Jun

Jehova i blesim ol Kristen long taim bilong ol aposel, long wanem, ol i redi long mekim ol senis taim ol samting long sindaun bilong ol i senis. Planti taim ol man i mekim nogut long ol, na sampela taim ol i mekim olsem long taim ol i no ting long en. Skelim samting i painim Barnabas na aposel Pol taim ol i autim tok long Listra. Pastaim ol man i amamas long harim tok ol i autim na ol i welkamim ol. Tasol bihain, sampela birua i “pulim tingting bilong ol manmeri” na ol dispela seim manmeri i stonim aposel Pol na lusim em i stap bilong em i ken dai. (Apo. 14:19) Tasol Barnabas na Pol i wok yet long autim tok long ol narapela hap. Wanem gutpela samting i kamap long dispela? Ol i “kamapim planti disaipel,” na ol tok na ol pasin bilong ol i strongim tru ol wanbilip bilong ol. (Apo. 14:​21, 22) Planti i kisim gutpela helpim, long wanem, Barnabas na Pol i no givap long autim tok taim ol man i mekim nogut long ol. Olsem tasol, taim yumi no givap long mekim ol wok Jehova i tokim yumi long mekim, Jehova bai blesim yumi. w23.04 16-17 par. 13-14

King Devit i bungim planti birua long laip bilong em, na planti taim em i save beten askim Jehova long helpim em. Devit i bilip tru olsem Jehova i harim ol beten bilong em na Em i bekim ol dispela beten. Yu tu i ken holim wankain bilip olsem. Baibel i strongim yumi olsem Jehova i ken givim yumi savetingting na strong em yumi nidim bilong sanap strong na karim ol hevi. Long nau, em inap yusim ol wanbilip bilong yumi na ol man i no lotuim em long helpim yumi long sampela rot. Em tru olsem oltaim Jehova i no inap bekim ol beten bilong yumi long ol rot we yumi ting long en, tasol yumi save olsem em bai bekim ol beten bilong yumi. Em bai givim yumi helpim yumi nidim na long taim stret yumi nidim. So wok yet long beten na bilip olsem Jehova bai putim yau, na yu ken save tru olsem em bai lukautim yu long nau na em bai “inapim laik bilong olgeta samting i gat laip” long nupela taim bai kamap klostu nau.—Sng. 145:16. w23.05 8-9 par. 4; 13 par. 17-18

Em i gutpela long tingim ol blesing yumi bin kisim taim yumi winim wanpela mak. Yu inap putim tingting long wanem ol blesing? Sapos yu putim mak long ritim Baibel o beten, orait tingim hau dispela inap strongim pasin pren bilong yu wantaim Jehova. (Sng. 145:​18, 19) Sapos yu putim mak long kisim wanpela pasin Kristen, orait putim tingting long hau dispela inap helpim yu long pas gut wantaim ol narapela. (Kol. 3:14) Yu ken mekim wanpela lista na raitim olgeta risen na yu laik winim mak yu putim. Oltaim sekim dispela lista. Na tu, spendim taim wantaim ol lain husat bai strongim yu long winim mak yu putim. (Prov. 13:20) Sampela taim yumi save pilim olsem yumi no gat laik long mekim wanpela samting. Yu ting dispela i makim olsem yumi no inap winim mak yumi putim? Nogat. Yumi ken mekim yet ol samting bilong winim mak yumi putim maski yumi no gat laik long mekim olsem. Ating yumi mas daunim sampela laik bilong yumi yet, tasol gutpela samting bai kamap. w23.05 27-29 par. 5-8

Taim yumi luksave olsem yumi mas karim hevi long ol disisen i no stret em yumi yet i mekim, dispela bai kirapim yumi long tokaut long ol sin bilong yumi, stretim ol popaia bilong yumi, na no ken mekim gen ol wankain popaia. Taim yumi mekim olsem, dispela inap helpim yumi long ran yet long resis bilong laip. Sapos yu no inap stretim bek wanpela disisen i no stret yu bin mekim, orait i gutpela yu ekseptim samting i kamap. No ken wari na tingting planti long strongim sait bilong yu yet o sutim tok long yu yet o long ol narapela. Yu ken ekseptim ol popaia bilong yu na wok strong long mekim ol samting yu inap mekim long nau. Sapos bel i kotim yu long wanpela rong yu bin mekim, orait daunim yu yet na beten long Jehova, kamapim rong bilong yu, na askim em long fogivim yu. (Sng. 25:11; 51:​3, 4) Tok sori long ol lain em ating yu bin rongim ol, na sapos inap, kisim helpim long ol elda. (Jems 5:​14, 15) Kisim skul long ol popaia bilong yu, na wok strong long no ken mekim gen ol wankain popaia. Taim yu mekim olsem, yu ken save tru olsem Jehova bai mekim pasin marimari long yu na givim yu helpim em yu nidim.—Sng. 103:​8-13. w23.08 28-29 par. 8-9

