Epril

Yu ken askim yu yet olsem: ‘Mi save mekim wanem taim wanpela i givim mi tok kaunsel? Mi save hariap long tokaut long ol rong bilong mi, o mi save painim ol eskius? Mi save hariap long sutim tok long ol narapela?’ Taim yu ritim stori bilong ol bilipman na bilipmeri long Baibel, skelim pasin ol i mekim. Askim yu yet: ‘Hau mi ken bihainim eksampel bilong dispela gutpela wokman o wokmeri bilong Jehova?’ Yumi ken kisim helpim tu taim yumi bihainim eksampel bilong ol wanbilip, em ol yangpela na ol lapun wantaim. Olsem, yu inap tingim wanpela insait long kongrigesen bilong yu husat i sanap strong na karim hevi? Ating ol wanlain i laik pulim em long mekim pasin nogut, o famili i birua long em, o helt bilong em i no gutpela. Yu lukim sampela gutpela pasin bilong em na yu laik wok strong long kisim ol wankain pasin olsem? Taim yu skelim eksampel bilong em, yu inap lainim sampela samting yu ken mekim bilong sanap strong na karim ol hevi i painim yu. Yumi amamas tru olsem yumi gat ol wanbilip em yumi ken bihainim pasin bilong ol long stap gut long bilip—tru tumas em samting yumi ken amamas tru long en!—Hib. 13:7. w22.04 13 par. 13-14

Taim yumi karim wanpela bikpela hevi long laip bilong yumi, yumi save pilim tru gutpela pasin bilong wanpela elda husat i lusim haptaim long putim yau long yumi na mekim isi bel bilong yumi. Taim yumi nidim helpim long mekim Baibel stadi, yumi save amamas tru taim wanpela painia i gat ekspiriens i sindaun wantaim yumi long stadi na em i kamapim sampela sajesten bilong helpim yumi. Olgeta dispela bratasista i amamas long helpim yumi. Yumi tu i ken kisim wankain amamas taim yumi redi long mekim ol wok bilong helpim ol wanbilip. Sapos yu laik mekim bikpela wok moa bilong Jehova long ol dispela rot o long ol narapela rot, orait wanem samting bai helpim yu long mekim olsem? Taim yu putim wanpela mak, tingim stret samting yu laik mekim. Ating yu tok, ‘Mi laik mekim sampela wok moa bilong helpim kongrigesen.’ Tasol ating yu no save hau long winim dispela mak, na yu no inap save long wanem taim stret yu bin winim dispela mak. Olsem na taim yu putim wanpela mak, tingim stret samting yu laik mekim. Ating yu ken raitim long notbuk dispela mak na hau yu plen long winim dispela mak. w22.04 25 par. 12-13

Long nau, Jehova i wok long bungim “bikpela lain manmeri” na em i wok long skulim ol long stap aninit long Kingdom bilong em. (Rev. 7:9, 10) Maski dispela graun i pulap long pasin bilong pret na ol woa, ol lain insait long dispela grup i wok strong long daunim pasin bilong heitim ol narapela, olsem ol man bilong narapela kantri na traib samting. Long rot bilong ol samting ol i mekim, ol i soim olsem ol i wok long paitim ol bainat bilong ol i kamap olsem ain bilong brukim graun. (Mai. 4:3) Ol i no insait long ol woa i kilim planti man i dai, nogat. Ol i wok long helpim ol manmeri long kisim save long “dispela laip em i laip tru” long rot bilong skulim ol long God tru na ol samting em i tingting pinis long mekim. (1 Tim. 6:19) Ol wanfamili inap birua long ol o ol inap karim hevi long sait bilong mani bikos ol i sapotim Kingdom Bilong God, tasol Jehova i save mekim ol samting na bai ol i gat ol samting ol i nidim. (Mat. 6:25, 30-33; Luk 18:29, 30) Ol dispela tok tru i strongim yumi olsem Kingdom Bilong God em i wanpela gavman tru na em bai wok yet long inapim laik bilong Jehova. w22.12 5-6 par. 13

Long pinis bilong 1,000 yia, ol manmeri i stap laip long graun ol bai kamap gutpela olgeta. I no gat wanpela man i stap laip long dispela taim bai i gat sin bilong Adam i stap long em. (Rom 5:12) God bai rausim ol samting nogut em sin yumi kisim long Adam i bin kamapim. Long dispela rot, olgeta manmeri i stap long graun bihain long 1,000 yia, ol bai “kisim laip” olsem ol manmeri i gutpela olgeta na i no gat sin. (Rev. 20:5) Yumi save olsem Jisas i bin sakim ol traim Satan i putim long em bilong pundaunim em. Jisas i sanap strong taim traim i painim em. Tasol yu ting ol manmeri i gutpela olgeta bai sanap strong taim Satan i kamapim laspela traim bilong pundaunim ol? Olgeta wan wan manmeri yet bai soim olsem ol i laik stap gut long God o nogat taim Satan i lusim kalabus bilong em long hul i no gat as long pinis bilong 1,000 yia. (Rev. 20:7) Ol manmeri i stap gut long God long dispela laspela traim, ol bai kisim laip oltaim na stap fri tru. (Rom 8:21) Tasol ol manmeri husat i sakim God, Em bai bagarapim na pinisim ol tru.—Rev. 20:8-10. w22.05 19 par. 18-19

