Ol Yangpela i Laik Save . . .

Bilong Wanem Bikpela Sik i Painim Mi?

TAIM Jason i gat 13 krismas, em i ting taim em i bikpela pinis em bai go wok long Betel, em nambawan ofis bilong ol Witnes Bilong Jehova long Bruklin, Nu Yok. Em i bin wokim long diwai wanpela bokis na kolim olsem, bokis bilong Betel. Em i bin wok long bungim ol samting em i ting em bai mekim wok long en taim em i go long Betel, na em i save putim insait long dispela bokis.

Tasol 3-pela mun bihain long em i kisim 18 krismas, dokta i tokim Jason em i gat wanpela sik long bel ol i kolim sik krons. Man i kisim dispela kain sik i save kisim bikpela pen long olgeta taim. Jason i tok: “Taim mi save mi gat sik, bel bilong mi i bagarap stret. Mi inap mekim wanpela samting tasol, em telefon long papa long ples wok na krai. Mi save, dispela sik i pasim rot bilong mi ken truim laik bilong mi long go long Betel.”

Sik i wanpela as na “olgeta samting God i bin wokim, olgeta i pilim pen . . . na olgeta i krai nogut i stap, i kam inap long nau.” (Rom 8:22) Long ol man i gat sik, planti milion bilong ol em ol yangpela. Skin bilong planti yangpela i save orait bek, tasol sampela i mas karim hevi bilong bikpela sik, o sampela i gat wanpela sik em inap bagarapim ol. Sampela sik i save painim planti yangpela em sik sotwin, daiabitis, sot tru long blut, epilepsi, kensa, sik bilong tingting, na sik i save kalap long ol man. Sampela yangpela i gat 2-pela o 3-pela sik.

‘Bilong Wanem Dispela i Painim Mi?’

Planti taim sik i mekim na tingting, bel, na skin tu i bagarap. Olsem: Sapos yu sik na yu no skul inap sampela mun, bai yu hatwok long inapim ol dispela mun yu no bin skul, a? Na yu inap pilim olsem yu lus long stap wantaim ol pren bilong yu. Sunny i gat 12-pela krismas, na taim em i no inap skul, long wanem, em i mas slip long haus sik, em i save tingting planti olsem: ‘Ol wanklas bilong mi i mekim wanem? Nau long dispela de mi lus long wanem samting?’

Na yu inap pilim olsem yu no kamap strong long samting bilong spirit taim bikpela sik i painim yu na yu no gat strong bilong i go long ol miting Kristen o long kaunim Baibel. Long kain taim olsem yu mas kisim sampela helpim moa bilong strongim bel na bilip bilong yu. Ating pastaim yu no bilipim tok bilong dokta olsem yu gat sik. Bihain, yu inap belhat​—⁠ating long yu yet​—⁠na ting sapos yu bin mekim wanpela samting, dispela sik i no inap painim yu. Ating yu laik singaut olsem: ‘Bilong wanem God i larim dispela samting i painim mi?’ (Skelim wantaim Matyu 27:46.) Kain bel hevi olsem i save kamap.

Na tu, wanpela yangpela inap ting sapos em i taitim bun, olsem wok long mekim gutpela pasin moa, God bai pinisim sik bilong em. Tasol dispela kain tingting inap mekim na yu bai bel hevi moa, long wanem, God i no tok promis long kamapim mirakel long dispela taim.​—⁠1 Korin 12:30; 13:​8, 13.

Ating yu bin ting gutpela samting inap kamap na yu no ken i dai​—⁠yu bai stap laip taim God i kamapim ‘bikpela hevi tru.’ (KTH 7:​14, 15, NW; Jon 11:26) Sapos olsem, taim yu save yu gat wanpela sik em inap kilim yu i dai, bel bilong yu inap bagarap stret. Yu inap ting yu bin mekim wanpela samting Jehova i no laikim, o yu inap ting God i bin makim yu bilong traim yu​—⁠yu stap gut long em o nogat. Tasol ol dispela kain tingting i no stret. Baibel i tok: “Sin i no inap pulim God, na God i no save pulim man long mekim sin.” (Jems 1:13) Sik na indai em sampela samting nogut i save painim yumi ol man long nau, na “taim nogut i save painim yumi olgeta.”​—⁠Saveman 9:⁠11.

Karim Hevi Bilong Pret

Taim bikpela sik i painim yu ating nau em namba wan taim yu pret nogut tru. Buk How It Feels to Fight for Your Life i stori long tingting bilong 14 yangpela em ol i gat bikpela sik. Olsem: Anton em i gat 10-pela krismas na em i pret em bai dai taim bikpela sik sotwin i painim em. Elizabeth em i gat 16 krismas na em i gat sik kensa long bun. Em i pret long slip, nogut em i no kirap long slip.

Tasol pret bilong sampela yangpela i narakain​—⁠ol i pret wanpela i no laik maritim ol o bihain taim ol i marit ol i no ken kamapim ol pikinini i gat strongpela skin. Sampela yangpela i pret sik bilong ol bai kalap long ol wanfamili, maski sik bilong ol inap mekim olsem o nogat.

Maski sik i orait liklik o strong bilong sik i go daun, sapos sik i kirap gen, pret bilong yu inap kamap gen. Sapos kain pret olsem i bin painim yu, yu save em i samting tru. Pastaim bel na tingting i bagarap stret, tasol bihain isi isi dispela bel hevi bai wok long pinis. Long dispela taim yu inap skelim gut i stap bilong yu.