King Joas i kisim gutpela helpim long Jehoiada. Dispela i mekim na dispela yangpela king i laik tru long amamasim Jehova. Tasol bihain long Jehoiada i dai, Joas i putim yau long ol apostet hetman. (2 Sto. 24:​4, 17, 18) Jehova i bel hevi tru na em i “wok long salim ol profet i go long ol long bringim ol i kam bek . . . , tasol ol i no laik harim.” Ol i no laik putim yau tu long Sekaraia em pikinini man bilong Jehoiada, em i profet bilong Jehova na wanpela pris, na tu, em i kasen bilong Joas. King Joas i tok na ol i kilim i dai Sekaraia. (2 Sto. 22:11; 24:​19-22) Joas i no holimpas pasin bilong pret na rispek tru long Jehova. Jehova i bin tok: “Ol man i no laikim mi, bai mi no laikim ol.” (1 Sml. 2:30) Bihain, liklik lain ami bilong Siria i kam pait long “bikpela lain ami” bilong Joas na em i kisim “bikpela bagarap tru.” (2 Sto. 24:​24, 25) Ol wokman bilong Joas yet i kilim em i dai bikos long em i bin kilim i dai Sekaraia. w23.06 18-19 par. 16-17

Aposel Pol i bin stap sampela haptaim long Efesus, na em i autim tok na skulim ol man long gutnius. (Apo. 19:​1, 8-10; 20:​20, 21) Em i laikim tru ol bratasista bilong em, olsem na em i laik helpim ol long stap gut yet long Jehova. Ol lain Efesus em Pol i raitim pas i go long ol, ol i bin kalabus long ol tingting giaman bilong ol lotu na wok bilong ol spirit nogut. Ol manmeri long Efesus i gat nem long mekim ol pasin pamuk i nogut tru na ol pasin bikhet na ol i no save sem. Ol i save mekim ol tok doti long ol ples bung bilong mekim ol pilai, na long ol bikpela bung bilong lotu. (Efe. 5:3) Planti bilong ol Efesus “i no save sem moa long pasin ol i mekim,” long tok Grik dispela inap makim olsem “long bel na tingting bilong ol, ol i no pilim pen moa long ol pasin nogut ol i mekim.” (Efe. 4:​17-19) Paslain long ol Efesus i kisim save long wanem samting i stret na wanem samting i no stret, ol i no pilim olsem bel i kotim ol long ol pasin nogut ol i mekim. Olsem na Pol inap tok long ol olsem “long tingting ol i stap long tudak, na ol i stap longwe long laip i kam long God.” Tasol sampela bilong ol Efesus i no moa stap long tudak. w24.03 20 par. 2, 4; 21 par. 5-6

Gideon i mas wok hat tru bilong inapim asainmen bilong em olsem hetman. Taim ol Midia i ranawe long biknait taim ol i wok long pait, Gideon i ronim ol kirap long Veli Bilong Jesril i go olgeta long Wara Jordan. (Het. 7:22) Yu ting Gideon i givap na stop long ronim ol taim em i kamap long Jordan? Nogat! Maski em i taiet tru, em wantaim 300 man long lain ami bilong em i brukim Wara Jordan na ol i ronim yet ol Midia. Na ol i go kamap long kem bilong ol Midia na pait long ol na daunim ol. (Het. 8:​4-12) Gideon i bilip tru olsem Jehova bai strongim em, na Jehova i bin mekim olsem. (Het. 6:​14, 34) Wanpela taim, Gideon na ol man long lain ami bilong em i ronim tupela king bilong ol Midia taim ol dispela king i sindaun long ol kamel na spit i go. (Het. 8:​12, 21) Tasol God i helpim ol Israel na ol i ketsim tupela na kilim ol i dai. Olsem tasol, ol elda i ken bilip tru olsem Jehova bai helpim ol, long wanem, “em i no save taiet o strong bilong em i no save pinis.” Em bai strongim ol long taim ol i nidim helpim.—Ais. 40:​28, 29. w23.06 6 par. 14, 16

Yumi ken tingting strong long bihainim pasin i stret, maski yumi karim wanem hevi. So trastim Jehova. Skelim hau Barak i winim pait bikos em i trastim daireksen em Jehova i givim. Lain Israel i no gat wanpela spia o hap plang bilong pait, tasol Jehova i tokim em long go pait long Sisera em komanda bilong lain ami bilong Kenan na lain ami bilong em husat i gat planti samting bilong pait. (Het. 5:8) Profet meri Debora i tokim Barak long go daun long veli bilong bungim Sisera na 900 karis bilong em bilong pait. Maski ol karis inap ron gut long veli na pait strong na winim pait long lain Israel, Barak i bihainim tok tasol na i go daun. Taim ol soldia i lusim Maunten Tabor na go daun, Jehova i mekim bikpela ren tru i kam pundaun. Ol karis bilong Sisera i pas insait long graun malumalum na Jehova i helpim Barak long winim pait. (Het. 4:​1-7, 10, 13-16) Olsem tasol, Jehova bai helpim yumi long winim pait sapos yumi trastim em na trastim daireksen em i givim long yumi long rot bilong ol man em i makim. w23.07 19 par. 17-18

