Stadi 13

Wok Marila Na Posin i Nogut

Satan i laik bai yu mekim wok marila. Planti man i save mekim ol ofa long ol tumbuna o long tewel bilong ol man i dai pinis bambai dispela i ken lukautim ol. Ol i mekim olsem, long wanem, ol i pret long strong bilong ol spirit nogut long ples spirit. Ol i save pasim ol ring o paspas i gat marila long en. Ol i save dring “ol marasin” i gat strong bilong marila long en o ol i putim long skin. Ol i save kisim sampela samting em ol i bilip olsem i gat strong bilong lukautim ol, na ol i haitim long haus bilong ol o insait long graun. Sampela i save mekim wok long “marasin” i gat marila long en, long wanem, ol i bilip olsem em bai mekim na wok bisnis bilong ol bai kamap gutpela, o ol bai winim tes long skul, o man inap poromanim meri.

Nambawan samting bilong helpim yu na bai yu inap sakim Satan em yu mas stap pren bilong Jehova. God Jehova na ol ensel bilong em ol i strong moa na ol i winim Satan na ol spirit nogut bilong em. ( Jems 2:19; KTH 12:⁠9) Jehova i gat bikpela laik long kamapim strong bilong em bilong helpim ol pren bilong em​—⁠em ol man i stap gut tru long em.​—⁠2 Stori 16:⁠9.

Baibel i tok: “Yupela i no ken wokim kain kain posin.” Jehova i nolaik tru long wok marila na posin, long wanem, ol dispela samting inap mekim na man i stap aninit tru long strong bilong Satan.​—⁠Wok Pris 19:26.