Dispela samting i kamap tru taim Satan i kirapim lain Juda na lain Rom long kilim i dai Pikinini Bilong God. (Luk 23:13, 20-24) Taim man i gat sua long lek bilong em, inap sampela haptaim em i no inap wokabaut o i hatwok long em i wokabaut. Olsem tasol, taim Jisas i dai na slip long matmat inap 3-pela de, insait long dispela haptaim em i no inap mekim wanpela samting. (Mat. 16:21) Tok profet i stap long Stat 3:15 i soim olsem Jisas bai dai, tasol em bai kirap bek. Wai na yumi tok olsem? Dispela tok profet i kamapim klia olsem dispela pikinini bai krungutim het bilong dispela snek. Dispela i makim olsem Jisas bai kirap bek. Na tru tumas, dispela samting i bin kamap! Long namba 3 de bihain long em i dai, Jisas i kirap bek na kisim laip olsem wanpela spirit husat i no inap dai na em i go long heven. Long taim stret God i makim, Jisas bai bagarapim Satan na pinisim em olgeta. (Hib. 2:14) Krais na ol lain i mekim wok king wantaim em, ol bai bagarapim na pinisim olgeta birua bilong God—em lain pikinini bilong dispela snek.—Rev. 17:14; 20:4, 10. w22.07 16, 18 par. 11-12

Ol papamama, helpim ol pikinini bilong yupela long kisim ol gutpela pren. Tok Bilong God i helpim yumi long luksave olsem ol pren bilong yumi inap helpim yumi long bihainim gutpela pasin o pasin nogut. Yupela i save long ol pren bilong ol pikinini bilong yupela? Yupela i ken mekim wanem long helpim ol pikinini bilong yupela long kisim ol pren em ol i laikim Jehova? (1 Kor. 15:33) Yu ken helpim ol pikinini bilong yu long kisim ol gutpela pren long rot bilong invaitim ol lain i pas gut wantaim Jehova long mekim ol samting wantaim yu na ol pikinini bilong yu. (Sng. 119:63) Wanpela papa nem bilong em Tony, em i tok: “Long ol yia i go pinis, mi na meri bilong mi i bin invaitim ol bratasista bilong kain kain krismas na bekgraun long kam long haus bilong mipela. Ol i save kaikai wantaim mipela na insait long famili lotu bilong mipela. Dispela em gutpela rot long save long ol lain i laikim Jehova na amamas long mekim wok bilong em. . . . Ol ekspiriens bilong ol, na pasin bilong ol long givim bel na daunim laik bilong ol i helpim tru ol pikinini bilong mipela long i go klostu long Jehova.” w22.05 29-30 par. 14-15

Taim ol elda i bung wantaim wanpela Kristen husat i mekim bikpela rong, nambawan bikpela tingting bilong ol em long mekim wankain disisen em Jehova i mekim pinis long heven. Olsem wanem dispela arensmen i helpim kongrigesen? Dispela arensmen i makim olsem taim Kristen i mekim bikpela rong na em i no tanim bel, orait em bai raus long kongrigesen. Long dispela rot, em i no inap bagarapim bilip bilong ol sipsip bilong Jehova em ol i dia tumas insait long kongrigesen. (1 Kor. 5:6, 7, 11-13; Tai. 3:10, 11) Na tu, dispela arensmen inap helpim Kristen i mekim bikpela rong long tanim bel na bai Jehova i ken fogivim em. (Luk 5:32) Ol elda i ken beten long Jehova bilong helpim Kristen husat i tanim bel tru na bai em i ken kamap strong gen long bilip. (Jems 5:15) Olsem wanem sapos ol elda i bung na toktok wantaim wanpela Kristen i mekim bikpela rong, tasol em i no tanim bel? Long kain taim olsem, dispela Kristen bai raus long kongrigesen. Tasol bihain sapos em i stretim tingting bilong em na em i tanim bel tru na senisim pasin bilong em, orait Jehova bai redi long fogivim em. (Luk 15:17-24) Yes, Jehova bai fogivim em maski em i mekim bikpela rong tru.—2 Sto. 33:9, 12, 13; 1 Tim. 1:15. w22.06 9 par. 5-6

