Taim Yu Gat Bikpela Sik

“Taim mi harim olsem mi gat sik kensa long waitlewa na bel, mi save olsem mi bai dai. Tasol taim mi lusim dokta na kam bek long haus, mi tingting ‘OK, em i no samting mi ekspektim, tasol mi mas painim rot bilong karim dispela hevi.’”—Linda, 71 krismas.

“Mi karim pen na hevi long sik bilong ol nev i bagarap long left sait long pes bilong mi. Sampela taim, bikpela pen i mekim na mi kisim sik dipresen. Planti taim, mi pilim olsem mi stap wanpis, na mi tingting long suasaid.”—Elise, 49 krismas.

Sikman i sindaun long wilsia na lain i laikim em i sanap raunim em

SAPOS yu o wanpela yu laikim tru i kisim wanpela sik em bai dai long en, yu save dispela inap givim bikpela bel hevi tru. Antap long dispela sik, yu mas tingim gut bel na tingting bilong sikman tu. Pret, wari na tingting planti inap kamap bikpela bikos long ol apoinmen bilong lukim dokta, hatwok long baim ol marasin, o ol sik em marasin inap kamapim. Bikpela sik inap mekim man i tingting planti, dispela inap daunim em tru.

Bai yumi go we bilong kisim helpim? Planti i pilim olsem, ol i kisim bel isi tru taim ol trastim God na beten long em, na ritim ol gutpela tok bilong Baibel we i save mekim isi bel. Narapela helpim i kam long rot bilong pasin laikim na sapot bilong famili na ol pren.

HAU SAMPELA I KARIM HEVI

Robert, i gat 58 krismas, i givim dispela edvais: “Feisim sik na putim bilip bilong yu long God, na em bai helpim yu long karim hevi. Beten long Jehova. Tokim em long filings bilong yu. Askim em long holi spirit. Askim em long givim strong long yu bai yu ken strongim famili, na helpim yu long stap isi na karim hevi bilong sik bilong yu.”

Robert i tok: “Em i bikpela samting tru taim famili i stap wantaim yu na strongim bel na tingting bilong yu. Olgeta de, wanpela o tupela i save ringim mi na askim, ‘Yu pilim olsem wanem?’ Ol pren long ol narapela narapela hap i save strongim mi. Ol i mekim mi i pilim gutpela, na dispela i helpim mi long no ken givap.”

Sapos yu wanpela pren i visitim wanpela sikman, tingim tok Linda i mekim: “Yu mas save olsem sikman i laik bai laip bilong em i nomol na ating em i no laik toktok long sik. So toktok long ol samting em yupela i save toktok long en.”

Strong i kam long God na bel isi i kam long ol tok bilong Baibel, na tu, sapot bilong famili na ol pren, dispela inap strongim yumi olsem i gat risen na i gutpela long stap laip maski yumi karim hevi bilong bikpela sik.

Ol Baibel Ves Inap Helpim Yu

Trastim God.

“Mi prea long Jehova na em i harim prea bilong mi. Em i rausim olgeta pret bilong mi, na mi no pret moa. Man i no gat nem i singaut na Jehova i harim em.”—Buk Song 34:4, 6.

Linda, em yumi bin stori pinis, i tok: “Mi no save beten olsem, ‘Mekim mi kamap orait,’ nogat. Mi save beten olsem, ‘Helpim mi long strongim bel, na helpim mi long karim hevi bilong sik bilong mi.’”

Kisim Strong Long Tok Bilong God.

“No gat wanpela man i stap long dispela ples bai tok: ‘Mi sik.’”—Aisaia 33:24.

Dispela hop bilong ol gutpela samting bai kamap bihain i gat strong taim yu tingim tingim long bel ol tok promis bilong God.

Kisim helpim long famili na ol pren.

“Trupela pren i save soim pasin laikim long olgeta taim na em i kamap olsem brata bilong yu long taim bilong hevi.”—Provep 17:17.

Elise, em yumi bin stori pinis, i tok: “No ken stap yu yet. Larim ol pren bilong yu i helpim yu. I gat taim we yu inap pilim olsem yu stap wanpis, na yu inap ting God i no putim yau long yu, tasol no ken stap yu yet.