Karim Hevi Bilong Sik

Jason, em bipo yumi bin stori long em, em i tok: “Taim yu yangpela yu ting yu strong na yu inap mekim olgeta samting. Tasol wantu bikpela sik i painim yu na yu no gat moa dispela kain tingting. Yu pilim olsem long wanpela nait tasol yu bin kamap lapun, long wanem, yu no inap mekim planti samting yu bin mekim bipo.” Tru tumas, i hatwok tru taim yu no inap mekim olgeta samting.

Narapela bikpela hevi i bin painim Jason, em taim ol narapela i hatwok long save olsem em i sik. Jason em i gat wanpela sik i no stap ples klia. Ol man i lukim skin bilong em na ol i ting em i no gat sik. Jason i tok: “Bodi bilong mi i no inap mekim gut wok bilong en long kaikai, olsem na planti taim mi mas kaikai na mi mas kisim bikpela kaikai. Tasol maski mi kaikai olsem, skin bilong mi i no gat gris, mi bun nating. Na sampela taim long san, skin bilong mi i les tru na ai bilong mi i hevi. Tasol tok bilong sampela i kamapim klia olsem ol i ting mi save kaikai planti tumas o mi lesman. Ol i tok olsem: ‘Yu save yu inap mekim gutpela wok moa. Yu no laik mekim!’ ”

Jason em i gat sampela yangpela brata na susa, na sampela taim ol i no save bilong wanem em i no inap mekim ol samting bipo em i bin mekim, olsem pilai bal wantaim ol. Jason i tok: “Mi save, sapos hap bagarap i painim mi, skin bilong mi i no ken orait hariap, sampela wik i mas lus pastaim. Ol i ting pen bilong ol i wankain long pen bilong mi, na ol i save tok, ‘Em i toktok planti inap long mipela i ken sori long em.’ Ating bikpela pen ol i bin pilim em taim lek i tanim​—⁠em tasol. Olsem na ol i no inap save tru long bikpela pen bilong mi.”

Sapos yu pilim olsem sik bilong yu i putim hevi long famili, bel inap kotim yu, a? Bel bilong papamama tu inap kotim ol. Jason i tok: “Papa na mama i ting ol i bin givim sik long mi. Planti yangpela i save lain long karim hevi bilong wanpela sik taim ol i save em i wanpela sik tru i stap long ol. Tasol i hatwok moa long papamama i mekim olsem. Olgeta taim papamama bilong mi ol i save tok sori long mi. Mi mas wok strong long olgeta taim long tokim ol sik bilong mi i no asua bilong ol.”

Lukim Dokta i No Samting Bilong Amamas

Yu inap bel hevi tru sapos olgeta taim yu mas go lukim dokta. Yu inap pilim olsem yu lus olgeta na i no gat rot bilong helpim yu. Maski yu sindaun tasol na wetim dokta, yu inap pret nogut tru. Joseph i gat 14 krismas na em i gat sik bilong klok, em i tok: ‘Mi pilim olsem mi wanpis na i gutpela sapos wanpela i stap wantaim mi.’ Sori tru, sampela yangpela olsem ol i no gat wanpela i save helpim ol, na papamama tu i no save helpim ol.

Na yu inap tingting planti taim dokta i glasim skin bilong yu. Sampela samting dokta i mas mekim i no samting bilong amamas long en. Na bihain, ating yu bai tingting planti taim yu mas wet sampela de o wik bilong kisim toksave long sik bilong yu. Tasol tingim: Samting dokta i mekim i no wankain long wokim tes long skul; sik i no makim olsem yu pundaun long winim mak.

Samting dokta i mekim bilong glasim skin em inap kamapim gutpela samting olsem: Em inap makim klia olsem yu gat wanpela sik i no hatwok long stretim. O sapos nogat, em inap kamapim klia wanem samting yu mas mekim long sik bilong yu. O em inap kamapim klia olsem yu no gat wanpela sik bipo dokta i ting yu bin kisim. Olsem na tingting gut​—⁠nogut yu no save gut long sik bilong yu na yu kisim tingting kranki.

Sapos yu tingting planti tumas, skin bilong yu bai i no gat strong moa. Baibel i tok: “Sapos man i save wari oltaim, em bai i bel hevi tru na tingting bilong en bai i bagarap.” (Sindaun 12:25) God i singautim yumi long kamapim bel bilong yumi long ol samting yumi save tingting planti long en. Yumi mas bilip olsem em i save tingim yumi, na em bai stiaim yumi na givim save long yumi long gutpela rot bilong karim hevi bilong yumi.​—⁠Song 41:3; Sindaun 3:​5, 6; Filipai 4:​6, 7; Jems 1:⁠5.

Yumi ken amamas olsem Man bilong wokim yumi, God Jehova, em i bin stretim rot bilong kamapim nupela stretpela taim. Na tu, em bai kirapim bek ol man i bin dai pinis inap long ol i ken amamas long dispela nupela taim. Baibel i tok long dispela taim olsem: “I no gat man . . . bai i tok olsem, ‘Mi gat sik.’ ”​—⁠Aisaia 33:⁠24.

Inap long dispela taim i kamap, ating yu mas karim hevi bilong bikpela sik. Tasol i gat planti gutpela samting yu inap mekim na yu no ken les long i stap bilong yu.

[Piksa long pes 18]

Ating bai yu askim olsem: ‘Bilong wanem God i larim dispela samting i painim mi?’