Jehova i helpim ol Kristen long olgeta hap bilong graun long ol bikpela hevi ol i karim, na ol i bin sanap strong na sakim Devil. (1 Pita 5:9) Yu tu i ken mekim olsem. Klostu nau, Jehova bai stiaim Jisas na ol wanwok bilong em long “bagarapim ol samting Devil i kamapim.” (1 Jon 3:8) Bihain long dispela, ol manmeri bilong God em ol i lotuim em hia long graun ol i “no inap pret long wanpela samting na i no gat wanpela samting bai pretim” ol. (Ais. 54:14; Mai. 4:4) Tasol long nau, yumi mas wok strong long daunim pasin bilong yumi long pret. Yumi mas wok yet long strongim pasin bilong yumi long bilip olsem Jehova i laikim ol wokman bilong em na em i save lukautim ol. Yumi bai kisim helpim bilong mekim olsem taim yumi tingim tingim na stori long ol narapela long hau Jehova i bin helpim ol wokman bilong em long bipo. Na yumi ken tingim hau Jehova i bin helpim yumi wan wan long karim ol hevi i painim yumi. Wantaim helpim bilong Jehova, yumi ken daunim pasin bilong pret!—Sng. 34:4. w22.06 19 par. 19-20

Strongpela gavman em “tupela fut bilong imis em hap ain na hap graun” i makim, dispela gavman i kirap pinis long mekim wok. Em i kirap mekim wok long Wol Woa 1 taim Briten na Amerika i kirap wok bung wantaim olsem Gavman Inglan-Amerika. Na tu, imis long driman bilong Nebukatnesar i tok profet long ol samting dispela gavman bai mekim na dispela i mekim na em i no wankain long ol kingdom i stap paslain long em. Long visen ol gavman i stap paslain long Gavman Inglan-Amerika em ol strongpela metal olsem gol na silva i makim ol. Tasol hap bilong imis we ain i miks wantaim graun i makim Gavman Inglan-Amerika. Graun i makim “ol pikinini bilong ol man,” o ol man nating. (Dan. 2:43, ftn.) Olsem yumi lukim long nau, ol man i pait long raits bilong ol long eleksen, ol kempein long raits bilong ol olsem sitisen, ol bikpela protes, na ol pait em ol man i mekim long raits bilong ol long ples wok. Olgeta dispela samting i daunim strong bilong dispela gavman long mekim samting em i laik mekim. w22.07 4-5 par. 9-10

Olsem wanem? Yu surik long kisim baptais? Sapos olsem, orait em bai gutpela long askim yu yet olsem, ‘Wai na mi wet?’ (Apo. 8:36) Jisas i tok bilong mekim laik bilong Papa bilong em, dispela i wankain olsem kaikai. Bilong wanem? Long wanem, kaikai em i gutpela samting bilong helpim yumi. Jisas i save olsem olgeta samting Jehova i tokim yumi long mekim ol i gutpela bilong helpim yumi. Jehova i no laik yumi mekim wanpela samting we inap nogutim yumi. Yu ting Jehova i laik bai yu kisim baptais? Yes. (Apo. 2:38) Olsem na yu ken save tru olsem taim yu bihainim dispela tok bilong kisim baptais, em bai helpim yu. Sapos yu no surik long kaikai wanpela naispela kaikai, orait wai na yu surik long kisim baptais? Wai na yu wet? Planti inap bekim dispela askim olsem, “Mi no redi.” Disisen yu mekim long dediketim yu yet long Jehova na kisim baptais em nambawan bikpela disisen yu inap mekim. Olsem na yu mas lusim sampela haptaim, tingting gut, na wok strong long redim yu yet. w23.03 7 par. 18-20

Taim God i anointim Jisas long dispela taim, em i kamap namba 1 pikinini bilong dispela meri. Bihain long Jisas i dai na kirap bek, God i “givim em glori na ona” na “namba long bosim olgeta samting long heven na long graun,” na tu, em i gat namba long “bagarapim ol samting Devil i kamapim.” (Hib. 2:7; Mat. 28:18; 1 Jon 3:8) Dispela meri i gat namba 2 lain pikinini. Aposel Pol i kamapim klia dispela lain pikinini ol i husat taim em i tokim ol Kristen bilong lain Juda na ol Kristen bilong narapela lain em God i bin anointim ol olsem: “Sapos yupela i bilong Krais, orait yupela i pikinini bilong Abraham, yupela ol man bilong kisim ol dispela samting God i bin promis long en.” (Gal. 3:28, 29) Taim Jehova i anointim wanpela Kristen wantaim holi spirit, nau dispela Kristen i insait long lain pikinini bilong dispela meri. So lain pikinini bilong dispela meri em Jisas Krais na lain 144,000 em ol bai mekim wok king wantaim em. (Rev. 14:1) Olgeta bilong ol i traim long bihainim tingting na pasin bilong Papa bilong ol, God Jehova. w22.07 16 par. 8-9

