Sapta 4

Dispela Man Olgeta Profet i Bin Tokaut Long Em

JISAS i stori long Papa bilong em, Jehova, na em i tok: “Papa i laikim tumas Pikinini na i soim em olgeta samting em i save mekim.” (Jon 5:19, 20) Kirap long taim God i wokim em, em planti tausen tausen yia paslain long taim em i kam daun long graun, tupela i pas gut wantaim na i stap wanbel. Dispela Pikinini tasol em God wanpela i bin wokim em. Olgeta narapela samting, long heven na long graun, God i wokim long rot bilong dispela namba wan Pikinini bilong em, em i save laikim tumas em. Dispela Pikinini i stap olsem Maus o Tok bilong God. Long rot bilong em God i tokim ol narapela long ol samting Em i laik mekim. Dispela Pikinini God i laikim tumas em, bihain em i kamap man long graun, em Krais Jisas.—Kl. 1:15, 16; Jon 1:14; 12:49, 50.

² God i wokim mirakel na Jisas i kamap man long graun. Paslain long dispela taim, spirit bilong God i kirapim ol profet long raitim planti tok long em. Olsem Pita i tokim Konilias: “Olgeta profet i save autim tok bilong em.” (Ap. 10:43) Jisas i gat bikpela wok long lotu i tru na Baibel i kamapim klia dispela samting, olsem na wanpela ensel i tokim aposel Jon: “Yu mas lotu long God wanpela tasol. Yumi save, Holi Spirit i kirapim ol profet long autim tok bilong God, em i save helpim ol man i autim nem bilong Jisas.” (Re. 19:10) Tok bilong ol dispela profet i makim klia Jisas na ol wok God i laik bai em i mekim. Nau yumi laik save long ol tok ol dispela profet i bin mekim.

Ol Samting Ol Profet i Tok Bai Kamap

³ Namba wan tok profet olsem i kamap bihain long taim pasin bikhet i kamap long Iden. Jehova i kolim strafe bilong snek na em i autim dispela tok profet. Jehova i tok: “Bai mi mekim yu birua long meri, na meri i birua long yu. Na bai mi mekim ol lain bilong yu i birua long lain bilong meri.” (Jen. 3:14, 15) Wanem insait bilong dispela tok? Sampela tok ol profet i bin mekim bihain i kamapim insait bilong dispela tok. Olsem na yumi save dispela snek em Seten. Na dispela “meri” em oganaisesen bilong Jehova long heven, olsem ol ensel i stap gut long Em. “Ol lain” bilong Seten em ol ensel na ol man ol i bihainim Seten na ol i birua long Jehova na long lain bilong Em. Yumi tingim ol samting Seten i mekim long rot bilong snek long Iden na yumi save, dispela tok profet long ‘lain bilong meri bai krungutim het bilong snek’ em i makim olsem Seten bai bagarap. Bipo em i stap pikinini bilong God, tasol em i bikhet na toknogutim God na putim bikpela hevi long ol man. Inap longtaim ol man i no save husat dispela “lain” o pikinini bilong meri em bai bagarapim Seten. Dispela tok i olsem wanpela tok hait.—Rom 16:25, 26.

⁴ Inap 2,000 yia bihain, Jehova i kamapim sampela tok moa long dispela samting. Em i tok, dispela pikinini bilong meri bai kamap long lain bilong Ebraham. (Jen. 22:15-18) Tasol God yet i mas makim husat husat bilong dispela lain em dispela pikinini i mas kamap long em. Ebraham i laikim tumas pikinini bilong em Ismal, em pikinini man bilong wokmeri Hega. Tasol Jehova i tok klia, olsem: “Long yia bihain bai Sera i karim pikinini man bilong yu Aisak, na bai mi mekim kontrak wantaim em.” (Jen. 17:18-21; 21:8-12) Bihain dispela tok promis o kontrak i go long Jekop, na i no i go long namba wan pikinini man bilong Aisak, em Iso. Jekop i tumbuna bilong 12-pela lain bilong Isrel. (Jen. 28:10-14) Na bihain God i tokaut olsem dispela pikinini em i mas kamap long lain bilong Juda, long famili bilong Devit.—Jen. 49:10; 1 Kro. 17:3, 4, 11-14.

⁵ Inap 700 yia paslain long taim dispela pikinini i kamap long graun, Baibel i makim Betlehem em i ples bai mama i karim em. Tasol Baibel i tok tu, dispela pikinini i stap pinis ‘long bipo bipo yet.’ (Mai. 5:2) Profet Danyel i tokaut long taim dispela pikinini i mas i kam olsem Man God i Makim, em Krais. (Dan. 9:24-26) Na taim spirit holi i makim em, wanpela maus long heven i tokaut long em. (Mt. 3:16, 17) Olsem na taim Filip i kamap disaipel bilong Krais, em inap tok: “Dispela man bipo Moses i raitim tok long em long lo, na ol profet tu i raitim tok long em, em mipela i painim pinis. Em Jisas bilong Nasaret, pikinini bilong Josep.”—Jon 1:45.