Yumi mas i gat pasin bilong i no les kwik bambai God i ken kisim bek yumi. Olsem ol gutpela wokman bilong God long bipo, yumi mas stap isi na i no les kwik taim yumi wetim God long truim ol tok promis bilong em. (Hib. 6:​11, 12) Baibel i tok pasin bilong yumi long wet em i wankain olsem wok bilong wanpela fama. (Jems 5:​7, 8) Fama i save wok strong long planim ol sid bilong kaikai na givim wara long ol, tasol em i no save long wanem taim stret ol dispela sid bai gro. Em i save stap isi na wet na em i no save les kwik, long wanem, em i bilip olsem em bai kisim kaikai em i planim. Olsem tasol, yumi bisi long mekim ol wok lotu bilong yumi maski yumi “no save long wanem de Bikpela bilong [yumi] bai i kam.” (Mat. 24:42) Yumi no les kwik long wet na yumi bilip tru olsem long taim stret bilong en, Jehova bai truim ol tok promis bilong em. Sapos yumi les kwik, yumi inap les pinis long wet na isi isi yumi lusim tok i tru. Na tu, yumi inap stat long mekim ol samting bilong givim amamas long yumi inap sotpela taim. Tasol sapos yumi no les kwik, yumi inap sanap strong i go inap long pinis na God i kisim bek yumi.—Mai. 7:7. w23.08 22 par. 7

Taim yumi skelim tok profet i stap long Daniel 2:​41-43 wantaim ol narapela tok profet long Buk Daniel na Revelesen, yumi luksave olsem tupela fut i makim Gavman Inglan-Amerika, em gavman i gat bikpela strong long nau. Daniel i tok long dispela strongpela gavman olsem, “dispela kingdom bai i gat strong long wanpela samting na long narapela samting, em bai malumalum.” Wai na dispela gavman bai malumalum long narapela samting? Bikos ol manmeri nating bilong en, em graun malumalum i makim, ol i daunim strong bilong dispela gavman long mekim wok olsem ain. Yumi lainim sampela bikpela tok i tru long stori bilong Daniel long dispela imis long driman bilong Nebukatnesar. Namba 1, Gavman Inglan-Amerika i soim strong bilong em long sampela rot. Olsem, dispela tupela gavman i bin mekim bikpela samting bilong winim Wol Woa 1 na Wol Woa 2. Tasol dispela strongpela gavman i wok long lusim strong bilong en, na em bai wok yet long lusim strong bilong en bikos ol manmeri aninit long en i wok long pait long narapela narapela na ol i pait long gavman tu. Namba 2, dispela gavman em laspela strongpela gavman long mekim wok bos paslain long Kingdom Bilong God i pinisim olgeta gavman bilong ol man long dispela graun. w23.08 10-11 par. 12-13

Sampela taim olgeta hevi na traim Devit i bungim i mekim em i bel hevi tru. (Sng. 18:​4, 5) Maski i olsem, pasin bilong Jehova long laikim em na lukautim em i givim nupela strong long em. Jehova i stiaim gutpela pren bilong em husat i bel hevi tru i go long ples i gat “gutpela gras” na “ples i gat wara” we em i ken malolo. Olsem na Devit i kisim bek strong bilong em na dispela i helpim em long amamas long mekim yet wok bilong Jehova. (Sng. 18:​28-32; 23:2) Long nau tu, “Jehova i gat gutpela pasin laikim, olsem na yumi no bagarap olgeta” taim yumi bungim ol bikpela hevi na ol hatwok. (Kra. 3:22; Kol. 1:11) Planti taim Devit i bungim taim nogut, na planti birua bilong em ol i gat bikpela strong. Tasol pasin laikim bilong Jehova i mekim em i pilim seif na em i pilim olsem Jehova i lukautim em. Devit inap pilim olsem Jehova i stap wantaim em long olgeta samting em i mekim na dispela i strongim em. Olsem na em i singsing olsem: “[Jehova] i rausim olgeta pret bilong mi, na mi no pret moa.” (Sng. 34:4) Maski sampela taim Devit i pret nogut tru, em i daunim pret bilong em bikos em i save olsem Jehova i laikim em. w24.01 30 par. 15-17

