Baibel i Tok Wanem?

As na Yu Mas Sakim Wok Bilong Ol Spirit

LONG wanpela kantri long Esia, bikpela lain manmeri i mekim wanpela bung bilong givim ona long ol spirit. Bikpela samting bilong dispela bung em taim ol i makim tupela meri na bai ol spirit i go insait long ol. Ai bilong tupela i tanim i go insait na skin bilong ol i guria nogut tru, i olsem pawa i kisim ol.

Long Pueto Riko, wanpela glasman (santero) i holim wanpela bung bilong toktok wantaim wanpela spirit nem bilong en Changó, em god bilong klaut i pairap. Glasman i tokaut long samting em i lukim olsem driman, na ol manmeri i stap long haus, skin bilong ol i guria, i olsem ol spirit i go insait long ol.

Long nau, ol manmeri long planti kantri ol i insait long wok bilong ol spirit. Planti man moa i bilip olsem i gat wanpela narakain strong i stap na i mekim wok, na ol i gat laik long save long en. Ol buk, ol pilai, ol piksa long TV, na ol muvi em ol i kamapim stori bilong ol spirit, pasin sanguma, na ol samting i kamap long narakain strong, dispela i go bikpela moa long nau winim bipo.

Baibel i skulim yumi olsem sapos yumi insait long kain samting olsem, yumi insait long wok bilong ol spirit nogut. Wok bilong ol spirit em i no samting bilong amamas o painim save tasol long samting man i no save long en, nogat, em i samting nogut. Man i insait long wok bilong ol spirit nogut, em i save wok wantaim ol ensel nogut em ol i bin bikhet long God.​​—⁠KTH 12:​9, 12.

Tru tumas, wok bilong ol spirit i save helpim ol spirit nogut wankain olsem guma i save helpim ol man bilong kisim pis. Man bilong kisim pis i yusim kain kain guma bilong kisim kain kain pis. Olsem tasol, ol spirit nogut i save yusim kain kain rot bilong pulim kain kain man long i stap aninit long ol. Baibel i kolim gopas bilong ol spirit nogut olsem “giaman god bilong dispela graun.” Em i save mekim gut wok bilong pasim tingting bilong ol man i no bilip na ol i no ken save long tok i tru bilong God na ol samting God i laik kamapim.​​—⁠2 Korin 4:⁠4.

Samting Wok Bilong Ol Spirit i Mekim Long Ol Man

Astingting bilong ol spirit nogut em olsem: Ol i laik paulim na pulim yumi na bai yumi no ken pas gut wantaim Man Bilong Wokim yumi. Ol i kirapim ol man long sakim ol stretpela lo bilong God, maski ol man yet i no save long dispela. Olsem na God i no orait long ol man i insait long wok bilong ol spirit, na ol i no gat gutpela samting bilong wetim i kamap, na bihain ol bai kisim bagarap.​​—⁠KTH 21:⁠8.

Luis, bilong Pueto Riko, em i tok: “Taim mi liklik, famili bilong mi i save insait long wok bilong ol spirit. Em hap lotu bilong famili bilong mipela na pasin mipela i save bihainim. Mi ting pasin bilong mi long tokaut long samting bai kamap bihain na pasin bilong ritim kas tarot, em i stret. Planti taim mi inap makim ol namba bilong pilai loto na helpim ol man long winim mani. Ol dispela pasin em mi ting ol i olsem presen, ol i bin pasim mi long kisim save long Baibel na pas gut wantaim God.”​​—⁠Jon 17:⁠3.

Planti man i ting wok bilong ol spirit i no inap kamapim hevi, em inap helpim ol. Ol inap tok i gat ol spirit i save kamapim ol gutpela samting, o ol i tok wok bilong ol spirit inap helpim ol long kisim gutpela save, planti mani kago, o amamas. Dispela tingting em i no stret liklik, nogat tru. Luis i tok: “Long olgeta taim bai yu kisim nogut long dispela samting.”

Wanpela yangpela man, nem bilong em Chad, em i kirap lukim ol samting i mekim em i pret tru na long olgeta taim dispela i save kirapim em long slip. Em i tok: “Ol spirit nogut i bin mekim nogut tru long mi long olgeta nait.” Yumi ken mekim wanem na bai ol spirit nogut i no ken bagarapim yumi?

Rot Bilong Lukautim Yumi

Bilong lukautim yumi, yumi mas stap longwe long olgeta samting i insait long wok bilong ol spirit. (Galesia 5:​19-​21) Olsem na God Jehova i tokim ol wokboi bilong em long abrusim ol samting olsem: “Yupela i no ken larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.”​—⁠Lo 18:​10-​12.

Planti manmeri i bihainim dispela tok na ol i mekim ol samting bilong lukautim ol yet long rot bilong rausim ol buk o ol narapela samting bilong wok bilong ol spirit nogut. Ken, husat i bin lusim wok bilong ol spirit nogut, em i tok: “Mi sekim olgeta samting bilong mi na bagarapim olgeta samting em mi pilim olsem ol i nogut.”​​—⁠Lukim Aposel 19:​19, 20.

Nambawan samting tru bilong lukautim yumi, em yumi wan wan i mas pas gut wantaim God tru, em Jehova. Tingim samting yumi mas mekim olsem Jems 4:​7, 8 i tok: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe. Yupela i mas i go klostu tru long God, na em bai i kam klostu tru long yupela. Yupela man bilong sin, bel bilong yupela i mas kamap klin, olsem man i wasim han bilong en na i kamap klin. Yupela man i gat tupela tingting, yupela i mas rausim dispela tingting nogut long bel bilong yupela.”

God Jehova i save skulim na lukautim ol man i go klostu long em. Ol i “save pinis long tingting na pasin bilong [Satan]” na ol i no larim em i giamanim ol. (2 Korin 2:11; 11:14) Na tu, Jehova i Gat Olgeta Strong. Taim ol i bilip na beten, Jehova bai kisim bek ol na ol spirit nogut i no inap mekim nogut long ol. Chad, pastaim yumi kamapim stori bilong em, i tok: “Nau mi save long as na mi kisim bagarap na mi no save slip long nait, na mi beten long God Jehova long lukautim mi na dispela hevi i pinis.”​​—⁠Song 91:​1, 2.

Ol man i gat gutpela bel ol i ken amamas olsem God bai lukautim ol long nau, na ol i save olsem i no longtaim na God bai bagarapim na pinisim ol spirit nogut na ol man i save mekim wok bilong ol spirit nogut. Man! Tingim amamas na bel isi bai stap long graun taim wok bilong ol spirit nogut i no putim moa hevi long ol man!​​—⁠Aisaia 11:9; KTH 22:⁠15.

YU LAIK SAVE?

◼ Ol Kristen i mas sakim wanem ol wok bilong ol spirit?​—⁠Lo 18:​10-​12; KTH 21:⁠8.

◼ Husat i save strongim wok bilong ol spirit?​—⁠2 Korin 2:11; 11:14; KTH 12:​9, 12.

◼ Yumi ken mekim wanem na bai ol spirit nogut i no ken bagarapim yumi?​—⁠Jems 4:​7, 8.

[Piksa long pes 10]

Wok bilong ol spirit i save helpim ol spirit nogut wankain olsem guma i save helpim ol man bilong kisim pis