Yumi ken save olsem yumi bai bungim ol hevi long dispela taim bilong las de. (2 Tim. 3:1) Long kain taim olsem, yumi inap bel hevi tru na pilim olsem hevi i laik daunim yumi, na moa yet long taim ol hevi i wok long kamap klostu klostu o planti hevi i kamap long wankain taim. Tasol tingim, Jehova i lukluk long yumi i stap na em bai helpim yumi long strongim bel na karim ol dispela hevi. Tingim hau Jehova i bin helpim gutpela man Jop. Em i karim sampela bikpela hevi insait long sotpela haptaim tasol. Insait long wanpela de tasol, Jop i kisim save long ol samting nogut i kamap na i kilim i dai olgeta animal bilong em, ol wokman bilong em, na samting i nogut tru—dispela i kilim i dai olgeta pikinini bilong em. (Jop 1:13-19) Bihain tasol long dispela, taim Jop i wok yet long karim bikpela bel hevi long ol hevi i kamap, wanpela bikpela sik nogut tru i kisim em. (Jop 2:7) Jehova i wok long lukluk long Jop. Jehova i laikim tru Jop, olsem na Em i givim em ol samting em i nidim bilong karim ol hevi bilong em. w22.08 11 par. 8-10

Taim Jehova i stretim yumi, dispela inap mekim bel bilong yumi i hevi tru. Yumi inap kisim tingting olsem i no stret long yumi kisim dispela tok kaunsel o em i strongpela tok tumas. Taim yumi mekim olsem, dispela inap pasim yumi long luksave long wanpela bikpela samting—olsem dispela tok bilong stretim yumi i kamapim pasin laikim bilong Jehova long yumi. (Hib. 12:5, 11) So kisim tok bilong stretim yu na mekim ol senis em yu mas mekim. Planti taim Jisas i stretim Pita long ai bilong ol narapela aposel. (Mak 8:33; Luk 22:31-34) Ating dispela i semim em tru! Tasol Pita i stap gut yet long Jisas. Em i kisim tok bilong stretim em na em i kisim skul long ol popaia bilong em. Olsem na Jehova i blesim pasin bilong Pita long stap gut long em na em i givim ol bikpela wok long em insait long kongrigesen. (Jon 21:15-17; Apo. 10:24-33; 1 Pita 1:1) Taim yumi no sem long kisim tok bilong stretim yumi na yumi bihainim dispela tok, na mekim ol senis em yumi mas mekim, dispela pasin i helpim yumi yet, na tu, em i helpim ol narapela. Taim yumi mekim olsem, yumi inap stap olsem gutpela tul long han bilong Jehova na ol brata bilong yumi. w22.11 21-22 par. 6-7

Abraham i save olsem Jehova bai i no inap tru long mekim pasin i no stret o pasin nogut. Aposel Pol i tok, Abraham i bilip olsem Jehova inap kirapim bek pikinini man bilong em Aisak. (Hib. 11:17-19) Tingim, Jehova i bin mekim tok promis olsem Aisak bai kamap papa bilong bikpela lain manmeri, na long dispela taim Jehova i tokim Abraham long givim Aisak olsem ofa, Aisak i no bin gat ol pikinini yet. Abraham i laikim Jehova, olsem na em i bilip olsem Papa bilong em bai mekim stretpela pasin. Yes, bilip bilong Abraham i kirapim em long bihainim tok maski i hatwok long mekim olsem. (Stt. 22:1-12) Hau yumi ken bihainim eksampel bilong Abraham? Wankain olsem Abraham, yumi mas wok yet long kisim save long Jehova. Long dispela rot, yumi bai go klostu moa long Em na strongim pasin bilong yumi long laikim Em. (Sng. 73:28) Yumi bai lainim gut maus bilong bel bilong yumi long bihainim tingting bilong God. (Hib. 5:14) Na maski sapos wanpela i traim long pulim yumi long mekim pasin i no stret, yumi bai sakim em. Yumi bai no laik tru long mekim wanpela samting bilong mekim Papa bilong yumi i bel hevi na bagarapim pasin pren bilong yumi wantaim Em. w22.08 28-29 par. 11-12

Taim aposel Pol na Barnabas i go bek long Listra, Aikoniam, na Antiok, tupela i “makim ol hetman long olgeta wan wan kongrigesen.” (Apo. 14:21-23) Ol dispela hetman i bin mekim isi bel bilong ol Kristen, wankain olsem ol elda long nau tu i save mekim. Ol elda, luksave long ol wanbilip em ating ol i nidim ol “gutpela tok” bilong strongim ol. Pol i tokim ol wanbilip olsem Jehova i bin strongim “bikpela lain manmeri i olsem bikpela klaut” long sanap strong na karim ol hevi, na long dispela rot ol i “stap olsem witnes.” (Hib. 12:1) Pol i save olsem stori bilong ol wokman bilong God long pastaim em ol i bin sanap strong na karim olgeta kain hevi, dispela inap strongim bel bilong ol wanbilip na helpim ol long putim tingting i go long “taun bilong God i gat laip.” (Hib. 12:22) Na i wankain tu long nau. Taim yumi ritim stori long hau Jehova i bin helpim Gideon, Barak, Devit, Samuel na planti narapela, dispela i save strongim yumi tru!—Hib. 11:​32-35. w22.08 21-22 par. 5-6

