Ol Yangpela i Laik Save
Olsem Wanem Mi Inap Karim Hevi Sapos Mi Gat Sik?
BUK Sindaun 20:29 i tok: “Gutpela samting bilong ol yangpela em strong bilong ol.” (The Jerusalem Bible) Sapos yu gat sik o sampela hap bilong skin bilong yu i bagarap, ating yu pilim olsem dispela skripsa i no stret long yu. Tasol tok bilong dispela skripsa inap makim yu tu! Planti yangpela em sampela hap bilong skin bilong ol i bagarap, o ol i gat bikpela sik, ol i bin winim ol bikpela hevi. Kirap! i toktok wantaim 4-pela yangpela em ol i gat kain hevi olsem.
Hiroki, long Japan, i bin karim hevi bilong sik bilong kru (cerebral palsy) kirap long taim mama i karim em. Em i tok: “Ol masol long nek bilong mi i no gat strong long sapotim het bilong mi long i stap stret, na tupela han bilong mi i no inap mekim samting mi laik bai ol i mekim. Ol narapela i mas mekim olgeta samting bilong helpim mi.”
Natalie na brata bilong em, James, long Saut Afrika, i bon wantaim wanpela kain sik i mekim na ol i sotpela tru. Na tu, Natalie i kisim wanpela sik i mekim bun bilong baksait bilong em i krungut. Em i tok: “Mi kisim pinis 4-pela operesen long bun bilong baksait bilong mi, na waitlewa bilong mi i no gat strong, long wanem, baksait bilong mi i krungut.”
Timothy, long Briten, i kisim sik chronic fatigue syndrome taim em i gat 17 krismas. Em i tok: “Insait long tupela mun ol samting i senis. Bipo mi no gat sik na mi mekim planti samting, tasol bihain skin bilong mi i no gat strong na mi no inap sanap o wokabaut.”
Danielle, long Australia, i kisim sik daiabitis taim em i gat 19 krismas. Em i tok: “Ol mak bilong sik daiabitis i no stap ples klia, olsem na ol man i no inap luksave olsem dispela sik em i bikpela sik. Tasol dispela sik inap kilim mi i dai.”
Sapos yu gat sik o sampela hap bilong skin bilong yu i bagarap, tok bilong Hiroki, Natalie, Timothy, na Danielle bai strongim bel bilong yu. Sapos yu no gat sik, tok bilong ol dispela yangpela bai helpim yu long pilim tru hevi bilong ol lain i gat sik o bagarap long skin.
Kirap!: Wanem hevi long sik bilong yu i hatwok tru long karim?
Natalie: Samting i hatwok long mi, em pasin ol man i save mekim taim ol i lukim mi. Bel bilong mi i no save stap isi. Mi pilim olsem olgeta taim ol man i lukluk strong long mi.
Danielle: Hevi bilong sik daiabitis em olsem mi mas skelim wanem kain kaikai mi ken kisim, hamas kaikai mi ken kisim, na wanem ol kaikai mi no ken kaikai planti. Sapos mi no was gut long kaikai bilong mi, mak bilong suga long blut bilong mi inap go daun tru na dispela inap mekim na tingting bilong mi i dai.
Hiroki: Mi gat wanpela spesel wilsia ol i wokim na i stret long bodi bilong mi, na inap 15 aua long olgeta wan wan de mi save stap long wankain hap tasol, mi no inap meknais liklik. Na tu, mi no save slip gut. Liklik pairap tasol i save kirapim mi.
Timothy: Pastaim samting i hatwok long mi, em mi mas tingim olsem mi gat sik. Mi sem long dispela sik bilong mi.
Kirap!: Wanem ol narapela hevi yu mas karim?
Danielle: Sik daiabitis i save mekim na mi taiet stret. Mi mas slip planti aua, winim ol wankrismas bilong mi. Na tu, sik daiabitis i no gat marasin bilong pinisim.
