“Tudak i Kamap Taim San i Lait Yet”
DISPELA STORI I KAM LONG BENIN
“MAN! Planti Milion Manmeri i Kirap Nogut Long Iklips Bilong San.” Dispela em het tok bilong nius Daily Graphic bilong Gana, long de bihain long taim mun i pasim ai olgeta bilong san (em samting yumi kolim iklips) long Mas 29, 2006. Dispela iklips, em ol man long hap is bilong Brasil ol i namba wan lain bilong lukim, em i spit tru inap 1,600 kilomita long wanpela aua na brukim solwara Atlantik. Long 8 klok moningtaim em i kamap long Gana, Togo, na Benin. Long ol dispela kantri long hap wes bilong Afrika, dispela iklips i luk olsem wanem?
Laspela taim ol man long Gana i bin lukim mun i pasim ai olgeta bilong san, em long 1947. Theodore, em i gat 27 krismas long dispela taim, em i tok: “Planti manmeri long dispela taim ol i no bin lukim iklips bipo, olsem na ol i no kliagut wanem samting i wok long kamap. Olsem na ol i tok ‘tudak i kamap taim san i lait yet.’ ”
Pablik-Awenes Kempein
Ol bikman bilong gavman ol i kamapim wanpela pablik-awenes kempein bilong tokaut long ol hevi em pasin bilong lukluk long san long taim bilong iklips inap kamapim. Long Togo ol i putim planti toksave nabaut, i tok: “Lukautim gut ai bilong yu! Nogut yu kamap aipas!”
Ol bikman bilong gavman ol i kolim 2-pela samting ol man i mas mekim: Namba wan, stap insait long haus na lukim iklips long televisen. Namba tu, sapos man i go ausait, em i mas pasim wanpela kain aiglas bilong lukautim ai. Planti milion manmeri ol i lukim piksa bilong iklips long televisen na kompiuta. Tasol ol piksa long televisen na kompiuta i no inap kamapim ol samting ol man i bin pilim paslain na bihain long iklips. Orait nau yumi ken stori long samting i bin kamap.
Ol i Amamas Long Wetim
Long Wes Afrika long dispela moningtaim, skai i luk wankain olsem lukluk bilong en long olgeta moning—san i lait strong na i gat blupela skai. Olsem wanem? Tru dispela samting bai kamap na mun i haitim san? Klostu long taim bilong iklips, ol man i stap ausait ol i putim aiglas na lukluk i go antap. Sampela ol i yusim mobail bilong askim ol wantok long ol narapela hap long ol inap lukim wanem samting.
Inap 350,000 kilomita antap, mun, em pastaim ol man i no inap lukim, em i wok long go klostu long hap we iklips bai kamap. Orait nau, olsem wantu, liklik hap bilong mun i kamap ples klia, tasol i luk blakpela. Mun i stat long haitim san. Amamas bilong ol man i lukim em i go bikpela moa.
Insait long namba wan aua, i no gat senis i kamap long ples. Tasol taim mun i wok long haitim san, blupela skai i stat long kamap tudak. Ples i wok long kamap kol. Ol sekiuriti lait i kirap lait. I no gat man i wokabaut long rot. Ol stua i pas. Ol pisin i stap isi. Ol animal i redi long slip. Klostu nau bikpela tudak tru bai kamap. Orait nau mun i pasim ai olgeta bilong san. Olgeta samting i stap isi, na no gat nois liklik.
Ol i No Inap Lusim Tingting
Ol sta i lait. Lait bilong san i raunim blakpela mun. Dispela lait i waitpela na i luk nais tru. Na tu, i gat kain kain retpela lait i sut i go i kam. Wanpela man i lukim dispela samting em i tok: “Bipo mi no bin lukim kain gutpela samting olsem—dispela em i wanpela naispela samting tru.”
Inap 3-pela minit, mun i pasim ai olgeta bilong san. Bihain, san i stat long kamap klia gen. Planti man i paitim han na singaut amamas. Skai i wok long kamap lait gen, na ol sta i go pinis. Em nau, dispela narakain tudak i pinis.
Oltaim “mun i stap long skai” na i bihainim stret wokabaut bilong en. Olsem na sampela handet yia paslain long mun i haitim san, ol man inap save wanem taim iklips bai kamap. (Song 89:37) Ol man long Wes Afrika i bin wet 60 yia bilong dispela iklips i ken kamap. Neks iklips ol man long Wes Afrika inap lukim bai kamap long yia 2081. Em bai i gutpela sapos wanpela iklips i ken kamap long hap bilong yu paslain long dispela yia.
[Blok/Piksa long pes 29]
Mun i Pasim San Taim Jisas i Dai o Olsem Wanem?
Mak 15:33 i tok: “Long 12 klok, tudak i karamapim graun olgeta, i go inap long 3 klok long apinun.” Dispela tudak inap 3-pela aua, kirap long 12 klok belo i go inap 3 klok apinun, em i bin kamap long rot bilong mirakel. I gat tupela samting na yumi ken save dispela tudak i no bin kamap long rot bilong iklips. Namba wan: Taim mun i pasim ai bilong san, tudak i save stap sampela minit tasol, olsem 7 na hap minit. Namba tu: Jisas i bin dai long de 14 bilong mun Nisan. De wan bilong mun Nisan i save kamap taim mun i nupela. Long dispela taim, mun i stap namel long graun na san na iklips inap kamap. Orait nau mun i wok long raunim graun. Long de 14 bilong Nisan, mun i kamap long narapela sait bilong graun. Nau graun i stap namel long san na mun na mun i kisim lait bilong san na i lait tru. Olsem na ai bilong mun i bikpela, na dispela i naispela samting tru long lukim long taim bilong mekim Memorial bilong tingim dai bilong Jisas.
[Piksa]
Nisan 14 i save kamap taim ai bilong mun i bikpela
[Sat/Mep long pes 28, 29]
(Bilong save ol dispela rait i stap we long pes, lukim buk o magasin)
Raun bilong iklips
●
⇧
●
⇧
●
⇧ AFRIKA
BENIN ●
⇧
TOGO ●
⇧
GANA ●
⇧
●
⇧
●
⇧
●
⇧
●
⇧
●
[Kredit Lain]
Map: Based on NASA/Visible Earth imagery
[Piksa long pes 28]
Mun i pasim san, long Mas 29, 2006
[Piksa long pes 28]
Ol man i putim aiglas bilong lukautim ai na ol inap lukim iklips