Ol man i kirap bek, God bai skelim ol long ol “pasin ol i bin mekim” long wanem haptaim? Yu ting em ol pasin ol i bin mekim paslain long ol i dai? Nogat! Tingim, taim ol i dai ol i bekim pinis pe bilong sin ol i bin mekim. Olsem na dispela tok “pasin ol i bin mekim” i no makim pasin ol i bin mekim paslain long ol i dai, nogat. Em i makim pasin ol bai mekim long taim ol i kisim trening long nupela taim. Tingim ol bilipman olsem Noa, Samuel, Devit, na Daniel, ol tu i mas kisim save long Jisas Krais na bilip long ofa bilong em. Sapos ol dispela man i ken kisim kain save olsem, orait ol man nogut i mas kisim planti save moa! Wanem samting bai painim ol manmeri em ol i sakim dispela gutpela rot em God i givim long ol? Revelesen 20:15 i tokim yumi olsem: “Ol man em nem bilong ol i no stap long buk bilong laip, em i tromoi ol i go insait long dispela raunwara i gat bikpela paia.” Yes, God bai bagarapim ol na pinisim ol olgeta. Olsem na em i bikpela samting long nem bilong yumi i mas stap long buk bilong laip na em i mas stap oltaim long dispela buk! w22.09 18-19 par. 17-19

Maus bilong bel bilong yumi em Baibel i skulim pinis i helpim yumi long mekim ol disisen long sait bilong helt na long medikal tritmen. (1 Tim. 3:9) Taim yumi laik mekim ol disisen na stori long dispela wantaim ol narapela, yumi laik bihainim stiatok i stap long Filipai 4:5, em i tok: “Olgeta man i mas save olsem yupela i save bihainim gutpela tingting.” Taim yumi bihainim gutpela tingting, yumi no inap wari oltaim long helt bilong yumi. Yumi laikim ol bratasista bilong yumi na yumi rispektim ol, maski ol disisen ol i mekim i no wankain long ol disisen yumi mekim. (Rom 14:10-12) Yumi soim tenkyu bilong yumi long Jehova—em i As bilong laip—taim yumi lukautim gut laip bilong yumi na yumi givim bel olgeta long mekim wok bilong em. (Rev. 4:11) Long nau, yumi mas wok yet long karim hevi bilong ol sik na ol disasta samting. Tasol dispela em i no laik bilong God long yumi. Klostu nau, em bai givim laip oltaim long yumi we bai i no gat pen na dai moa. (Rev. 21:4) Tasol long nau, em i gutpela long yumi stap laip na mekim wok bilong gutpela Papa bilong yumi long heven, Jehova! w23.02 25 par. 17-18

Jehova i kamapim klia olsem em i gat bikpela strong moa winim “ol gavman.” (Rom 13:1) Skelim 3-pela eksampel. Fero bilong Isip i bin kalabusim lain bilong Jehova na inap planti taim em i no laik lusim ol i go. Tasol God i mekim ol i kamap fri na em i draunim Fero long Solwara Retsi. (Kis. 14:26-28; Sng. 136:15) King Belsasar bilong Babilon i mekim wanpela traipela pati, na em i “apim nem bilong [em] yet winim Bikpela bilong heven” na em “i preisim ol god ol i bin wokim long silva na gol” na em i no preisim Jehova. (Dan. 5:22, 23) Tasol God i daunim dispela man i gat pasin antap. Long “dispela nait yet,” ol i kilim i dai Belsasar na God i givim kingdom bilong em i go long han bilong ol Midia na ol Persia. (Dan. 5:30, 31) King Herot Agripa Namba 1 bilong Palestain i bin kilim i dai aposel Jems, na em i tok na ol i kalabusim aposel Pita, long wanem, em i laik kilim em i dai tu. Tasol Jehova i pasim Herot na em i no karimaut dispela plen bilong em. “Ensel bilong Jehova i mekim save long em” na em i dai.—Apo. 12:1-5, 21-23. w22.10 15 par. 12