Natalie: Mi sotpela tru na dispela i putim hevi long mi. I hatwok long mi mekim ol samting bilong wan wan de—olsem kisim ol samting i stap long self long stua. Taim mi wanpela tasol i go long stua bilong baim ol samting, dispela i givim mi bikpela hatwok tru.
Timothy: Mi mas karim pen long olgeta taim, na sampela taim mi kisim bikpela bel hevi. Paslain long mi kisim sik, mi wanpela man bilong mekim planti samting. Mi gat wok mani na laisens bilong draiv. Mi save pilai soka na narapela pilai tu. Tasol nau mi stap long wilsia.
Hiroki: Sik bilong mi i mekim na mi no inap toktok gut. Dispela i mekim na mi save surik long toktok wantaim ol arapela. Mi no inap bosim han bilong mi, olsem na sampela taim mi popaia na paitim narapela. Taim dispela samting i kamap, mi no inap tok sori, long wanem, mi no inap long toktok gut.
Kirap!: Wanem samting i helpim yu long karim hevi bilong yu?
Danielle: Mi tingim ol gutpela samting long i stap bilong mi. Mi gat gutpela famili, ol gutpela pren insait long kongrigesen na bikpela samting moa, God Jehova i save strongim mi. Mi save ritim ol nupela save long sik daiabitis long olsem wanem mi ken lukautim mi yet. Mi yet i save mekim ol samting bilong lukautim gut skin bilong mi.
Natalie: Beten i save givim strong long mi. Mi traim long stretim wanpela hevi pastaim na bihain stretim narapela. Mi save mekim planti wok na dispela i helpim mi na mi no tingting tumas long ol hevi bilong mi yet. Na mi gat 2-pela gutpela papamama em mi ken kamapim tingting bilong mi long ol.
Timothy: Long olgeta de mi save mekim sampela samting bilong lotu, maski em sotpela taim tasol. Olsem: Long olgeta de, mi save skelim teks bilong de. Pasin bilong stadi long Baibel na beten, tupela i bikpela samting long mi, na moa yet long taim mi pilim bel hevi tru.
Hiroki: Mi no save wari long ol samting em mi no inap mekim wanpela samting long en. Taim bai lus nating sapos mi mekim olsem. Mi save mekim olgeta samting mi inap mekim bilong pas gut wantaim God, na mi no save tok sik bilong mi i mekim na mi no inap stadi long Baibel. Taim mi no inap long slip, mi save tingim dispela i olsem rot bilong mi long beten.—Lukim Rom 12:12.
Kirap!: Olsem wanem ol narapela i strongim yu?
Hiroki: Oltaim ol elda i save tok amamas long mi maski mi mekim liklik samting tasol. Na tu, ol brata na sista long kongrigesen i save kisim mi i go wantaim ol long ol gobek na Baibel stadi bilong ol.—Lukim Rom 12:10.
Danielle: Wanpela samting mi save pilim tru long bel, em taim ol brata na sista long kongrigesen i tok amamas long mi. Dispela i mekim na mi pilim olsem ol arapela i laikim mi, na dispela i kirapim mi long wok strong yet.
Timothy: I gat wanpela lapun sista i save toktok wantaim mi long ol miting. Ol elda na meri bilong ol i save strongim mi na kamapim sampela gutpela tok bilong helpim mi. Wanpela elda husat i gat 84 krismas, em i bin helpim mi long putim ol mak mi inap winim. Wanpela kongrigesen sevan i singautim mi long wok wantaim em long autim tok, na em i stretim rot long mitupela i ken autim tok long wanpela ples i stret na i isi long mi raun long wilsia.—Lukim Song 55:22.
Natalie: Taim mi go insait long Haus Kingdom, ol brata na sista long kongrigesen i save smail na tok gude long mi. Olgeta taim ol lapun bratasista i save mekim sampela tok bilong strongim mi maski ol yet i gat hevi.—Lukim 2 Korin 4:16, 17.
