Maigren Hau Bai Yu Daunim?

Joyce i wok i stap long ofis, na em i wok long lukluk long wanpela pepa em i holim. Wantu em i no inap lukim sampela rait long pepa. Orait nau em i lukim planti liklik lait i kamap, na bihain ol i go krungut krungut na ol i sut nabaut. Insait long sampela minit tasol, ai bilong Joyce i go tudak. Em i luksave long samting i wok long kamap, olsem na kwiktaim em i dring wanpela liklik marasin bilong stopim dispela samting.

JOYCE i gat wanpela kain het pen ol i kolim maigren, em i narapela kain liklik long nomol het pen. Olsem: Taim maigren i laik kamap, i gat ol mak i save kamap pastaim, na ol i wankain long olgeta taim. Pen bilong en i strong tumas na man i kisim dispela kain het pen em i no inap mekim ol wok bilong em.

Wanem sampela mak bilong maigren? Pen i bikpela tru, na sampela taim em i kamap long wanpela sait tasol bilong het. Na sampela taim man i laik traut, na em i no inap lukluk long strongpela lait. Dispela pen inap i stap sampela aua o sampela de.

Tru, planti man i save kisim het pen long wan wan taim, tasol wanpela long olgeta 10-pela 10-pela man i save kisim maigren. Namba bilong ol meri i kisim maigren i winim ol man. Long sampela manmeri, pen bilong maigren i bikpela moa, na planti i mas lusim wok inap sampela de insait long wanpela yia. Maigren i mekim na ol i katim pe bilong man long wok, na dispela inap nogutim i stap bilong em na famili bilong em. Olsem na Wol Helt Oganaisesen i tok, long 20 bikpela sik i save pasim man long mekim wok, maigren em wanpela bilong ol.

Taim maigren i laik kamap, sampela i save pilim han i kol, skin i les tru, hangre, bel hevi o bel i no stap isi. Na paslain stret long het pen i kirap, ai bai raun, nois i kamap insait long yau, pilim olsem nidol i sutim sutim skin, lukim ol samting dabol dabol, maus i hevi long toktok, na strong i pinis.

Ol dokta i no save gut long as na maigren i kamap, tasol ol i ting em i wanpela sik bilong ol nev, na em i save nogutim ol liklik rop bilong blut i stap long het. I luk olsem taim blut i ran insait long ol rop em ol dispela nev i mekim nogut long en, dispela i as na maigren i kamap. Wanpela nius (Emergency Medicine) i tok: “Ol lain i gat maigren, papamama bilong ol i gat sampela kain hevi long ol nev, na dispela i bin kalap long ol. Maigren inap kamap taim ol i no kisim gutpela slip, o ol i smelim sampela kain strongpela smel, o ol i raun i go i kam long wok o long sampela hap, o ol i lusim kaikai sampela taim, o ol i kisim presa, o mak bilong homon long bodi i go antap o i go daun.” Ol lain i save kisim maigren, sampela taim ol inap kisim tu sik long ol rop bilong bel, na bel i no stap isi o ol i pret pret, na bel hevi.

Olsem Wanem Yu Inap Daunim?

Yu no inap senisim ol nev yu bin kisim long papamama. Tasol ating yu inap mekim sampela samting bilong pasim maigren. Sampela i save raitim long buk ol kaikai o ol samting i bin kirapim maigren.

I no ol wankain samting i save kirapim maigren long olgeta man husat i gat maigren, nogat. Lorraine i luksave olsem, em i save kisim maigren taim sik mun i laik painim em. Em i tok: “Namel long dispela hap taim, sapos ples i hat o kol, o i gat bikpela nois, na sapos mi mekim bikpela wok o kisim kaikai i gat spais long en, orait ol dispela samting i save kirapim maigren. Olsem na long dispela haptaim mi laik stap isi na mekim ol samting long skel tasol.” Joyce i bin kisim maigren inap 60 yia pinis, na em i tok: “Mi bin luksave olsem orens, painapol, na retpela wain i save kirapim maigren wantu, olsem na mi save abrusim ol.”