⁶ Bihain ol disaipel bilong Jisas i save, planti tok profet long Baibel i makim Jisas. Jisas i dai na kirap bek, na bihain em yet “i stat long tok bilong Moses na bilong olgeta profet, na em i . . . autim as bilong olgeta hap bilong Baibel i bin tok long em yet.” (Luk 24:27) Nau yumi save Jisas em i namba wan pikinini bilong “lain” bilong meri na em i mas krungutim het bilong “snek” na pinisim Seten olgeta. Long rot bilong Jisas olgeta tok promis bilong God, olsem olgeta gutpela samting yumi wet long en, bai kamap tru.—2 Ko. 1:20.

⁷ Taim yu kaunim ol dispela tok profet long namba wan taim, ating yu mekim tok wankain olsem bilong man bilong Itiopia, em i tok: “Profet i tok long husat na i mekim dispela tok?” Orait, Filip i kirap skulim em na i kamapim as bilong dispela tok profet. Nau dispela man i save, dispela tok profet i makim Jisas. Tasol em i no larim dispela tok i stap nating long bel bilong em. Nogat. Em i pilim tru na em i save em i mas kirap mekim sampela samting—em i mas kisim baptais. (Ap. 8:32-38; Ais. 53:3-9) Yumi tu yumi mekim olsem? Sampela taim Baibel i kamapim wanpela tok, na dispela i kirapim bel bilong yumi na yumi pilim tru dispela tok. Sampela taim Baibel i kamapim wanpela tok profet na tokaut long truim bilong en, na ating dispela i kirapim bel bilong yumi na yumi pilim tru.

⁸ Bilong pilim tru dispela samting yu ken skelim sampela samting i bin kamap bipo na i olsem piksa bilong makim Krais Jisas. Yu ken bekim ol dispela askim na lukim ol skripsa.

(1) Taim Ebraham i laik givim Aisak olsem ofa, olsem wanem dispela i makim stret samting Jehova i mekim long rot bilong Pikinini bilong em bilong baim bek ol man? (Jon 3:16; Jen. 22:1-18 [lukim ol tok Baibel i mekim long Aisak long Gen 22 ves 2.])

Olsem na yumi ken bilip tru long wanem samting? (Rom 8:32, 38, 39)

Tasol yumi mas mekim wanem? (Jon 3:36)

(2) Baibel i makim Jisas i profet olsem Moses, olsem na Baibel i kirapim yumi long tingim wanem bikpela wok bilong yumi? (Ap. 3:22, 23; Diu. 18:15-19)

Wanem sampela samting Jisas i bin tokim yumi long en? Olsem wanem na dispela i stret long nau? (Mt. 28:18-20; 19:4-9; 18:3-6)

(3) Taim Baibel i stori long ol samting wok pris bilong Eron i makim, Baibel i kirapim yumi long tingim wanem ol gutpela pasin bilong Jisas? (Hi. 4:15–5:3; 7:26-28)

Olsem na yumi mas ting olsem wanem long beten long God long rot bilong Krais bilong helpim yumi long stretim ol pasin kranki bilong yumi?

(4) Ofa bilong Krais i win (i senisim ol ofa ol man i mekim aninit long Lo bilong Moses), olsem na bilong wanem yumi mas was gut na yumi no ken mekim pasin yumi save God i no laikim? (Hi. 10:26, 27)

Ofa bilong Krais i opim rot na yumi inap kisim laip. Sapos yumi pilim tru dispela samting, bai yumi wok strong long mekim wanem? (Hi. 10:19-25)

Wanem Samting i Makim Olsem Yumi Bilip Long Krais?

⁹ Pita i tokim kaunsil long Jerusalem, Jisas i truim tok profet, na bihain Pita i tok strong olsem: “I no gat narapela man inap long helpim yumi. Long olgeta hap God i no soim narapela nem long yumi bilong kisim bek yumi.” (Ap. 4:11, 12; Sam 118:22) Olgeta lain bilong Adam ol i sinman. Ol i save dai, long wanem ol i gat sin. Olsem na ol i no inap givim laip bilong ol olsem ofa bilong baim bek narapela man. Tasol Jisas em i nambawan olgeta, olsem na taim em i dai na givim skin bilong em olsem ofa, dispela ofa i gat strong. (Sam 49:6-9; Hi. 2:9) Dispela ofa em i givim long God bilong baim bek yumi, em i stret tru wantaim ol samting yumi bin lusim long rot bilong Adam. Dispela i helpim yumi olsem wanem?—1 Ti. 2:5, 6.