Taim yumi ritim stori long hau Jehova i bin lukautim ol manmeri husat i bin stap gut long em long bipo, bilip bilong yumi bai kamap strong moa. Olgeta tok em ol i bin raitim long Tok Bilong God, “ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Tingim tingim long bel hau Jehova i bin truim ol tok promis bilong em. Tingim samting God i mekim long Abraham na Sara. Ol i kamap long krismas we ol i no inap karim pikinini. Maski i olsem, God i bin tok promis long ol olsem ol bai i gat wanpela pikinini. (Stt. 18:10) Abraham i mekim wanem? Baibel i tok: “Abraham i . . . bilip olsem em bai kamap papa bilong planti lain manmeri.” (Rom 4:18) Abraham i no save long hau God bai truim dispela promis, tasol em i bilip olsem Jehova bai truim dispela tok promis bilong em. Dispela bilipman i no bel hevi. (Rom 4:19-21) Ol kain stori olsem long Baibel i helpim yumi long bilip tru long Jehova olsem em bai truim ol tok promis bilong em. w22.10 27 par. 13-14

Ol dispela tok i bin kamap tru taim lain Juda i lusim kalabus long Babilon. Jehova i kamapim klia olsem em i Nambawan Bikpela Tisa bilong ol, em i stiaim ol manmeri bilong em na ol i mekim gut wok bilong kirapim gen lotu i tru. Jehova i stap olsem Nambawan Bikpela Tisa bilong yumi na dispela em i gutpela blesing tru yumi gat long nau. Aisaia i tok yumi olsem ol sumatin em Jehova i wok yet long skulim na em i tok: “Yu bai lukim Nambawan Bikpela Tisa bilong yu long ai bilong yu yet.” Long dispela tok piksa, em i stori olsem dispela Tisa i sanap long fran bilong ol sumatin bilong em. Yumi amamas tru long kisim helpim long ol tok bilong Jehova long nau. Long wanem rot Jehova i wok long skulim yumi? Long rot bilong oganaisesen bilong em. Yumi tenkyu tru olsem long rot bilong dispela oganaisesen, yumi save kisim ol stiatok i klia tru na isi long bihainim! Ol tok yumi kisim long rot bilong ol miting, ol pablikesen, ol brodkas, na long planti narapela rot i helpim yumi long dispela taim nogut long amamas yet long sanap strong na karim ol hevi. w22.11 10 par. 8-9

Jisas i tok long pinis bilong haptaim bilong lain Juda na “pinis bilong dispela taim” bilong yumi long nau olsem: “I no gat wanpela man i save long dispela de o dispela aua, ol ensel long heven i no save, na Pikinini tu i no save, Papa tasol i save.” Na bihain em i givim tok lukaut long olgeta disaipel bilong em olsem “yupela i . . . no ken slip” na “yupela i mas was i stap.” (Mak 13:32-37) Ol Juda Kristen long taim bilong ol aposel i mas was i stap bikos dispela inap lukautim laip bilong ol. Jisas i tokim ol disaipel bilong em olsem: “Taim yupela i lukim ol ami i kam banisim Jerusalem, orait yupela i ken save olsem taim bilong em long bagarap i kam klostu.” Long dispela taim stret, ol i mas bihainim tok lukaut bilong Jisas na “ranawe i go long ol maunten.” (Luk 21:20, 21) Ol manmeri i bihainim dispela tok lukaut, ol i abrusim bagarap taim ol Rom i bagarapim Jerusalem. Long nau, yumi stap klostu tru long pinis bilong dispela haptaim nogut bilong nau. So yumi tu i no ken slip na yumi mas was i stap. w23.02 14 par. 1-2; 16 par. 3

Jehova i save skulim ol wokman bilong em long mekim tok tru na bihainim stretpela pasin. Dispela i helpim ol long i gat rispek long ol yet na stap belgut. (Prov. 13:5, 6) Olsem wanem? Em i bin helpim yu long pilim olsem taim yu stadi long Baibel? Yu bin lainim olsem ol pasin bilong Jehova ol i gutpela long helpim olgeta man na ol inap helpim yu tu. (Sng. 77:13) Em as na yu laik bihainim stretpela pasin bilong God. (Mat. 6:33) Yu laik sambai long tok i tru, na yu laik soim olsem tok Satan i mekim bilong daunim gutnem bilong God Jehova em i no tru. Hau yu ken mekim olsem? Ol pasin yu bihainim long laip bilong yu inap kamapim klia olsem yu sakim ol tok giaman bilong Satan na yu sapotim tok i tru. Yu ken soim olsem yu laik bai Jehova i stap Bosman bilong yu na yu laik mekim ol samting we em i tok i stret long mekim. Hau yu ken mekim olsem? Toktok wantaim Jehova long rot bilong beten na dediketim laip bilong yu long em na bihain kamapim klia dispela dediket long rot bilong kisim baptais. Taim yu laikim tok i tru na stretpela pasin, dispela bai kirapim yu long kisim baptais. w23.03 3 par. 4-5