Kirap!: Wanem samting i helpim yu long holim stretpela tingting?
Hiroki: Mi wanpela Witnes Bilong Jehova, olsem na mi save bung wantaim ol manmeri em ol i wetim gutpela samting bai kamap bihain. Taim mi luksave olsem mi insait long wanpela gutpela oganaisesen, dispela i helpim mi long holim stretpela tingting.—Lukim 2 Stori 15:7.
Danielle: Mi tingim gutpela samting mi gat, em mi kliagut long ol samting God i tingting pinis long kamapim. I gat ol manmeri em ol i no gat sik, tasol ol i no amamas long laip bilong ol olsem mi amamas long laip bilong mi.—Lukim Sindaun 15:15.
Natalie: Mi luksave olsem em i bikpela samting long mi stap wantaim ol manmeri i gat gutpela tingting. Mi save amamas long ritim ol ekspiriens bilong ol arapela em ol i mekim wok bilong Jehova maski ol i gat ol hevi. Na taim mi go long Haus Kingdom, mi save olsem olgeta taim dispela bai strongim mi na i kirapim mi long tingim olsem em i gutpela samting tru long i stap olsem wanpela Witnes Bilong Jehova.—Lukim Hibru 10:24, 25.
Timothy: Namba 1 Korin 10:13 i tok olsem Jehova bai i no inap larim wanpela hevi i kamap, em i winim strong bilong yumi. Mi tingting olsem sapos Man Bilong Wokim mi i bilip olsem mi inap karim dispela hevi, orait i no stret mi ting olsem mi no inap karim dispela hevi.
SAMTING BILONG TINGIM
◼ Hiroki na Timothy, tupela wantaim i save sindaun long wilsia. Sapos yu tu i gat wankain hevi olsem tupela, olsem wanem tok bilong tupela i ken helpim yu long holim stretpela tingting?
◼ Danielle i tok olsem “ol mak bilong sik daiabitis i no stap ples klia, olsem na ol man i no inap luksave olsem dispela sik em i bikpela sik.” Olsem wanem? Yu tu i gat wanpela sik em ol man i no inap luksave long en? Sapos olsem, yu inap lainim wanem samting long tok Danielle i mekim?
◼ Natalie i tok olsem wanpela bikpela hevi em i mas karim em pasin ol man i save mekim taim ol i lukim em. Olsem wanem yu inap helpim wanpela husat i gat kain sik olsem bilong Natalie long i stap bel isi? Sapos yu gat wanpela sik o sampela bagarap long skin i mekim na yu pilim wankain olsem Natalie, olsem wanem yu ken bihainim gutpela tingting bilong em?
◼ Raitim nem bilong ol manmeri yu save long ol em ol i gat bagarap long skin o bikpela sik.
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
◼ Yu ken mekim wanem bilong strongim olgeta wan wan?
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
[Blok long pes 17]
Ol Tok Bilong Baibel i Mekim Gut Bel
◼ Jisas i sori tru long ol man i gat sik.—Mak 1:41.
◼ Taim Jisas i “mekim orait olgeta sik na olgeta samting i bagarapim bodi,” em i kamapim klia olsem olgeta sik bai pinis long taim Kingdom Bilong God i bosim graun.—Matyu 4:23.
◼ Long nupela taim God bai kamapim, “i no gat man . . . bai i tok olsem, ‘Mi gat sik,’ ” na ol man bai i no inap kisim pen gen.—Aisaia 33:24; KTH 21:1-4.
◼ “Em bai i pinisim dai tu.”—1 Korin 15:25, 26.
[Piksa long pes 16]
Hiroki, 23 Japan
[Piksa long pes 16]
Natalie, 20 Saut Afrika
[Piksa long pes 16]
Timothy, 20 Briten
[Piksa long pes 16]
Danielle, 24 Australia