Stadi 13
Olsem Wanem Yu Inap Painim Lotu i Tru?
God i laikim olgeta lotu, o wanpela tasol? (1)
Bilong wanem i gat planti lotu i tok ol i Kristen? (2)
Olsem wanem yu ken save long ol trupela Kristen? (3-7)
1. Jisas i bin kirapim wanpela trupela lotu Kristen. Olsem na long nau i mas i gat wanpela lain tasol i lotu tru long God Jehova. (Jon 4:23, 24; Efesus 4:4, 5) Baibel i tok wan wan man tasol i stap long liklik rot i go long laip.—Matyu 7:13, 14.
2. Baibel i bin tok profet olsem: Taim ol aposel i dai pinis, isi isi ol bilip giaman na pasin i no stret bai kam insait long kongrigesen Kristen. Sampela man bai pulim ol bilipman long bihainim ol na ol i no bihainim Krais. (Matyu 7:15, 21-23; Aposel 20:29, 30) Olsem na nau yumi lukim planti narapela narapela lotu i tok ol i Kristen. Olsem wanem yumi inap save long ol trupela Kristen?
3. Nambawan bikpela mak bilong ol trupela Kristen i olsem: Narapela i laikim tru narapela. (Jon 13:34, 35) Ol i no lain long ting olsem ol i winim ol manmeri bilong narapela lain o skin. Na ol i no lain olsem ol i mas birua long ol man bilong narapela kantri. (Aposel 10:34, 35) Olsem na ol i no insait long ol woa. Ol trupela Kristen i mekim gutpela pasin long ol wanbilip olsem brata na sista bilong ol.—1 Jon 4:20, 21.
4. Narapela mak bilong trupela lotu em i olsem: Ol i gat bikpela rispek long ol tok bilong Baibel. Ol i tingim Baibel olsem Tok Bilong God na ol i bilip long tok bilong en. (Jon 17:17; 2 Timoti 3:16, 17) Ol i ting Tok Bilong God em i bikpela samting, winim tingting bilong ol man o ol pasin bilong ples. (Matyu 15:1-3, 7-9) Long olgeta de ol i wok strong long bihainim tok bilong Baibel. Ol i no autim wanpela tok na bihainim pasin i narapela kain long dispela tok.—Taitus 1:15, 16.
5. Na tu, trupela lotu i mas litimapim nem bilong God. (Matyu 6:9) Jisas i bin autim nem bilong God, em Jehova, long ol narapela. Ol trupela Kristen i mas mekim wankain samting. (Jon 17:6, 26; Rom 10:13, 14, NW ) Long hap bilong yu, husat i save toktok wantaim ol man long nem bilong God?
6. Ol trupela Kristen i mas autim tok bilong Kingdom Bilong God. Jisas i bin mekim olsem. Oltaim em i save toktok long Kingdom. (Luk 8:1) Em i tokim ol disaipel long autim dispela tok long olgeta hap bilong graun. (Matyu 24:14; 28:19, 20) Ol trupela Kristen i bilip olsem Kingdom Bilong God tasol bai kamapim bel isi na gutpela sindaun long graun.—Song 146:3-5.
7. Ol disaipel bilong Jisas i no ken insait long pasin nogut bilong dispela graun. (Jon 17:16) Ol i no insait long ol wok politik na wok bilong stretim sindaun bilong ol man. Ol i abrusim ol pasin nogut na tingting nogut i pulap long dispela graun. (Jems 1:27; 4:4) Olsem wanem? Yu save long wanpela lotu long hap bilong yu em inapim ol dispela mak bilong lotu Kristen tru?
[Ol Piksa long pes 26, 27]
Ol trupela Kristen i laikim tru ol wanbilip, ol i rispektim tok bilong Baibel, na ol i autim tok bilong Kingdom Bilong God