Kisim skul long ol disisen i no stret em Joas i bin mekim. Bihain long Hetpris Jehoiada i dai, Joas i makim ol poroman nogut. (2 Sto. 24:​17, 18) Em i putim yau long ol hetman bilong Juda em ol i no laikim Jehova. Ating yu bai wanbel long tok olsem i gutpela Joas i stap longwe long ol dispela bikhetman. Tasol nogat, em i putim yau long ol dispela pren giaman bilong em. So Sekaraia em kasen brata bilong Joas, i traim long stretim Joas, tasol Joas i tok na ol i kilim em i dai. (2 Sto. 24:​20, 21; Mat. 23:35) Joas i mekim longlong pasin tru! Taim Joas i liklik em i stap gut long God, tasol bihain em i kamap apostet na kilman. Bihain ol wokman bilong em yet i kilim em i dai. (2 Sto. 24:​22-25) Ating ol samting long laip bilong Joas bai stap gut yet sapos em i wok yet long putim yau long tok bilong Jehova na ol man husat i laikim Jehova! w23.09 9 par. 6

Jisas i save olsem aposel Pita inap stap gut yet long em. Olsem na long gutpela pasin Jisas i tokim Pita olsem “no ken pret.” Jisas i bilip long Pita na dispela i strongim tru Pita. Bihain, Pita na brata bilong em Andru i lusim wok bisnis bilong kisim pis na ol i givim bel olgeta long bihainim Mesaia, em disisen i kamapim planti gutpela blesing. (Mak 1:​16-18) Pita i kisim planti gutpela blesing taim em i kamap wanpela disaipel bilong Krais. Em i lukim Jisas i oraitim ol sikman, rausim ol spirit nogut long ol man, na kirapim bek ol man i dai pinis. (Mat. 8:​14-17; Mak 5:​37, 41, 42) Pita i lukim tu wanpela visen i soim glori bilong Jisas taim em i mekim wok olsem King long Kingdom, na dispela i mekim bikpela samting long Pita. (Mak 9:​1-8; 2 Pita 1:​16-18) Yes, Pita i lukim ol samting we em i no inap lukim sapos em i no bin bihainim Jisas. Ating em i amamas tru olsem em i no bin larim ol tingting kranki em i gat long em yet i pasim em long kisim ol dispela blesing! w23.09 21-22 par. 4-5

Long namba wan pas bilong aposel Pita, em i kolim dispela tok “laikim tru.” Dispela kain pasin laikim i save karamapim “planti sin” na i no sampela sin tasol, nogat. (1 Pita 4:8) Ating Pita i tingim skul em i kisim long Jisas sampela yia i go pinis long pasin bilong fogivim ol narapela. Long dispela taim, ating Pita i ting olsem em i mekim gutpela pasin taim em i fogivim brata bilong em “inap 7-pela taim.” Tasol Jisas i skulim em na yumi tu olsem yumi mas fogivim ol narapela “inap 77 taim,” olsem fogivim ol long olgeta taim. (Mat. 18:21) Sapos yu pilim hatwok long bihainim dispela tok kaunsel, orait no ken bel hevi! Olgeta wokman bilong Jehova i gat sin, olsem na sampela taim ol i pilim hatwok long fogivim ol narapela. Bikpela samting em olsem, long nau yu mas mekim olgeta samting bilong fogivim brata bilong yu na stap bel isi wantaim em. w23.09 29 par. 12

Taim em i stap insait long bel bilong pis, em i bilip olsem Jehova bai harim beten bilong em na helpim em. Bihain, Jehova i kisim bek Jona na em i redi long kisim na inapim wok Jehova i tokim em long mekim. (Jna. 2:10–3:4) Olsem wanem? Taim yu karim wanpela hevi, yu save tingting planti na pilim hatwok long kamapim bel na tingting bilong yu long beten? O yu save pilim olsem yu no gat strong long mekim stadi? Yu ken kisim strong long save olsem Jehova i kliagut long ol samting yu pilim. So sapos yu mekim wanpela sotpela beten, yu ken save tru olsem em bai givim strong em yu nidim. (Efe. 3:20) Sapos yu sik o yu bel hevi tru na dispela i mekim na yu hatwok long ritim Baibel na mekim stadi, orait yu ken traim long harim ol odio rekoding bilong Baibel o ol pablikesen em Baibel i as bilong en. Yu ken kisim helpim tu taim yu harim ol singsing bilong yumi o watsim wanpela vidio long jw.org. Taim yu beten long Jehova na yu painim ol bekim bilong ol beten bilong yu long rot bilong ol samting em i redim bilong helpim yumi, yu opim rot long Jehova i ken givim yu strong. w23.10 13 par. 6; 14 par. 9