¹⁰ Yumi inap kisim klinpela bel, long wanem nau i gat rot bilong tekewe sin bilong yumi—tasol ol dispela animal ol Isrel i bin wokim ofa long en olsem Lo bilong Moses i makim, ol i no bin helpim ol Isrel olsem. (Ap. 13:38, 39; Hi. 9:13, 14) Tasol yumi no ken giamanim bel bilong yumi yet—yumi mas save yumi sinman, na yumi mas bilip tru long Krais Jisas. Olsem wanem? Yu yet yu pilim tru bikpela wok dispela ofa bilong Jisas i mekim bilong helpim yumi? “Sapos yumi tok, ‘Mi no gat sin,’ orait yumi giamanim bel bilong yumi yet, na tok tru i no i stap long bel bilong yumi. Na sapos yumi autim sin bilong yumi, orait bai God i no lusim yumi. Nogat. Bai em i mekim stretpela pasin na lusim sin bilong yumi, na em i tekewe olgeta pasin nogut na bai yumi kamap klin.”—1 Jon 1:8, 9.

¹¹ Sampela i tok ol i save ol i sinman, na ol i tok ol i bilip long Krais, na ating ol i mekim sampela wok bilong tokim ol narapela man long Kingdom bilong God, olsem Jisas i bin mekim. Tasol ol i no bilip tru long Jisas. Olsem wanem yumi save ol i no bilip tru? Orait, ol bilipman bilong bipo ol i bin mekim wanem bilong kamapim bilip bilong ol long ai bilong ol man? Baibel i tok, ol i kisim baptais. Bilong wanem ol i kisim baptais? Long wanem Jisas i tok ol disaipel bilong em i mas kisim baptais. (Mt. 28:19, 20; Ap. 8:12; 18:8) Taim man o meri i pilim tru ol samting Jehova i bin mekim long rot bilong Krais, em i no surik long baptais. Em bai stretim ol pasin em i mas stretim na em bai dediket long God na kisim baptais. Olsem Baibel i tok, dispela i makim man i bilip, na i olsem em i ‘singautim God i mekim bel bilong em i kamap klin.’—1 Pi. 3:21.

¹² Tasol bihain tu bai em i mekim sampela popaia o pasin kranki. Orait, em i mas mekim wanem? Aposel Jon i tok: “Mi raitim dispela tok long yupela, bai yupela i no ken mekim sin.” Olsem na taim yumi mekim pasin kranki o tok kranki, o yumi tingting kranki, yumi no ken ting dispela i samting nating tasol. Tasol sapos yumi mekim sin, “yumi gat Helpim bilong yumi, em i stap wantaim Papa. Em dispela stretpela man Jisas Krais. Em yet i mekim wok bilong tekewe sin bilong yumi.” (1 Jon 2:1, 2) Tasol olsem wanem? Sapos yumi beten tasol, bai God i “tekewe” olgeta kain kain sin bilong yumi? Nogat. Yumi mas tanim bel tru bambai God i ken lusim sin bilong yumi. Na ating ol elda long kongrigesen i mas helpim yumi tu. Yumi mas save dispela samting yumi mekim em i no stret na yumi mas pilim tru rong bilong yumi na bai yumi wok strong bambai yumi no ken mekim gen. (Ap. 3:19; Jems 5:13-16) Sapos yumi mekim olsem, yumi ken save Jisas bai helpim yumi. Sapos yumi bilip tru long ofa bilong Krais em inap tekewe sin, orait yumi inap i stap gutpela gen long ai bilong God. Em bikpela samting bambai God i ken orait long ol wok yumi mekim bilong lotuim em.

¹³ Ofa bilong Krais i opim rot na yumi inap kisim laip i stap oltaim. “Liklik lain” bai ol i kisim laip long heven, na ‘bikpela lain manmeri’ bai ol i kisim laip long Paradais long graun. (Luk 12:32; Re. 20:11, 12; 21:3, 4) I no olsem yumi mekim wok na nau God i mas givim dispela pe long yumi. Nogat. Maski yumi mekim bikpela wok tru bilong Jehova, tasol i no olsem yumi inap kamap gutpela tru long rot bilong dispela wok na God i mas givim laip long yumi. Laip oltaim i olsem “presen” God i givim long yumi na yumi kisim long “wok bilong Jisas Krais.” (Rom 6:23; Ef. 2:8-10) Tasol sapos yumi bilip long dispela “presen” na yumi pilim tru ol wok God na Krais i bin mekim bambai yumi ken kisim dispela “presen,” orait bai yumi kamapim ples klia bel bilong yumi. Bai yumi pilim gutpela wok Jehova i mekim long rot bilong Krais bilong kamapim laik bilong Em, na bai yumi save yumi mas bihainim tru lek bilong Jisas. Olsem na bai yumi tingim wok Kristen bilong yumi em i wanpela bikpela samting long laip bilong yumi. Bai yumi wok strong long tokim ol narapela man long dispela nambawan gutpela “presen” bilong God, na long dispela rot bai yumi kamapim bilip bilong yumi.—Lukim Aposel 20:24.

