Olsem Wanem Long i Stap Bilong Albatros Bihain?

Wanpela man long Briten i raitim dispela stori bilong Kirap!

Nambawan bikpela pisin i save trip antap long solwara em pisin albatros. Olsem wanem long i stap bilong en bihain? Nius The Times bilong Landon i tok: “I no gutpela liklik.” Planti tausen bilong dispela pisin​—⁠sampela saveman bilong Ostrelia ol i ting inap 44,000 bilong ol i save dai long olgeta yia. Na sampela saveman i ting dispela pisin bilong raun, em pul bilong en i op inap 3-pela mita samting, klostu nau em bai pinis olgeta.

Taim albatros i redi long flai, ol i save raun long solwara inap 7-pela yia. Inap sampela tausen kilomita ol i trip antap na sut i kam daun na go antap gen, na maski ol i flai, ol inap slip tu. Sampela man i ting ol dispela kain pisin i save raunim graun olgeta inap sampela taim paslain long ol i go bek long ples mama i bin karim ol inap long ol yet i ken kamapim pikinini.

Albatros i save kamapim wanpela pikinini tasol long olgeta 2-pela 2-pela yia. Tasol insait long 20 yia, namba bilong ol albatros i bin go daun inap 50 pesen long Saut Jojia long solwara Saut Atlantik na long Krose long solwara Indian. Sampela i ting as bilong dispela em wanem samting? Ol i ting em ol longpela longpela string i gat planti huk.

Bilong kisim wanpela kain pis ol i kolim blufin atun, ol man bilong painim pis ol i save mekim wok long ol longpela string em wan wan bilong en i gat planti handet huk. Long stan bilong bot ol i tromoi ol string i go insait long solwara. Long olgeta wan wan huk ol i pasim pis tauka​—⁠em nambawan kaikai bilong albatros. Taim pisin i sut i kam daun bilong kisim tauka, sampela i save daunim huk wantaim. Em nau, albatros i pas long huk na em i go daun insait long solwara wantaim string i hevi tumas na em i kisim bagarap.

Bilong lukautim albatros na ol i no ken bagarap, sampela lain i bin kirapim ol man bilong painim pis atun long putim string bilong ol insait long solwara long taim bilong tudak; long dispela taim albatros i no save raun painim pis. Na sampela man bilong painim pis ol i wok long painim rot bilong hangamapim ol string aninit long bot bilong ol inap long albatros i no ken lukim tauka long ol huk. Na sampela rot moa ol i bin traim, em long mekim wok long wanpela kain piksa samting bilong pretim ol pisin o ol i putim hevipela samting long ol string inap long string i ken go daun hariap insait long solwara.

Tasol long biksolwara bilong Saut Atlantik i no gat rot bilong bosim ol bot bilong painim pis na ol samting ol man i save mekim. Sandy Bartle bilong Haus Tumbuna long Nu Silan, em i wanpela savemeri bilong ol pisin bilong solwara, na em i stori long ol bot long biksolwara Saut Atlantik olsem: “Ol i no save mekim wanpela samting na albatros i no ken i dai.” Tru tumas, nambawan bikpela pisin albatros em inap pinis olgeta, long wanem, ol man i no laik was gut na ol i les long mekim wanpela samting.