Haus lotu sel na ol tempel em bihain ol i wokim long Jerusalem, insait bilong ol i wankain. Long insait i gat tupela rum—“Rum Holi” na “Rum Holi Tru”—na i gat wanpela bikpela keten i seperetim dispela tupela rum. (Hib. 9:​2-5; Kis. 26:​31-33) Insait long Rum Holi i gat wanpela gol lamsten, alta bilong smok i gat gutpela smel, na tebol bilong putim bret i save stap long ai bilong God. Ol pris em ol i bin “anointim,” ol tasol i ken i go insait long Rum Holi bilong mekim ol wok lotu bilong ol. (Nam. 3:​3, 7, 10) Insait long Rum Holi Tru i gat Bokis Kontrak we i makim olsem Jehova i stap wantaim ol. (Kis. 25:​21, 22) Hetpris tasol i ken i go insait long Rum Holi Tru long De Bilong Karamapim Sin long olgeta yia. (Wkp. 16:​2, 17) Em i save go insait long dispela rum wantaim blut bilong animal bilong karamapim sin bilong em yet na bilong lain Israel. Bihain Jehova i kamapim klia wan wan hap bilong haus lotu sel i makim wanem samting.—Hib. 9:​6, 7. w23.10 27-28 par. 12

Long Tok Bilong God, planti taim yumi save lukim dispela tok olsem “laikim narapela narapela.” (Jon 15:12; Rom 13:8; 1 Tes. 4:9; 1 Pita 1:22; 1 Jon 4:11) Tasol pasin laikim em samting yumi save pilim insait long bel, na em samting we ol narapela i no inap lukim. Olsem na hau yumi ken kamapim klia pasin bilong yumi long laikim narapela narapela? Yumi ken mekim olsem long rot bilong ol tok na pasin bilong yumi. I gat planti rot yumi ken soim ol bratasista bilong yumi olsem yumi laikim ol. Hia em sampela eksampel: “Mekim tok tru tasol long narapela narapela.” (Sek. 8:16) “Holimpas pasin bilong stap bel isi wantaim ol arapela.” (Mak 9:50) “Go pas long givim ona long ol arapela wanbilip.” (Rom 12:10) “Welkamim ol arapela brata.” (Rom 15:7) “Wok yet long . . . fogivim narapela.” (Kol. 3:13) “Wok yet long helpim narapela narapela long karim hevi.” (Gal. 6:2) “Wok yet long mekim isi bel bilong narapela narapela.” (1 Tes. 4:18) “Wok yet long . . . strongim narapela narapela.” (1 Tes. 5:11) “Beten bilong helpim narapela narapela.”—Jems 5:16. w23.11 9 par. 7-8

Yumi mas i gat strongpela bilip long mekim sampela disisen long olgeta wan wan de. Olsem, yumi save mekim ol disisen long sait bilong makim ol poroman, kisim amamas, wanem skul yumi laik go long en, sait bilong marit, kamapim ol pikinini, na long sait bilong wok mani. I gutpela yumi askim yumi yet olsem: ‘Ol disisen bilong mi i soim olsem mi bilip olsem dispela haptaim nogut bilong nau bai pinis na klostu nau God bai kamapim nupela taim? O mi mekim ol disisen i soim olsem laip bilong mi em i bilong sotpela taim tasol?’ (Mat. 6:​19, 20; Luk 12:​16-21) Yumi bai mekim ol gutpela disisen sapos yumi strongim bilip bilong yumi olsem nupela taim i wok long i kam klostu tru. Yumi mas i gat strongpela bilip bilong karim ol hevi i save painim yumi. Ating yumi inap bungim hevi bilong pasin birua, bikpela sik, o ol narapela samting inap mekim na yumi bel hevi. Ating pastaim, yumi inap pilim olsem yumi ken sanap strong na karim dispela hevi. Tasol sapos dispela hevi i stap yet i go i go, orait yumi mas i gat strongpela bilip bambai yumi ken sanap strong na amamas yet long mekim wok bilong Jehova.—1 Pita 1:​6, 7. w23.04 27 par. 4-5

Jehova i laik bai yumi mekim samting i stret wantaim ol beten bilong yumi. Olsem, wanpela brata inap beten askim Jehova long helpim em long kisim de-of long wok bilong em bambai em i ken go long wanpela kibung rijinel. Jehova inap bekim beten bilong em olsem wanem? Em inap helpim brata long kisim pasin bilong strongim bel na bai em i ken go lukim bos bilong em. Tasol brata yet i mas go lukim bos bilong em na askim em long dispela samting. Ating em i mas askim planti taim. Na ating brata i ken redi long senisim de bilong wok wantaim narapela wanwok o kisim de-of na bos i ken katim pe bilong em long dispela de. Jehova i laik yumi mas beten planti taim na tokim em long ol wari bilong yumi. Long tok Jisas i mekim, em i soim olsem God i no inap bekim sampela beten bilong yumi long taim yumi ting long en. (Luk 11:9) So no ken givap! Beten strong na beten planti taim. (Luk 18:​1-7) Taim yumi mekim olsem, yumi soim Jehova olsem samting yumi askim em long en em i bikpela samting long yumi. Na yumi soim tu olsem yumi bilip long strong bilong em long helpim yumi. w23.11 22-23 par. 10-11