¹⁴ Kain bilip olsem i mekim yumi i stap wanbel tru! Long rot bilong dispela bilip yumi stap wanbel wantaim Jehova na Pikinini bilong Em na ol brata Kristen long kongrigesen. (1 Jon 3:23, 24) Dispela bilip i mekim na yumi amamas long Jehova i bin givim nem long Jisas “i winim olgeta arapela nem [tasol em i no winim nem bilong God]. . . . Na olgeta man i mas tokaut olsem: ‘Jisas Krais em i Bikpela.’ Na bai nem bilong God Papa em i stap antap tru.”—Fl. 2:9-11.

Stori Gen Long Ol Dispela Tok

● Taim Krais i kam, ol man i bilip tru long Tok Bilong God, olsem wanem ol inap luksave tru long em?

● Olsem yumi lukim long pes 34, ol samting bilong bipo i makim Jisas, dispela i mas mekim wanem long bel bilong yumi?

● Ofa bilong Krais i helpim yumi pinis long wanem ol rot? Yumi mas mekim wanem bilong soim olsem yumi tenkyu tru long em long dispela ofa?

[Askim Bilong Stadi]

1. Yumi tingim ol samting Jisas i mekim taim em i no kam daun yet long graun na yumi save em i stap olsem wanem wantaim Jehova?

2. Ol tok profet bilong Baibel i mekim bikpela tok long Jisas o liklik tok tasol?

3. (a) Long tok profet bilong Jenesis 3:14, 15, “snek” i makim husat? “Meri” i makim husat? Husat ol i olsem “ol lain” bilong snek? (b) Bilong wanem ol wokboi bilong Jehova i tingting tru long ‘lain bilong meri bai krungutim het bilong snek’?

4. Taim yumi skelim ol tumbuna bilong Jisas, olsem wanem yumi inap save Jisas em i dispela “lain” o pikinini bilong meri?

5. Taim Jisas i kirap long mekim wok bilong em, i gat wanem narapela samting tu na ol man inap save em i Krais?

6. (a) Jisas i dai, na bihain ol disaipel i save long wanem samting? (b) Husat i namba wan pikinini bilong “lain” bilong meri? Wanem insait bilong dispela tok olsem ‘em bai krungutim het bilong snek’?

7. Tru yumi mas save long man em dispela tok profet i makim, tasol yumi mas tingim wanem narapela samting tu?

8. Yumi stori long 4-pela samting i bin kamap bipo na i makim Jisas. Tingim gut ol askim na skripsa hia na stori long ol samting dispela 4-pela tok profet i mekim long bel bilong yumi. Stori long ol dispela tok profet wan wan.

9. Olsem wanem na Jisas tasol inap helpim yumi na i no gat narapela man inap mekim?

10. Stori long wanpela samting ofa bilong Jisas i bin mekim bilong helpim tru yumi.

11. Bilong wanem baptais long wara i bikpela samting bambai bel i ken kamap klin long ai bilong God?

12. Sapos yumi save yumi bin mekim sin, yumi mas mekim wanem? Bilong wanem yumi mas mekim olsem?

13. (a) Stori long narapela samting ofa bilong Jisas i mekim bilong helpim yumi. (b) Taim yumi mekim wok bilong God, bilong wanem yumi no ken ting God i mas givim dispela “presen” long yumi olsem pe bilong dispela wok yumi mekim? (c) Tasol sapos yumi bilip tru, bai yumi mekim wanem?

14. Sapos yumi bilip olsem long Jisas, olsem wanem dispela i helpim yumi long i stap wanbel?

[Blok/Piksa long pes 34]

Ol Samting i Bin Kamap Bipo Na i Makim Jisas—Taim Yu Tingim Dispela, Em i Mas Mekim Wanem long Bel Bilong Yu?

Ebraham i laik givim Aisak olsem ofa

Moses i mekim wok olsem maus bilong God

Eron i mekim wok hetpris

Ol i kilim animal olsem ofa