I gat wanpela kain bel isi em ol man bilong dispela graun i no save long en. Em “dispela bel isi bilong God,” em bel isi tru yumi save pilim taim yumi pas gut wantaim Papa bilong yumi long heven. Taim yumi kisim dispela bel isi bilong God, yumi no save pret long wanpela samting. (Fili. 4:6, 7) Yumi save poroman gut wantaim ol narapela em ol i laikim em. Na yumi save pas gut wantaim “God bilong bel isi.” (1 Tes. 5:23) Taim yumi save gut long Papa bilong yumi, trastim em, na bihainim tok bilong em, bel isi bilong God i ken mekim isi bel bilong yumi na yumi no tingting planti taim yumi karim wanpela bikpela hevi. Yu ting yumi inap kisim bel isi bilong God taim yumi bungim wanpela bikpela hevi olsem bikpela sik, wanpela disasta, pait insait long kantri, o ol man i mekim nogut long yumi? Ol dispela bikpela hevi inap mekim yumi pret. I gutpela tru olsem ol brata na sista i bin bihainim dispela tok bilong Jisas olsem i stap long teks bilong tude. Jehova i helpim ol, na ol i bin stap bel isi taim ol i karim ol bikpela hevi i painim ol. w22.12 16 par. 1-2

Yumi no inap long kontrolim olgeta samting i kamap long laip bilong yumi. Olsem na yumi no ken ting olsem ol asainmen bilong yumi i mekim na yumi dia tumas long Jehova, na yumi no ken skelim yumi yet wantaim ol narapela em ol i amamas long mekim ol asainmen em yumi no inap mekim. (Gal. 6:4) Em i bikpela samting long yumi mas painim ol rot bilong helpim ol narapela na mekim wok bilong Jehova. Yu ken mekim planti moa wok bilong Jehova taim yu bungim liklik kago tasol na yu abrusim pasin bilong kisim nating dinau. Putim ol liklik mak na dispela bai helpim yu long winim ol bikpela mak. Olsem, ating yu putim mak long kamap painia oltaim. Sapos olsem, orait yu ting yu ken mekim wok painia haptaim inap sampela mun pastaim? Sapos yu putim mak long kamap kongrigesen sevan, orait yu ting yu ken lusim bikpela haptaim moa long autim tok? Ekspiriens yu kisim long nau bai opim rot long yu inap mekim planti narapela wok long bihain. Yu mas tingting strong long givim bel olgeta long mekim wanem wanem asainmen yu kisim. w22.04 26 par. 16-17

Jehova i ken helpim yumi long karim ol hevi i painim yumi na long amamas yet long mekim wok bilong em. Taim yumi beten na tokim Jehova long wanpela samting em yumi wari na tingting planti long en, ating kwiktaim Jehova bai givim yumi strong bilong karim dispela hevi. Tasol sapos hevi bilong yumi i no pinis hariap olsem yumi bin ting long en, ating yumi mas wok yet long askim Jehova planti taim long givim yumi strong bilong karim dispela hevi. Em i tokim yumi long mekim olsem. Yumi luksave long dispela long tok Aisaia i mekim, olsem: “No ken larim [Jehova] i malolo.” (Ais. 62:7) Wanem insait bilong dispela tok? Yumi mas beten oltaim long Jehova na mekim olsem planti taim, i olsem yumi no larim Jehova i malolo. Ol tok bilong Aisaia i kirapim yumi long tingim ol tok piksa bilong Jisas long beten i stap long Luk 11:8-10, 13. Long ol dispela ves, Jisas i kirapim yumi long “wok yet long askim” long kisim holi spirit. Na tu, yumi ken beten askim Jehova long givim yumi ol stiatok yumi nidim bilong mekim ol gutpela disisen. w22.11 8 par. 1; 9-10 par. 6-7

Yu na famili bilong yu i ken redi nau long pasin birua inap painim yumi long bihain. No ken traim long piksaim olgeta samting nogut we inap painim yumi long bihain. Mekim ol samting bilong strongim pasin pren bilong yu wantaim Jehova na helpim ol pikinini bilong yu long mekim olsem tu. Sapos sampela taim yu tingting planti, orait kamapim bel bilong yu long God. (Sng. 62:7, 8) Olsem wanpela famili, stori long ol risen na yu ken trastim em. Taim disasta i kamap, pasin bilong yu long redi paslain long disasta na pasin bilong yu long trastim Jehova bai helpim ol pikinini bilong yu long strongim bel na stap bel isi. Bel isi bilong God i save mekim yumi pilim seif tru. (Fili. 4:6, 7) Long rot bilong en, Jehova i mekim isi bel bilong yumi taim yumi bungim hevi bilong ol bikpela sik, ol disasta, na taim ol man i mekim nogut long yumi. Em i save yusim ol elda bilong yumi em ol i save wok hat tru bilong lukautim yumi. Na em i opim rot long yumi olgeta inap helpim narapela narapela. Dispela bel isi em yumi kisim long nau bai redim yumi long bungim ol bikpela hevi bai kamap, na tu, em bai redim yumi long bungim “traipela hevi tru.”—Mat. 24:21. w22.12 27 par. 17-18