Jehova i promisim pren bilong em Abraham olsem olgeta lain bilong graun bai kisim blesing long rot bilong pikinini bilong em. (Stt. 15:5; 22:18) Abraham i gat strongpela bilip long God, olsem na em i save tru olsem tok promis bilong God bai kamap tru. Maski i olsem, taim Abraham i gat 100 krismas na meri bilong em i gat 90 krismas, dispela tupela marit i no kisim yet wanpela pikinini man. (Stt. 21:​1-7) Tasol Baibel i tok: “Abraham i wet na bilip olsem em bai kamap papa bilong planti lain manmeri. . . . Em i bilip long dispela tok.” (Rom 4:18) Yumi save olsem samting Abraham i bilip na wetim i bin kamap tru. Em i kamap papa bilong pikinini man em i bin wetim inap longpela taim, em Aisak. Wai na Abraham i gat strongpela bilip? Abraham i pas gut wantaim Jehova, olsem na em i “bilip tru olsem samting God i bin promis long mekim” bai kamap tru. (Rom 4:21) Jehova i orait long Abraham na em i kolim em olsem stretpela man bikos long bilip bilong em.—Jems 2:23. w23.12 8 par. 1-2

Wanpela yangpela man husat i save mekim gut ol wok, em i save givim bel long mekim gut olgeta wok bilong em. Tingim nambawan gutpela eksampel bilong Jisas. Em i save tingim gut ol wok em i mekim na givim bel long mekim ol dispela wok. Em i inapim gut ol wok Jehova i givim long em, maski sampela taim i hatwok long mekim olsem. Em i laikim tru ol manmeri moa yet ol disaipel bilong em na em i redi long givim laip bilong em bilong helpim ol. (Jon 13:1) Yu ken bihainim pasin bilong Jisas na wok strong tru long inapim ol asainmen yu kisim. Sapos yu no save hau long mekim wanpela asainmen, orait daunim yu yet na askim ol brata i strong long bilip long helpim yu. No ken traim long inapim liklik hap tasol na ting olsem dispela em inap, nogat. (Rom 12:11) Yu mas inapim gut asainmen bilong yu, na mekim olsem yu “mekim long Jehova na i no long ol man.” (Kol. 3:23) Em tru olsem yu no gutpela olgeta, olsem na taim yu mekim ol popaia, daunim yu yet na tokaut long ol popaia bilong yu.—Prov. 11:2. w23.12 26 par. 8

Yumi amamas taim yumi kisim baptais na kam insait long famili bilong Jehova. Ol lain i dediket na kisim baptais ol i wanbel long tok bilong Devit, em man bilong raitim song, em i tok: “Man yu [Jehova] makim na singautim long i kam klostu long yu, em i ken amamas long i stap long haus bilong yu.” (Sng. 65:4) Jehova i save bringim wanem kain ol manmeri i kam insait long haus bilong em? Em i save makim ol man em ol i soim olsem ol i laik kamap pren bilong em. (Jems 4:8) Taim yu dediketim yu yet long Jehova na kisim baptais, yu ken save tru olsem bihain long dispela, em bai “kapsaitim planti gutpela samting long [yu] inap long [yu] no sot long wanpela samting.” (Mal. 3:10; Jer. 17:8) Baptais em kirap tasol bilong laip bilong yu olsem wanpela Kristen. Yu mas wok strong long truim tok promis yu mekim taim yu dediket, na tu, long taim ol hevi i kamap na i traim bilip bilong yu. (Ekl. 5:​4, 5) Olsem wanpela disaipel bilong Jisas, yu mas bihainim gut eksampel bilong Jisas na ol tok bilong em.—Mat. 28:​19, 20; 1 Pita 2:21. w24.03 8 par. 1-3

