Yu Ting Wanpela i Bin Wokim?
Boks Pis i No Lusim Nating Strong Bilong En
Bilong wokim wanpela strongpela ka i gat bikpela pawa, na smok bilong en i no ken bagarapim win samting, ol saveman bilong wokim ka i go long narakain ples olgeta bilong painim wanpela samting we inap helpim ol long wokim kain ka olsem—insait long solwara! Boks pis—em wanpela pis bilong rip long solwara bilong ol ples hat—em i gutpela samting tru ol inap bihainim piksa bilong en na wokim ka i no hevi na i isi long ron spit insait long win.
Tingim: Boks pis inap swim hariap tru. Insait long wanpela seken tasol em inap swim i go longwe, winim mak bilong longpela bilong bodi bilong en inap sikspela taim. Tasol em i no save yusim bikpela strong long spit, nogat. Dispela lukluk bilong en olsem boks, dispela i mekim na em inap senisim ol pasin bilong em long spit. Ol ensinia i bin wokim wanpela model, olsem piksa bilong dispela pis na testim dispela model long wanpela rum i gat bikpela win long en na ol i kisim save olsem, dispela model i ron gut tasol i go maski i gat win, na em i winim ol narapela ka.
Boks pis i gat skin i olsem bun, dispela i save givim bikpela strong long em na i mekim em i no hevi. Ol liklik raunwin i save kamap insait long hap solwara i raunim boks pis, dispela i mekim em i stap gut taim solwara i rap. Olsem na em inap stiaim gut ron bilong en na em i no kisim bagarap.
Ol ensinia i ting olsem boks pis i kamapim wanpela gutpela save i stap hait em ol inap yusim bilong wokim wanpela kain ka i no inap kamapim bagarap, yusim liklik petrol tasol, na em i no hevi. Ensinia Thomas Weber i tok: “Tru tumas, mipela i kirap nogut olsem dispela narapela kain pis i kamap olsem model o piksa, bilong mipela long wokim wanpela ka em inap yusim liklik petrol tasol na ron spit insait long win.”
Yu ting wanem? Dispela boks pis i no lusim nating strong bilong en, em i kamap nating tasol? O wanpela man i bin wokim?
[Ol Piksa Kredit Lain long pes 10]
Boxfish: © Hal Beral/V&W/SeaPics.com; car: Mercedes-Benz USA