Baibel i Tok Wanem?

Olsem Wanem Mi Inap Bosim Gut Mani ?

“Pe bilong ol samting i wok long go antap, tasol pe mi kisim i stap olsem tasol. Planti taim mi no slip long nait, mi tingting planti hau bai mi lukautim famili bilong mi.”​—James.

“Mi pilim olsem mi no gat rot.”​—Sheri.

PLANTI man i save tok olsem taim ol i gat hevi long mani. Juan Somavia (daireka-​jeneral bilong Intenesenel Leba Ofis) i stori long strong bilong mani i go daun, na i tok: “Em wanpela hevi i painim olgeta man.”

Taim wantu bos i pinisim wanpela man long wok o em i no gat mani inap long baim ol samting famili i mas i gat, dispela inap mekim na man i tingting planti na pilim olsem em i no gat rot. Wanpela man bilong raitim Baibel, Devit, em tu i bin pilim olsem. Em i beten: “Pinisim olgeta bel hevi bilong mi, na bel bilong mi i ken i stap isi. Helpim mi, na ol hevi bai i no inap daunim mi.” (Song 25:17) Baibel i tok wanem long taim bilong yumi? Ol gutpela tingting i stap long en inap helpim yumi long stap gut na bel isi?

Gutpela Tingting Bilong Helpim Ol Man Long Nau

Baibel i tok profet olsem long “taim bilong las de” bilong dispela pasin bilong nau, planti “pen” na “hevi nogut tru” bai kamap. (2 Timoti 3:1; Matyu 24:⁠8) Dispela tok profet i wok long kamap tru long nau! Tasol i no olsem yumi no gat rot, nogat. Long rot bilong Baibel, God i givim yumi ol tok i gat gutpela tingting long en na inap helpim yumi long taim bilong hevi bilong mani.

Olsem: Baibel i helpim yumi long holim stretpela tingting long mani. Saveman 7:​12 i tok: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut.” Yes, mani inap helpim yumi long taim nogut, tasol gutpela tingting i stap long Baibel, em tasol inap helpim yumi long olgeta taim. Tingim sampela eksampel.

Long Taim Bilong Hevi Bilong Mani

Wok strong. “Lesman i laikim tumas long kisim planti samting, tasol em i no save kisim. Tasol ol man bilong hatwok bai i kisim planti samting inap long laik bilong ol.” (Sindaun 13:⁠4) Samting dispela i lainim yumi long en i olsem: Kisim nem olsem man bilong wok strong tru na i no save giaman. Ol bos i save laikim ol man i wok strong na ating ol i namba wan lain long kisim wok na bos i no ken pinisim ol hariap long wok.​—Efesus 4:​28.

Skelim gut pe paslain long yu baim. Jisas i tok: “Sapos wanpela bilong yupela i laik wokim wanpela haus bilong ol man i ken i stap na was long ol samting bilong en, orait ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat.” (Luk 14:28) Tru, dispela tok bilong Jisas i makim olsem man i mas skelim ol samting em i mas mekim bilong i stap disaipel bilong em, tasol dispela tok i makim tu pasin bilong skelim gut pe bilong baim samting. Olsem na wokim wanpela baset, olsem raitim long pepa ol samting yu mas i gat na pe bilong en.

No ken tromoi mani long ol samting inap nogutim yu. Ol pasin olsem pilai laki, smok, kisim drak, na dring planti tumas, ol i samting nogut long ai bilong God.​—Sindaun 23:​20, 21; Aisaia 65:11; 2 Korin 7:⁠1.

No ken “mangal long mani.” (Hibru 13:⁠5) Ol man i laikim tumas mani, ol bai “karim bikpela hevi moa” na lus long amamas ol i ting ol bai kisim. (1 Timoti 6:​9, 10) Ol i kirap long laikim planti samting moa na dispela i kalabusim ol​—⁠maski ol i gat planti samting pinis, dispela i no inap.​—Saveman 5:​10.

Stap belgut. “Taim mama i karim yumi na yumi kamap long graun, yumi no bin karim wanpela samting i kam. Na taim yumi lusim graun yumi bai i no inap karim wanpela samting i go. Tasol sapos yumi gat kaikai na laplap samting, orait yumi ken tok, “Em inap long mi.” (1 Timoti 6:​7, 8) Ol man husat i stap belgut maski ol i no holim planti samting, ol i no save tingting planti tumas taim strong bilong mani i go daun. Olsem na lain long baim ol samting long skel stret bilong pe yu save kisim​—⁠no ken baim samting i abrusim pe yu save kisim.​—Lukim blok long han sut.

I no gat wanpela bilong yumi i save wanem samting bai kamap long tumora. Saveman 9:​11 i tok: “Taim nogut i save painim yumi olgeta.” Olsem na ol man i bihainim gutpela tingting ol i ‘no bilip long mani samting i save bagarap kwik, nogat, ol i bilip tru long God,’ em i bin tok promis long ol man i stap gut long em olsem: “Bai mi no lusim yu. Bai mi no larim yu i stap nating. Nogat tru.” ​—1 Timoti 6:​17; Hibru 13:⁠5.

YU LAIK SAVE?

● Baibel i tok wanem long taim bilong yumi?​—2 Timoti 3:​1-5.

● Yumi inap painim we ol tok bilong soim rot long yumi?​—Song 19:⁠7.

● Mi ken mekim wanem na bai famili bilong mi i ken stap gut long bihain?​—Saveman 7:​12.

[Blok/​Piksa long pes 21]

OL ROT BILONG SEIVIM MANI

Ol samting yu baim long stua: Wokim lista. No ken baim nating ol samting. Painim ol samting long pe i daun. Askim ol long givim diskaun. Baim ol samting yu mas i gat, long taim ol i putim long spesel. Sapos yu inap, baim ol samting long bakstua.

Ol samting bilong haus: Baim bil bilong wara na pawa samting long taim stret bambai ol i no ken sasim ekstra long yu. Kukim ol kaikai inap long skel. Ofim ol lait na TV samting taim yu no yusim. Sapos inap, yusim sola pawa samting. Kisim haus inap long famili tasol.

Trenspot: Sapos yu laik baim wanpela ka bilong yu yet, kisim wanpela i no yusim planti petrol. I no olsem ka i mas nupela. Abrusim pasin bilong go planti taim tumas long stua​—⁠traim baim ol samting long wanpela taim tasol. Sapos inap, kalap long ka bilong narapela taim yu laik go long stua o long wanpela hap, nogut ol wan wan i kisim ka bilong ol yet na go. O kalap long PMV o wokabaut o raun long baiskol. Kisim malolo long taim i gat spesel fea o go long hap i no longwe tumas.

Fon na TV samting: Yu ting yu mas i gat telefon na mobail fon wantaim? Yu ting ol pikinini bilong yu i mas i gat mobail fon bilong ol yet, na sapos ol i mas i gat, tokim ol long no ken yusim nating nating? Sapos yu laik kisim kebol TV, makim wanpela kampani we pe i daun?a Maski baim ol buk long stua, go long laibreri na kisim.

[Futnot]