Olsem wanem sapos yu na poroman marit bilong yu i no save amamas long spendim taim wantaim? Yupela i ken mekim wanem? Tingim wanpela paia. Paia yet i no save lait bikpela. Isi isi yumi mas putim ol bikpela paiawut long en bambai em i ken lait bikpela. Olsem tasol, i gutpela long yutupela i kirap long spendim liklik haptaim wantaim long olgeta de. Traim long mekim ol samting we yutupela wantaim i enjoim. (Jems 3:18) Taim yutupela i mekim ol liklik samting wantaim, isi isi bai yutupela i kirapim gen dispela paia bilong pasin laikim bilong yutupela. Pasin rispek em bikpela samting insait long marit. Em i wankain olsem win oksijen we i helpim paia long lait bikpela. Taim i no gat win oksijen, paia i save dai hariap. Olsem tasol, taim i no gat pasin rispek, tupela marit bai pilim olsem pasin laikim bilong tupela i dai hariap. Tasol man na meri marit husat i wok strong long mekim pasin rispek long narapela narapela, ol i wok hat long mekim pasin laikim bilong ol olsem paia i lait strong yet i stap. Sampela taim yu inap ting olsem yu soim rispek long poroman marit, tasol bikpela samting em olsem poroman marit i mas pilim olsem yu rispektim em. w23.05 22 par. 9; 24 par. 14-15

Long Baibel, ol gutpela wokman bilong God i stori long ol taim we ol i tingting planti na pret bikos ol man i birua long ol o ol i bungim ol narapela hevi. (Sng. 18:4; 55:​1, 5) Olsem tasol, yumi inap bungim pasin birua long skul, long ples wok, insait long famili, o long gavman. Yumi inap pret tu long dai sapos yumi kisim wanpela bikpela sik. Long ol kain taim olsem, yumi inap pilim olsem wanpela liklik pikinini husat i no gat rot bilong kisim helpim. Long wanem rot Jehova i save helpim yumi taim yumi pilim olsem? Em i save strongim yumi na mekim isi bel bilong yumi. So oltaim yumi mas lusim sampela haptaim wantaim Jehova long rot bilong beten long em na ritim tok bilong em long Baibel. (Sng. 77:​1, 12-14) Na taim presa i daunim yu, fes samting yu bai tingting long mekim em long askim Papa bilong yu long heven long helpim yu. Tokim Jehova long ol samting i mekim yu pret na tingting planti. Na putim yau long em long rot bilong ritim tok bilong em long Baibel na bai yu luksave long rot em i mekim isi bel bilong yu.—Sng. 119:28. w24.01 24-25 par. 14-16

Em i bikpela samting long man i mas i gat laik long winim ol mak bilong bilip em i putim. Dispela bai helpim em long wok strong tru long winim dispela mak. Na taim yumi gat strongpela laik long mekim samting, dispela bai helpim yumi long winim mak yumi putim. So yu ken mekim wanem bilong i gat strongpela laik? Beten long kisim strongpela laik. Long rot bilong holi spirit bilong em, Jehova i ken givim yu laik bilong winim mak yu putim. Sampela taim yumi save putim wanpela mak bikos yumi save i stret long mekim olsem, na em gutpela samting. Tasol ating yumi no gat laik long winim dispela mak. Tingim tingim long bel samting Jehova i bin mekim long yu. (Sng. 143:5) Aposel Pol i tingim tingim long bel bikpela pasin laikim Jehova i mekim long em, na dispela i strongim laik bilong em long givim bel long mekim wok bilong Jehova. (1 Kor. 15:​9, 10; 1 Tim. 1:​12-14) Olsem tasol, taim yu tingim tingim long bel samting Jehova i bin mekim long yu, dispela bai strongim laik bilong yu long winim mak yu putim.—Sng. 116:12. w23.05 27 par. 3-5

Yumi amamasim Papa bilong yumi long heven taim yumi preisim nem bilong em. (Sng. 119:108) Tasol yu ting dispela i makim olsem God i Gat Olgeta Strong em i wankain olsem ol man i no gutpela olgeta, em ol i laik bai ol narapela i preisim ol bikos ol i nidim kain tok amamas olsem? Nogat. Taim yumi preisim Papa bilong yumi long heven, yumi daunim narapela tok giaman Satan i sutim long yumi olgeta wan wan. Satan i tok i no gat wanpela man bai stap gut na sambai long nem bilong God. Em i tok yumi ol man i no inap stap gut long God. Em i tok sapos taim nogut i painim yumi, yumi bai givim baksait long God bilong seivim laip bilong yumi yet. (Jop 1:​9-11; 2:4) Tasol bilipman Jop i kamapim klia olsem tok bilong Satan em i no tru. Olsem wanem? Yu tu bai stap gut long God? Yumi olgeta wan wan i ken makim olsem yumi laik sambai long nem bilong Papa bilong yumi na amamasim em long rot bilong stap gut long em na mekim wok bilong em. (Prov. 27:11) Tru tumas, em gutpela blesing tru long mekim olsem. w24.02 8-9 par. 3-5