I hatwok long luksave long ol samting i save kirapim maigren, long wanem, sampela taim tupela o tripela samting wantaim i save kirapim maigren. Olsem: Ating long wanpela taim yu kaikai soklet na yu no kisim maigren, tasol long narapela taim yu kaikai na yu kisim maigren. As bilong en em ating i gat narapela samting i wok wantaim soklet na dispela i kirapim maigren.

Maski sapos yu no inap luksave long ol samting i kirapim maigren o yu no inap abrusim, i gat ol narapela samting inap helpim yu long daunim maigren. Sampela saveman i tok, long olgeta nait traim long slip long wankain taim, na kirap long wankain taim long olgeta wan wan de long olgeta wik. Sapos long wiken yu laik slip longpela taim liklik, orait long moning, kirap long wankain taim olsem yu save mekim na mekim sampela samting inap sampela minit na go bek slip. Sapos yu senisim skel bilong hamas kofi yu save dring, dispela inap kirapim maigren, olsem na traim long dring tasol tupela kap kofi o tupela Cola dring insait long wanpela de. Hangre tu inap kirapim maigren, olsem na yu mas kaikai long taim bilong kaikai. Presa em wanpela samting i save kirapim maigren na i hatwok long abrusim, tasol traim painim rot bilong stap bel isi, olsem senisim sediul bilong yu, o ritim Baibel, o harim naispela musik.

Wanem Samting Inap Daunim Maigren?

I gat planti samting yumi inap kisim bilong helpim yumi long daunim maigren.a Slip em i nambawan samting. Sampela marasin bilong kilim pen ol inap daunim pen bilong maigren na bai man inap slip.

Long 1993, ol i kamapim wanpela kain marasin bilong daunim maigren, ol i kolim triptan, em dokta inap givim long man. Nius The Medical Journal of Australia i tok, triptan em i wanpela bikpela samting ol i bin painimaut, na ‘em i bikpela samting bilong daunim maigren na ol narapela strongpela het pen, wankain olsem penisilin i bikpela samting bilong daunim sampela kain sik ol jem i kamapim.’

Ol man i no save dai long maigren. Olsem na ol marasin bilong pinisim maigren i no bilong seivim laip bilong man olsem ol marasin bilong pinisim ol sik em ol binatang jem i kamapim. Tasol marasin triptan i bin helpim planti lain em ol i bin kisim taim long maigren inap planti yia. Tru, ol man i save kisim maigren i mas wok yet long mekim ol samting olsem yumi kolim pinis, tasol sampela i kolim triptan olsem mirakel marasin.

Tasol olgeta marasin i gat sampela gutpela samting long en na sampela samting i nogut long en. Wanem samting bilong triptan i no gutpela? Namba wan, pe bilong wanpela marasin triptan i dia tumas wankain olsem pe bilong baim kaikai long wanpela gutpela haus kaikai, olsem na marasin triptan em bilong ol man i gat maigren tasol. Na tu, triptan i no inap helpim olgeta man i gat maigren, na sampela em ol i gat narapela sik, i no gutpela long ol i kisim dispela marasin. Tru, ol dokta i no save long marasin stret bilong pinisim maigren, tasol nius Emergency Medicine i tok: ‘Ol i wok long kamapim ol nupela kain marasin bilong maigren, olsem na ol man i gat maigren, ol i gat rot bilong daunim strongpela het pen bilong ol.’

[Futnot]

[Piksa long pes 15]

Sampela i save raitim long buk ol kaikai o ol samting i bin kirapim maigren

[Piksa long pes 15]

Presa em wanpela samting we inap kirapim maigren, olsem na sapos man i harim naispela musik, dispela inap daunim presa

[Piksa long pes 15]

Maigren em sik man i kisim long papamama, na ol dokta inap givim marasin bilong daunim pen