Raun Bilong Albatros
Pisin albatros i kisim nem long raun bihainim ol sip, na inap longtaim ol man i raun long solwara i laik kisim save long en. Pul bilong en i op inap 2.7 mita, olsem na taim em i raun long antap i olsem em i drip nating long win na i no hatwok. Lek bilong en i bikpela na wanpela kain skin i pasim ol pinga wantaim. Dispela i mekim na pisin inap sanap long graun. Taim em i raun long antap, em i mekim wok long lek olsem stia, na lek i longpela i go ausait winim sotpela tel bilong en.
Hevi bilong skin bilong sampela em inap olsem 9 kilogram. Bai yu kirap nogut long lukim dispela kain pisin i lusim solwara i go antap. ‘Taim em i laik flai i go antap, em i kain olsem balus i save sindaun long wara na i laik kirap lusim wara na i go antap. Pisin i taitim nek i go na opim pul bilong en na wokim lek bilong en spit tru na i go long win. Nau bros bilong pisin i lusim solwara na lek tasol i paitim yet antap bilong wara. Taim em i lusim wara pinis i go antap, em i pulim nek i kam insait na pulim lek i kam antap, olsem dispela kain balus i pulim saman i kam antap.’—Buk The New Larousse Encyclopedia of Animal Life.
Dispela pisin i hapman tru bilong raun long ol strongpela win long antap, na em i save wokim haus bilong en long ol ailan i stap longwe long ol man. Na em i save lusim ples na i go raun longwe longwe tru bilong painim kaikai. Em i save raun longwe inap hamas kilomita?
Ol saveman bilong saiens i bin pasim liklik samting olsem redio long 6-pela albatros man i save raun, em ol i stap long hap bilong saut-wes long Biksolwara India. Long rot bilong dispela samting ol inap skelim raun bilong ol dispela pisin na ol i kirap nogut, long wanem nau ol i save, pisin albatros i save raun longwe tru, olsem 3,620 i go inap 15,090 kilomita, na i flai spit tru inap olsem 80 kilomita long wanpela aua. Insait long 33 de dispela 6-pela pisin i bin raun inap olsem 16,000 kilomita.
Raun bilong pisin albatros long antap i kirapim yumi long litimapim nem bilong Man i bin wokim dispela pisin.—Buk Song 148:10, 13.