Pisin Wandering Albatros i No Yusim Bikpela Strong Long Flai

OL PISIN i save flai antap tru inap trip long win na ol i no yusim bikpela strong tumas. Pisin wandering albatros em wanpela bilong ol dispela kain pisin. Longpela bilong wing bilong en long wanpela sait i go long narapela sait em inap 3.4 mita, na hevi bilong en 8.5 kilogram, na em inap yusim liklik strong tasol bilong flai inap planti tausen kilomita! Bodi bilong en na pasin bilong en long trip long win i helpim em long flai olsem.

Tingim: Taim em i flai, em i save yusim wanpela spesel rop long masol bilong em long lokim wing bilong en taim em i opim wing i go bikpela tru, dispela i mekim ol masol bilong en i malolo. Na tu, em i save bihainim gut win bilong solwara na dispela i helpim em long trip long win inap planti aua.

Long solwara, ol albatros i save flai i go antap, tanim, na flai long wanpela sait i go long narapela sait na mekim olsem i go i go, dispela i helpim ol long kisim bek strong bilong ol. I no longtaim i go pinis, ol saientis i kisim save long hau ol pisin i save flai olsem. Ol i yusim sampela kain masin na spesel program bilong kompiuta na painimaut olsem ol albatros i kisim strong taim ol i flai long wanpela sait bihainim ron bilong win, na bihain flai i go long narapela sait na win i sakim ol. Ol saientis i tok: “Strong bilong win i no save dai na i no save raf tumas.” Dispela i mekim wanem long pisin? Dispela i mekim na pisin inap trip long win inap planti aua na em i no mas paitim wing bilong em!

Ol dispela save inap helpim ol ensinia long wokim ol kar i yusim win long ron na i no yusim planti fiul, o kar i no gat wok long yusim ensin.

Yu ting wanem? Pisin albatros i no yusim bikpela strong na i yusim gut bodi bilong en long flai, i kamap long rot bilong evolusen? O wanpela i bin wokim?