Yumi mas wok strong long lusim tingting long bel hevi em yumi pilim bikos long ol bikpela sin yumi bin mekim long bipo. Tasol yumi no ken givim eskius na ting olsem ofa bilong Jisas bai karamapim ol sin bilong yumi na “long laik bilong yumi yet, yumi bihainim pasin bilong mekim sin.” (Hib. 10:26-31) Taim yumi tanim bel tru long wanpela bikpela sin yumi bin mekim na kisim helpim em Jehova i givim long yumi na senisim ol pasin bilong yumi, orait yumi ken save tru olsem em i fogivim tru yumi. (Ais. 55:7; Apo. 3:19) Ofa bilong baim bek man i gat bikpela strong long karamapim olgeta sin bilong yumi na opim rot long yumi stap long Paradais. Bai i gat planti samting long mekim. Yumi bai bungim planti manmeri i gat kain kain bekgraun na yumi bai gat planti wok long mekim. Tasol nambawan samting tru, long olgeta de bai yumi wok yet long kisim save long Papa bilong yumi long heven na enjoim ol samting em i givim long yumi. Yumi no inap sot long kisim save long em, na bai yumi kisim planti save moa long ol samting em i bin wokim. w22.12 13 par. 17, 19

Dispela “meri” em i no Iv. Dispela tok profet i tokaut olsem lain pikinini bilong dispela meri bai “krungutim” het bilong dispela snek. Dispela snek i makim dispela ensel nogut em Satan, na i no gat wanpela tumbuna pikinini bilong Iv em ol i gat sin inap krungutim em. So husat bai bagarapim na pinisim Satan olgeta? Laspela buk bilong Baibel i kamapim klia husat dispela meri em Stat 3:15 i stori long en. (Rev. 12:1, 2, 5, 10) Dispela em i no wanpela meri long graun! Mun i stap aninit long lek bilong em na 12-pela sta i stap olsem kraun long het bilong em. Em i karim narakain pikinini—em Kingdom Bilong God. Dispela Kingdom i stap long heven, so dispela meri tu i stap long heven. Em i makim oganaisesen bilong Jehova long heven em ol gutpela ensel bilong Em i insait long en. (Gal. 4:26) Tok Bilong God i helpim yumi long save long husat em namba 1 pikinini bilong dispela meri. Dispela pikinini em i wanpela tumbuna pikinini bilong bilipman Abraham.—Stt. 22:15-18. w22.07 15-16 par. 6-8

Jehova i givim Baibel olsem presen long yumi we i pulap long savetingting. Ol tok bilong Baibel i helpim tru ol manmeri. Baibel i save senisim i stap bilong ol man. Taim Moses i raitim ol fes buk bilong Baibel, em i tokim lain bilong God, ol Israel olsem: “Ol dispela tok i no tok nating, nogat, ol i as bilong laip bilong yupela.” (Lo 32:47) Ol man husat i bihainim ol tok bilong Baibel, ol inap stap amamas. (Sng. 1:2, 3) Maski ol i bin raitim Tok Bilong God inap longtaim i go pinis, em i gat strong yet long helpim ol man. Ol stiatok bilong Baibel ol i bilong oltaim oltaim; ol i helpim ol man i stap long olgeta kain taim. Taim yumi ritim dispela buk holi na tingim tingim long bel ol samting yumi lainim, orait God i save yusim holi spirit bilong em long helpim yumi long luksave long hau yumi ken bihainim ol tok bilong Baibel long laip bilong yumi. (Sng. 119:27; Mal. 3:16; Hib. 4:12) Yes, Man i As bilong ol tok bilong Baibel em i laik tru long helpim yu. Dispela i mas kirapim yumi long ritim Baibel long olgeta taim! w23.02 3 par. 5-6

Revelesen sapta 13 i tokim yumi olsem dispela namba 7 het, em Gavman Inglan-Amerika, i wankain tu olsem wanpela wel animal i gat “2-pela kom i olsem bilong pikinini sipsip, tasol em i kirap toktok olsem wanpela traipela snek.” Dispela wel animal “i wokim ol bikpela mirakel, na long ai bilong ol manmeri em i mekim tu paia i lusim skai na i kam daun long graun.” (Rev. 13:11-15) Revelesen sapta 16 na sapta 19 i tok dispela wel animal em i “giaman profet.” (Rev. 16:13; 19:20) Daniel i mekim wankain tok olsem Gavman Inglan-Amerika bai “bringim bikpela bagarap long narakain rot tru.” (Dan. 8:19, 23, 24) Dispela samting i bin kamap tru long taim bilong Wol Woa 2. Tupela atomik bom i bin pairap na i pinisim woa long Pasifik em ol atomik bom em ol saientis bilong Inglan na Amerika i wokim. Long dispela rot, Gavman Inglan-Amerika i mekim “paia i lusim skai na i kam daun long graun.” w22.05 10 par. 9