantaim.
Wanem samting inap helpim yu? Makim taim bilong famili i ken stap wantaim long olgeta taim. Na tupela marit i mas makim hap taim bilong tupela tasol i ken i stap wantaim. (Amos 3:3) Taim ol pikinini i slip pinis, em gutpela taim bilong tupela i ken sindaun na toktok wantaim. No ken larim TV i kisim dispela hap taim bilong yutupela. Bilong strongim pasin bilong narapela i laikim narapela insait long marit, planti taim narapela i mas tokaut long narapela olsem em i lewa tru bilong em. (Sindaun 25:11; Solomon 4:7-10) No ken wok oltaim long kamapim ol pasin kranki bilong poroman; long olgeta de wok long painim rot long litimapim nem bilong em.—Song 103:9, 10; Sindaun 31:28.
Tokim ol pikinini yu laikim ol tru. God Jehova i stap gutpela piksa bilong ol papamama taim em i tokaut olsem em i laikim tumas Pikinini bilong em, Jisas. (Matyu 3:17; 17:5) Fleck, em wanpela papa i stap long Ostria, em i tok: “Mi lukim olsem ol pikinini i wankain olsem sampela plaua. Ol dispela liklik plaua i save tanim pes i go long san bilong kisim lait na hat bilong san, na olsem tasol ol pikinini i laik bai papamama i laikim ol na tokim ol olsem ol i gutpela samting tru bilong famili.”
Maski yu marit o yu wanpela papa o mama i stap wanpis, sapos yu helpim ol pikinini long kisim pasin bilong narapela i laikim tru narapela na laikim tru God, i stap bilong famili bilong yu bai i kamap gutpela.
Tasol Baibel i tok wanem long papamama i mekim wok bilong stretim na bosim ol pikinini?
[Rait long pes 4]
“Pasin bilong laikim tru ol narapela . . . i nambawan pasin bilong mekim ol man i stap wanbel.”—Kolosi 3:14, NW