Bihain long taim bilong Moses na Josua, Jehova i makim ol hetman long stiaim lain bilong em. Bihain long en, Jehova i makim ol profet long stiaim lain bilong em long taim bilong ol king. Ol king i stap gut long God, ol i bihainim edvais bilong ol profet. Olsem, King Devit i daunim em yet na kisim ol tok bilong stretim em i kam long profet Natan. (2 Sml. 12:​7, 13; 1 Sto. 17:​3, 4) King Jehosafat i bihainim ol tok em profet Jahasiel i givim bilong stiaim em na em i kirapim lain Juda long “bilip long ol profet bilong [God].” (2 Sto. 20:​14, 15) Taim King Hesekia i bel hevi tru, em i askim profet Aisaia long helpim em. (Ais. 37:​1-6) Long olgeta wan wan taim ol king i bihainim tok Jehova i givim bilong stiaim ol, em i blesim ol na lukautim lain bilong em. (2 Sto. 20:​29, 30; 32:22) Ol inap lukim olsem Jehova i yusim ol profet bilong em long stiaim lain bilong em. w24.02 21-22 par. 8

Satan i laik bai yumi bung wantaim ol lain em ol inap mekim na yumi pilim hatwok long bihainim ol lo bilong Jehova. I gutpela yumi tingim olsem ol poroman bilong yumi i no makim tasol ol lain em yumi lusim haptaim long stap wantaim ol, nogat. Dispela i makim tu ol lain em yumi toktok wantaim ol long sosel midia. Yumi mas wok strong long sakim tingting bilong dispela graun we i orait tasol long mekim ol pasin nogut. Yumi save olsem i no stret long mekim ol pasin nogut. (Efe. 4:​19, 20) I gutpela yumi askim yumi yet olsem: ‘Mi save wok strong long no ken bung wantaim ol wanwok, ol wanskul, na ol narapela em ol i no rispektim ol stretpela lo bilong Jehova? Mi save strongim bel na bihainim ol lo bilong Jehova maski sampela i sutim tok long mi olsem mi no tingim ol narapela?’ Olsem 2 Timoti 2:​20-22 i kamapim, yumi mas was gut tu taim yumi makim ol pren insait long kongrigesen Kristen. Yumi mas tingim olsem, sampela bilong ol i no inap helpim yumi long stap gut yet long wok bilong Jehova. w24.03 22-23 par. 11-12

Sampela taim yu save piksaim long tingting Jehova i luk olsem wanem? Maski yumi no inap lukim Jehova, Baibel i stori long em long planti narapela narapela rot. Baibel i tok Jehova “i olsem san na i olsem hap plang bilong pait” na em “i olsem wanpela bikpela paia i save kukim olgeta samting.” (Sng. 84:11; Hib. 12:29) Long visen Esekiel i lukim, em i tok ples Jehova i stap long en i olsem ston sapaia, metal i lait tru, na bikpela lait bilong renbo i raunim em. (Ese. 1:​26-28) Yumi no inap lukim Jehova, olsem na yumi inap pilim hatwok long bilip olsem em i laikim yumi. Sampela i ting olsem Jehova i no inap tru long laikim ol bikos long ol samting i bin painim ol long bipo. Jehova i kliagut long ol samting yumi pilim long bel na em i save long risen na ol dispela samting inap mekim na yumi hatwok long i go klostu long em. Bilong helpim yumi, em i kamapim klia naispela pasin bilong em long Baibel. Nambawan bikpela pasin bilong Jehova em pasin laikim. (1 Jon 4:8) Jehova em i pasin laikim. Pasin laikim i save stiaim olgeta samting em i mekim. Pasin laikim bilong God em i gutpela na i gat strong tru, olsem na em i save mekim dispela pasin long ol lain i laikim em, na tu, long ol lain i no laikim em.—Mat. 5:​44, 45. w24.01 26 par. 1-3

Jehova i makim Moses long kisim lain Israel na lusim Isip, na em i kamapim klia dispela evidens taim Em i yusim klaut long stiaim ol long san na em i yusim paia long stiaim ol long nait. (Kis. 13:21) Moses i bihainim dispela klaut we i stiaim em na lain Israel i go long Solwara Retsi. Tasol bihain, ol Isip i ron bihainim ol. Ol Israel i pret nogut tru bikos ol i ting ol Isip bai kilim ol i dai. Tasol em i no mekim popaia. Jehova yet i stiaim lain bilong em i kam long dispela hap long rot bilong Moses. (Kis. 14:2) Long dispela hap, God i kisim bek ol long wanpela narakain rot. (Kis. 14:​26-28) Kirap long dispela taim na i go inap 40 yia bihain, Moses i wok yet long bihainim dispela klaut bilong stiaim lain bilong God long ples drai nating. (Kis. 33:​7, 9, 10) Jehova i stap long klaut na toktok long Moses, na bihain Moses i tokim ol manmeri long tok bilong Jehova. Ol Israel inap lukim planti evidens i kamapim klia olsem Jehova i wok long yusim Moses long stiaim ol. w24.02 21 par. 4-5